Oꞌcxcu Kman Clol cye aj Israel
43
Atzun jaꞌlo, akeye aj Israel tiyjil Jacob, ate Kman aju binchante cyeye chi cyjaꞌ: Miꞌn che xobe porque ma che colpete wuꞌne; tiꞌj cybiye e tzaj ntxcoꞌne porque etzan keye wuꞌne. 2 Ka il tiꞌj tuꞌn cyicꞌxe tuj aꞌ, akine chin tele cyucꞌile, ka il tiꞌj tuꞌn cyicꞌxe cyuj nima, mlay cheꞌx mulkꞌaje tjakꞌ aꞌ, ex ka il tiꞌj tuꞌn cyocx kꞌoꞌne tuj kꞌakꞌ, mlay che tzꞌeꞌye ex mlay jaw julin kꞌakꞌ cyiꞌje. 3 Porque akine Dios aju Cymane, aju clol cyeye, ex akine Dios Xjan cye aj Israel. Ma cheꞌx nkꞌoꞌne ke aj Ejipt, ke aj Etiopía ex ke aj Sabá, tuꞌn tcub cyiꞌj te cyxele tuꞌntzun cycolpete. 4 Porque nimxix ncꞌuꞌje cyiꞌje, maꞌ cyoclene tuj nwitze ex cꞌujlaꞌn keye wuꞌne. Nok tuꞌn cytene wucꞌile ex tuꞌn cycyaj ankꞌine, ma cheꞌx nkꞌoꞌne ke xjal ex ke nasyon tuꞌn tcub cyiꞌj te cyxele. 5 Miꞌn che xobe porque lu kine atine cyucꞌile. Max tuj txꞌotxꞌ tuj tjawitz kꞌij ex max jatum nneꞌx baj, che ajetz nchmoꞌne ke cyxjalile tuꞌn cytene juntl maj junx. 6 Cxel nmaꞌne teju lugar at tuj tbankꞌab kꞌij cyjaꞌ: Che tkꞌoꞌn ajtze, ex cxel nmaꞌne teju lugar at tuj tnayaj kꞌij cyjaꞌ: Miꞌn che cyaj ttzyuꞌne. Cyiꞌn ajtze ke ncyꞌajale ex ke nmeꞌjele max ttxaꞌnpun txꞌotxꞌ najchak. 7 Cycyakil keju toc nbiye cyiꞌj, akeju wuꞌne, e bant tuꞌn tjaw cynimsaꞌn nbiye.8 Cyiꞌntze ke xjal etzan wuꞌne, akeju at tbakꞌ cywitz pero moẍ ke, ex at cyxcyin pero chcyin cywiꞌ. 9 Baꞌn tuꞌn toc cychmon cyib cycyakil tnam ex cycyakil nasyon tuꞌn cyoc tuj xjel. ¿Alcye jun cyxol ke tnam lu otok tma jlu ojtxi, ex ka otok tzaj tkꞌoꞌn naj tkanil tiꞌj ju o baj te ojtxi? Baꞌn tuꞌn ttzaj cyiꞌn testiw tiꞌj tuꞌn cymante ka ic tten jlu ex tuꞌn kbinte ex tuꞌn tel knicꞌ tiꞌj ka ax toc cyyol.
10 Chi Kman cyjaꞌ: Akeye testiw wiꞌje, ex akeye nmajene e jaw nscꞌoꞌne tuꞌn wojtzkinjtze cyuꞌne, tuꞌn toc keꞌ cycꞌuꞌje wiꞌje ex tuꞌn tel cynicꞌe alcye kine. Mi aꞌl juntl dios o ten nej nwitze ex mi aꞌl juntl ctel te tibajxi. 11 Oꞌcx kine Dios aju Cymane, mi aꞌl juntl jacu che clete tuꞌn.
12 A kine in kꞌonte tkanil ex akine in pacbante: Ma che clete wuꞌne ex mya tuꞌn juntl dios, ax keye testiw wiꞌje. 13 Akine Dios atxix ojtxi ex cucx ntene jaꞌlo. Mi aꞌl jun jacu tzokpaj tuj nkꞌabe. Mi aꞌl jun jacu cub kꞌuchinte ju in bant wuꞌne.
14 Ate Kman aju Dios Xjan cye aj Israel, ex aju tzokpil cyeye chi cyjaꞌ: Nok tuꞌnju at ncꞌujlalile cyiꞌje, cxel nsamaꞌne txkan soldad tuꞌn cypon tuj Babilonia ex cycyakil ke aj Caldey che elel ok cyuj cybarc, akeju nim in che tzalaj cyiꞌj. 15 Akine Dios aju Cymane, aju binchante cye aj Israel, aju Dios Xjan ex cyreye, chi Dios. 16 Jaket jun be ojtxi tuꞌn Kman tuj mar, jun be nnoꞌcx tuj tmij aꞌ in yucch wen, 17 ex e jeꞌtz tiꞌn txkan soldad nim cyipun, tucꞌix cycarwaj ex cychej, tuꞌntzun cynaj tuꞌn. Cucx e cyaj paleꞌ ex mintiꞌtl o che jaw weꞌ, biꞌx e cub baj ic tzaꞌn jun mech in cub yupj. 18 Atzun jaꞌlo, chi Kman cye ke xjal etzan tuꞌn cyjaꞌ: Miꞌn tzaj cynaꞌntle aju o baj cyiꞌje ex miꞌn che ximantle tiꞌj ju o baj ojtxi. 19 Porque oc nbinchaꞌye jun tiꞌxti acꞌaj ex oc cyilaꞌye biꞌx jaꞌlo cbantel. Cjaketel jun be wuꞌne tuj ju lugar mintiꞌ cynajbil xjal tuj, ex che jawil jlet ke nima tuj tzkij txꞌotxꞌ. 20 Chin jawil nimsaꞌne cyuꞌn ke jil te tjakꞌ cꞌul, ic tzaꞌn ke wech ex ke chyuꞌj avestrús, porque cjawil jlet nim aꞌ wuꞌne tuj lugar mintiꞌ cynajbil xjal tuj, ex che jawil jlet ke nima tuj tzkij txꞌotxꞌ, tuꞌntzun t-xi nkꞌoꞌne te cycꞌa ke xjal etzan wuꞌne ex scꞌoꞌmaj ke wuꞌne. 21 O nbinchaye ke xjal lu tuꞌn tjaw cynimsaꞌn nbiye tuꞌn cybitz.
22 Atzun cyeye aj Israel tiyjil Jacob, mintiꞌ e cubsane nwitze, nok oꞌcx ma baj cyganiye wiꞌje. 23 Mintiꞌ ẍe cub cybyoꞌne ke ẍneꞌl tuꞌn tcub cypatune tibaj altar te jun oyaj te weye, ex mintiꞌ ẍin jaw cynimsaꞌne cyuꞌn keju chojbil. Mya tuꞌnju in chin kanine oyaj cyeye ma che sicte, ex mintiꞌ ẍin kꞌajte cyiꞌje tuꞌn tcub cypatune storac. 24 Mintiꞌ ma che lakꞌone tiꞌj jun wik ajlaj at tcꞌocꞌjal tuꞌn ttzaj cyiꞌne weye te cyoyaje, ex mintiꞌ tzaj cykꞌoꞌne t-sebyil alumaj weye te jun chojbil tuꞌn ntzalaje tiꞌj. Nokpe ma chin yajlanjtze tuꞌn tlaj ju il in bant cyuꞌne ex ma chin sicte tuꞌnju mya baꞌn in bant cyuꞌne.
25 Pero nok tuꞌnju akine Cydiose ma cub nnajsaꞌne cyile, tuꞌnju ma che icꞌe tibaj nleye, ex mlay tzaj nnaꞌntle. 26 Ka at jun wile tuj cywitze, baꞌn tuꞌn toc cymaꞌne weye, tuꞌn kyolin tiꞌj ex tuꞌn tel nicꞌbaj tiꞌj alcye at til. Cymantze ka jacu che ele twitz ex ka ax toc mintiꞌ cyile. 27 Aju tnejel cyxeꞌchele o binchan il, ex ke xnakꞌtzal cyeye jaw cyiꞌn cyib tuꞌn cykꞌojin wiꞌje. 28 Cyjaꞌtzun cbel nkꞌoꞌne cychꞌixwi ke nejenel in che ajben tuj njaye, ex cxel nkꞌoꞌne ambil tuꞌn cynaj ex tuꞌn cyoc xmayin ke aj Israel, akeju tiyjil Jacob.