Xi ttziyan Dios tuꞌn cytzokpet ke aj Israel
41
Chi Dios cyjaꞌ: Akeye tnam ttzi mar, che txulecuye nwitze; akeye nasyon tzꞌocx cyipune, cytzaje tuꞌn kyolin tiꞌj ju yol lu; e toc kchmon kib tuꞌn toc yol tiꞌj kuꞌn. 2 ¿Al uꞌn jaw jlet ju rey tuj tjawitz kꞌij, aju cucx in cub cyiꞌj mastl tnam tuꞌn? ¿Alcye in xi kꞌonte cye nasyon tuj tkꞌab tuꞌn tcub cyiꞌj tuꞌn ex tuꞌn cycyaj ten ke mastl rey tjakꞌ tcawbil? In che baj tpaẍuꞌn tuꞌnju t-spad ex in che baj t-sputun ic tzaꞌn ttxa triw tuꞌn t-xobl plech. 3 Nnoꞌc lpeꞌ cyiꞌj ke nasyon tuꞌn tcub cyiꞌj tuꞌn, ex mintiꞌ jun tiꞌxti in tcꞌulbaꞌn cyuj ke be jatum bajx tzꞌocx aj cyuj. 4 ¿Al uꞌn o bant jlu? Al uꞌn baj nacꞌuꞌn tiꞌj alcye tuꞌn tbant cyuꞌn ke tnam tuj junjun tkꞌijlalil atxix t-xe tnejel? Akine Dios aju Cymane, aju baj nacꞌunte tiꞌj tcyakil jlu. Akine t-xe tnejel ex ax kine te bajsbil. 5 Ke tnam cycubsaꞌn ttzi mar o cyil ex o tzaj tchi cyiꞌj; tcyakil ttxaꞌnpun txꞌotxꞌ tzaj luꞌlun. Chꞌix cyul canun ex lu che ul.6 Teyle junjun xjal at tnabl tiꞌj akꞌuntl in baj tonin ju tucꞌil ex in baj tcyuwsaꞌn tnabl. 7 Aju xjal binchal ke tilbilal in tcyuwsaꞌn tnabl ju xjal txꞌinol kꞌan pwak tuꞌn toc cyiꞌj ke tilbilal; aju xjal tzꞌumsal sak pwak tuꞌn martiy in tmaꞌn teju xjal txꞌinol cꞌuxbil: Baꞌn tten tmojbaben cꞌuxbil tuꞌna, chi, ax in baj tcyuwsaꞌn ju tilbilal tuꞌn clav tuꞌntzun miꞌn ticꞌ chꞌuypaj.
8 Cybintze, akeye aj Israel tiyjil Jacob, akeye nmajene scꞌoꞌmaj wuꞌne, akeye tiyjil Abraham aju wamiwoye. 9 A kine in tzaj kꞌinte cyeye max ttxaꞌnpun txꞌotxꞌ, e tzaj ntxcoꞌne max cyuj ke lugar najchak ex xi nmaꞌne cyeye cyjaꞌ: Akeye nmajene. Akine in jaw scꞌon cyeye ex bajx che el wicꞌune. 10 Miꞌn che xobe porque lu kine atine cyucꞌile, miꞌn baj cycꞌuꞌje, akine Cydiose. Cxel nkꞌoꞌne cyipumale ex chin onile cyiꞌje, tzyuꞌn keye wuꞌne tuꞌn nbankꞌabe tuꞌnju tzꞌaklxix kine. 11 Cycyakil keju in tzaj cykꞌoj cyiꞌje, cbel cychꞌixwi ex cnajel cynabl, ex keju in che kꞌojin cyiꞌje, biꞌx che najel te jumajx. 12 Che oquel tene jyol cye aj kꞌoj cyiꞌje ex mlay che cnet cyuꞌne, keju in che kꞌon kꞌoj cyiꞌje che oquel mer ic tzaꞌn mintiꞌ otok che ten. 13 Porque akine Dios aju Cymane, tzyuꞌn keye wuꞌne ex o nmaye cyeye cyjaꞌ: Miꞌn che xobe, chin onile cyiꞌje.
14 In tmaꞌn Kman cyjaꞌ: Akeye aj Israel tiyjil Jacob, masque tal chꞌin keye ex mintiꞌ cyipune, miꞌn che xobe porque chin onile cyiꞌje. A kine Dios Xjan cye aj Israel, akine colpil cyeye. 15 Che oquel nkꞌoꞌne ic tzaꞌn jun macbil aju nneꞌl bajunte tbakꞌ triw acꞌaj ex nimxix twitz teꞌ; cbajel cybajuꞌne ke witz ex che oquel te kuk cyuꞌne ex ke tal witz ic che oquel ic tzaꞌn ttxa triw cyuꞌne. 16 Che jawix cyxoꞌne twitz cyaꞌj ic tzaꞌn triw, che xel kꞌiꞌn tuꞌn cykꞌikꞌ ex che bajel sputun tuꞌn cykꞌikꞌ jbal. Atzun cyeye che tzalajele wiꞌje, akine Dios aju Cymane, ex chin jawil cynimsaꞌne, akine Cydiose Xjan, akeye aj Israel.
17 Ke xjal meba ex mintiꞌ chꞌin at cye in che jyon tiꞌj aꞌ te cycꞌa, pero mintiꞌ in cnet cyuꞌn; puro tzkij tiꞌj cyakꞌ tuꞌn txketleꞌn, pero akine Dios aju Cyman cxel nkꞌoꞌne aju in che jyon tiꞌj. Mlay che cyaj ncoline, akine Cydios aj Israel. 18 Che jawil jlet ke nima wuꞌne cyxol ke witz tzꞌlaꞌj cyiꞌj, ex che jawil jlet ke twi aꞌ tuj cymij chkꞌajlaj; aju tzkij txꞌotxꞌ cꞌoquel te soban wuꞌne, ax icx che jawil jlet ke twi aꞌ wuꞌne tuj tzkij txꞌotxꞌ. 19 Tuj tzkij txꞌotxꞌ che belex wawaꞌne ke wiꞌten, ke chꞌiꞌx tzeꞌ, ke kꞌatxab ex ke tzeꞌ olivo; tuj txꞌotxꞌ jatum mintiꞌ cynajbil xjal che jawil chꞌiy ke tzaj wuꞌne, tucꞌix cꞌol ex ke tzis, 20 tuꞌntzun cyqueꞌyinte cycyakil xjal ex tuꞌn cybinte ex tuꞌn ttzaj cykꞌoꞌn cywiꞌ tiꞌj ex tuꞌn tel cynicꞌ tiꞌj, wuꞌne o bant tcyakil jlu, akine Cydios aj Israel, xjan kine.
In che oc ke tilbilal cydios xjal tuj xjel tuꞌn Dios
21 In tmaꞌn Kman cyjaꞌ, aju cyrey tiyjil Jacob: Cytzaje akeye tilbilal, ex cyyecꞌuntze ka baꞌn che colin cyibe, cytzaje tuꞌn cyclonte cyibe. 22 Cytzaje tuꞌn ttzaj cymaꞌne aju tzul te tibajxi ex tuꞌn ttzaj cytxꞌolbaꞌne aju o baj ojtxi, ex cbel kkꞌoꞌn kwiꞌye tiꞌj; cykꞌontze tkanil keye tiꞌj ju tiꞌxti tzul te tibajxi, tuꞌntzun tel knicꞌe tiꞌj jatum cpol baj. 23 Cymantze keye ti cbajel te tibajxi, cyyecꞌuntze keye ka axix toc dios keye. Cybinchame alcye jacu bant cyuꞌne, ka baꞌn ex ka mya baꞌn, nok tuꞌn ttzaj tchiylal kiꞌje ex tuꞌn kxobe. 24 Pero akeye mintiꞌ chꞌin baꞌn cyuꞌne, ex aju cyakꞌunbene te jumajx mintiꞌ tajben. Icꞌbilxix cywitz keju in che cꞌulun cywitze. 25 Ma jaw nscꞌoꞌne jun xjal tuj txꞌotxꞌ tuj tbankꞌab kꞌij, lu tzul; ex max tuj tjawitz kꞌij ctzajel naꞌn nbiye tuꞌn. In che baj twaban ke cawil ic tzaꞌn in baj wabat bar txꞌotxꞌ, ex ic tzaꞌn in baj xyokꞌin xokꞌl tuꞌn tkan ju binchal xar. 26 ¿Alcye o kꞌonte tkanil tej t-xeꞌt jlu tuꞌntzun kbinteye? ¿Alcye otok tzaj kꞌmante jlu ojtxi tuꞌntzun kkꞌmanteye ka ax toc tyol? Mi jun cyeye o kꞌmante tkanil lu ex mi jun o binte jun cyyole. 27 Akine in kꞌonte tkanil te tnam Sión atxix ojtxi ex xi nsamaꞌne jun nsanjele tuꞌn tpon tuj tnam Jerusalén kꞌolte tkanil baꞌn. 28 Tej t-xi nqueꞌyine, mi jun cyxol ke tilbilal pon tlakꞌban tib; ex mi aꞌl jun baꞌn tuꞌn tkꞌonte jun consej, ex misicyer jun jacu tzaj tzakꞌwente jun nxjele. 29 Cycyakil mintiꞌ chꞌin cyajben ex mintiꞌ jun tiꞌxti jacu bant cyuꞌn; tilbilal ke ex mintiꞌ chꞌin jacu tzꞌel bant cyiꞌj.