5 Ate Kman Dios cub binchante cyaꞌj ex xi tlicꞌuꞌn, a cub binchante twitz txꞌotxꞌ ex tucꞌix ju in tzaj chꞌiy twitz, a in kꞌonte cyankꞌibl ex cyxew ke xjal najl twitz txꞌotxꞌ, ex atzun jlu in tmaꞌn Kman te tmajen: 6 Akine Dios in tzaj txconte teya tuꞌnju tzꞌaklxix kine, ex tzyuꞌn tkꞌaba wuꞌne ex akine cwentil teya; aya cꞌoquel te nxele tuꞌn tcyuwset aju nyole cyjel bant tiꞌj wuꞌne cyucꞌil ke aj Israel, ex tuꞌn toca spicꞌun cye nasyon. 7 Cjaketel cywitz ke moẍ tuꞌna ex cꞌeletz tiꞌna ke xjal tuj pres ex tuj calabós jatum najlke tuj klolj. 8 Akine Cymane porque atzun nbiye, ex mlay wakꞌe ambil tuꞌn tjaw nimsaꞌn tbi juntl ex tuꞌn cyoc ten cꞌulul cywitz ke tilbilal te nxele. 9 Lu ma japun tcyakil tkanil xi nkꞌoꞌne ojtxi ex atzun jaꞌlo cxel nkꞌoꞌne mastl tkanil acꞌaj; in xi nmaꞌne jlu tuꞌntzun tel cynicꞌe tiꞌj naꞌnxtok tbant, chi Dios.

10 Cybitzanxe jun bitz acꞌaj te Kman; cynimsaꞌn jawe tbi max ttxaꞌnpun txꞌotxꞌ; icx cyeye, akeye in che bete tibaj mar ex cyucꞌix ke txcup najl tuj, ax icx ke tnam cycubsaꞌn ttziꞌyile mar cyucꞌix ke xjal najl cyuj. 11 Che tzalajx ke lugar tzkij txꞌotxꞌ cyucꞌix ke tnam ateꞌ tuj, ax icx ke lugar jatum cycubsaꞌn ke tiyjil Cedar. Che bitzan tuꞌn tzalajbil ke xjal najl tuj tnam Sela, e tjaw tkꞌajkꞌajel cywiꞌ cywiꞌ ke witz. 12 Cynimsaꞌn jaw tbi Kman ex cykꞌonx chjonte te max cyuj ke tnam cycubsaꞌn ttziꞌyile mar. 13 Cxel Kman kꞌojlel ic tzaꞌn jun kꞌojlel nim tipun, ex ckꞌojlel tucꞌil nim tkꞌoj ic tzaꞌn jun xjal cyuw tcꞌuꞌj tuj kꞌoj; cjawil tkꞌajkꞌajel twiꞌ, cjawil schꞌin tuꞌn ttzyet kꞌoj ex cbel cyiꞌj ke aj kꞌoj tuꞌn.

14 Chi Kman cyjaꞌ: Ma tzꞌel kꞌij mintiꞌ ma chin kꞌajte ex mintiꞌ jun yol o txi nmaꞌne, atzun jaꞌlo chin jawil schꞌine ic tzaꞌn jun xuꞌj oc nnuꞌl itzꞌj tal, in ayayan ex in xjikꞌban tcꞌuꞌj tuꞌn. 15 Che bajel naj ke nmak witz wuꞌne, ex ke tal witz cbajel tzkij tcyakil cꞌul at twitz wuꞌne, che oquel ke nima wuꞌne te jun tzkij txꞌotxꞌ, ex che bajel tzkij ke najab. 16 Che xel wiꞌne ke moẍ tuj be mintiꞌ ojtzkiꞌn cyuꞌn, che xel nẍakluꞌne tuj ju be naꞌnx cylonte. Cchꞌexpetel klolj wuꞌne tuꞌn toc te spicꞌun cywitz, ex aju txꞌotxꞌ nim tkan xak tuj cꞌoquel te chkꞌajlaj. Cbantel jlu wuꞌne ex mlay tzicꞌx tiꞌj. 17 Akeju nnoꞌc keꞌ cycꞌuꞌj cyiꞌj tilbilal ex in cymaꞌn cye tilbilal cyjaꞌ: Akeye kdiose che chi, che elel ok ex ctzajel cychꞌixwi, chi Dios.

18 Akeye chcyin cywiꞌ, cybintze; akeye moẍ, cyqueꞌyintze tuꞌntzun tcyile. 19 Moẍxix twitz nmajene cywitz cycyakil xjal, ex chcyinxix twiꞌ nsanjele cywitz cycyakil. Moẍxix twitz aju scꞌoꞌmaj wuꞌne cywitz cycyakil, ex moẍxix twitz nmajene cywitz cycyakil. 20 Nnoꞌc tqueꞌyin nim tiꞌxti, pero mintiꞌ nnoꞌc tkꞌoꞌn tcwent tiꞌj; baꞌn bin, pero mintiꞌ chꞌin in tzaj tkꞌoꞌn twiꞌ tiꞌj. 21 O tzalaj Kman tiꞌj tuꞌn toc t-xnakꞌtzbil te maꞌxix toclen ex tbanilxix, tuꞌnju tzꞌaklxix te. 22 Pero ma txi elkꞌaꞌn tcyakilju at cye xjal lu, cycyakil ma che cuꞌx lamoꞌn tuj jul ex ma che ocx lamoꞌn tuj tzeꞌ; ma cheꞌx kꞌiꞌn cyuꞌn xjal ex misicyer jun baꞌn ttzokpinte cye, ma cheꞌx elkꞌaꞌn ex mi aꞌl jun tuꞌn tcolpinte cye.

23 ¿Pero alcye jun cyeye jacu txi nimante jlu? ¿Alcye banin tten tuꞌn t-xi tbiꞌn aju cbajel te tibajxi? 24 ¿Alcye o kꞌonte ambil cye aj Israel akeju tiyjil Jacob, tuꞌn tcub cyiꞌj ex tuꞌn cyxi elkꞌaꞌn? ¿Myapetzun ax toc a Kman o kꞌonte ambil? E binchan il twitz Kman, mintiꞌ cub tuj cywitz tuꞌn cybet tuj be xi yecꞌun cye ex mintiꞌ xi cybiꞌn aju t-xnakꞌtzbil. 25 Cyjaꞌtzun o tzaj tkꞌoj Kman cyiꞌj ex cub tkꞌoꞌn cycastiw tuꞌn jun kꞌoj nimxix wen, ex e ocx kꞌoꞌn mer ic tzaꞌn tuj jun kꞌakꞌ in cꞌant wen, ex mi tuꞌn jlu mintiꞌ el cynicꞌ tiꞌj. Masque nim o che cꞌixbisanjtz tuꞌn kꞌakꞌ, pero mintiꞌ ocx tuj cywiꞌ.