Cykꞌukbame cycꞌuꞌj ke xjal etzan ke wuꞌne, cykꞌukbame cycꞌuꞌj, 2 che yoline tuj cꞌujlalil cye ke xjal aj Jerusalén, cymanxe cye: Ma pon baj ju cꞌixbisabl cye tuj akꞌuntl, ma baj chjet cyil ex cabal ma cycꞌam cycastiw wuꞌne tuꞌn tlaj tcyakil cyil.

3 In jaw tkꞌajkꞌajel twiꞌ jun xjal chi cyjaꞌ: Cybinchame jun tbe Kman tuj lugar tzkij txꞌotxꞌ, cyjakome jun be jikun tiꞌj te Kdios tuj lugar mintiꞌ cynajbil xjal tuj. 4 Cynojsaꞌn baje ke tkan xak, cychkꞌajlajin baje ke nmak witz ex ke tal witz, aju txꞌotxꞌ nim tkan xak tuj ex nim witz tuj, cyparejin baje tuꞌn tcyaj ten chkꞌajlaj. 5 Ctzajeltzun tyecꞌun Kman tajwalil ex oc cyilaꞌ cycyakil xjal. Axte Kman ma kꞌmante jlu.

6 At jun tkꞌajkꞌajel wibaj in tmaꞌn: Schꞌinxa; atzun weye xi nkanine te: ¿Alcye yol cxel nschꞌiꞌne? Atzun jlu cxel t-schꞌiꞌna: Cycyakil xjal ic cyten ic tzaꞌn cꞌul, ex junx taꞌ cyoclen ic tzaꞌn t-xmacal cꞌul tuj cojbil nok chꞌin in ten. 7 Ate cꞌul in tzkij ex in tzaj tzꞌak t-xmacal oc in tzaj t-xupin Kman tiꞌj. Ax toc cycyakil xjal ic cyten ic tzaꞌn cꞌul. 8 Ate cꞌul in tzkij ex in tzaj tzꞌak t-xmacal, atzunte tyol Kman Dios cucx ctel te jumajx, chicuya, chi tzaj kꞌmaꞌn weye.

9 Akeye aj Sión, cyjaxe max twiꞌ jun witz maꞌ twaꞌl, cyschꞌinxe cyuw wen tuꞌn t-xi cymaꞌne jun tkanil baꞌn. Miꞌn che xobe tuꞌn tjaw tkꞌajkꞌajel cywiꞌye cyuw, akeye aj Jerusalén cymanxe tkanil cye ke tnam tuj Judá: Lu Cydiose tzul, che chicuye. 10 Ate Kman chꞌix tul tucꞌil tipumal, tuꞌnx tipumal in cyaj ten tcyakil tjakꞌ tcawbil. Ke xjal etzan tuꞌn che ul tiꞌn junx tucꞌil ocxi cycolpet tuꞌn. 11 Tzul ic tzaꞌn jun pastor cwentin ke t-ẍneꞌl tuꞌn, in che jaw tchleꞌn ke tal t-ẍneꞌl tuj tkꞌab, kꞌiꞌn ke tuꞌn ttzi t-xuꞌc ex cwentinxix ke ttxu ẍneꞌl tuꞌn, akeju matok tcublen cyal.

12 ¿Alcye jun jacu bant tmalonte ju mar tuꞌn tlakil tkꞌab? ¿Alcye jun jacu bant t-xcꞌuchbante twitz cyaꞌj tuꞌn tkꞌab? ¿Alcye jun jacu bant tmalonte tuj jun malbil tcyakil tkukil txꞌotxꞌ, ex ka tuꞌn tmalonte tuj balans ke nimak witz ex ke tal witz? 13 ¿Alcye ma txi yecꞌunte te Kman alcye tuꞌn tbant tuꞌn, alcye ma txi kꞌonte tnabl ex alcye ma txi xnakꞌtzante te? 14 ¿Alcye o txi kꞌonte tconsej tuꞌn tel tnicꞌ tiꞌj tcyakil? ¿Alcye o xnakꞌtzante te tuꞌn tcawin tuj tumelxix? ¿Alcye o xnakꞌtzante te tuꞌn tten tojtzkibl? ¿Alcye o txi xnakꞌtzante te tuꞌn tten tnabl? 15 Ic cyten ke nasyon tuj twitz Kman ic tzaꞌn jun txut aꞌ, nneꞌl txutpaj tiꞌj tcubil, ex ic cyten ic tzaꞌn chꞌin tpujil txꞌotxꞌ in cyaj ten tuj balans; ke nasyon ateꞌ ttziꞌyile mar ic cyten ic tzaꞌn jun twitz ttxa tzꞌaꞌn mintiꞌ talil. 16 Tuj tcyakil tiwitz txꞌotxꞌ Líbano mlay che canun ke alumaj tuꞌn t-xi kꞌot jun chojbil te Dios, ex masque at nim tzeꞌ tuj, pero mlay canun tuꞌn tcꞌant kꞌakꞌ tuꞌn tcub patit ju chojbil. 17 Mintiꞌ chꞌin nneꞌl bant cyiꞌj cycyakil nasyon tuj twitz Kman ex misicyer chꞌin cyoclen tuj twitz.

18 ¿Alcye jun jacu che yoline tiꞌj ka ic tten ic tzaꞌn Dios? ¿Alcye jun tilbilal jacu bant cyuꞌne ex tuꞌn cymanteye ka ic queꞌyin ic tzaꞌn tilbilal Dios? 19 Jun xjal at tnabl tuꞌn takꞌnan tuꞌn cybant ke tilbilal tuꞌn, nnoꞌcx tkꞌoꞌn ke cꞌuxbil tuj kꞌakꞌ tuꞌn cycub ulj tuꞌntzun tbant jun tilbilal tiꞌj, ex jun xjal txꞌinol kꞌan pwak in baj tloꞌtzin tiꞌj tilbilal tuꞌn kꞌan pwak, ex in che bant ke caden sak pwak tuꞌn, tuꞌn toc tkꞌoꞌn tiꞌj tilbilal. 20 Aju xjal meba mintiꞌ tumel tuꞌn t-xi tkꞌoꞌn jun oyaj wiꞌyilxix in tzaj tjyoꞌn jun tzeꞌ aju mintiꞌ in pocꞌix, ex in tzaj tjyoꞌn jun calpinter at tnabl tiꞌj tuꞌn tjaw twaban tilbilal ex tuꞌn miꞌn ticꞌ tzꞌak.

21 ¿Baka mintiꞌ biꞌn cyuꞌne alcye Dios? ¿Ex naꞌnxpetzun cybinteye tiꞌj? ¿Mintiꞌpetzun nneꞌl cynicꞌe tiꞌj ju yol lu, aju o kꞌmanjtz atxix tej tbant twitz txꞌotxꞌ? 22 Ate Dios at tkꞌukbil twitz cyaꞌj tibajle txꞌotxꞌ, ex in che tqueꞌyin Dios ke xjal mer ic tzaꞌn ẍplon. In xi tlicꞌun ju cyaꞌj mer ic tzaꞌn jun xbalun xaxj wen ex in xi tlicꞌun mer ic tzaꞌn jun ja lona te tnajbil. 23 Ke xjal maꞌ cyoclen in che oc tkꞌoꞌn te mintiꞌ cyajben, ax icx ke nejenel ateꞌ twitz txꞌotxꞌ biꞌx nneꞌl tiꞌn cyoclen. 24 Ic cyten xjal ic tzaꞌn awal aꞌlaj tkan, tuꞌnju cꞌitzke tcuxlen awet ex ma in xiꞌ tlocꞌ tuj txꞌotxꞌ. Ka ma txi t-xupin Dios cyiꞌj, in che tzkij ex in cheꞌx ikan tuꞌn nintz cykꞌikꞌ mer ic tzaꞌn ttxa triw. 25 Chi Dios cyjaꞌ, aju Dios Xjan: ¿Alcye jun jacu che yoline tiꞌj ka ic tten ic tzaꞌn kine? ¿Alcye jun jacu pon ic tzaꞌn kine? 26 Cyiꞌn jaw cywitze twitz cyaꞌj ex cyqueꞌyinxe: ¿Alcye o binchante tcyakil jlu? Aju oc kꞌonte teyle junjun cheꞌw tuj tlugar ex in che tzaj ttxcoꞌn teyle junjun ic tzaꞌn tbi toc. Mi aꞌl jun nnicꞌ tibaj ju txocbil te, porque at nim tipumal Dios ex in cawin tibaj tcyakil. 27 Akeye aj Israel tiyjil Jacob, ¿tikuꞌn cucx cyyoline mya baꞌn wiꞌje? ¿Tikuꞌn in cymaꞌne cyjaꞌ?: Mintiꞌ nnoꞌc tkꞌoꞌn Kman cwent kiꞌje tzaꞌn ktene, ex mintiꞌ taj Dios kiꞌje, che chiye. 28 ¿Mintiꞌpetzun biꞌn cyuꞌne? ¿Naꞌnxpetzun cybinteye? Ate Kman atzunte Dios, mintiꞌ bajsbil te, ate o binchante tcyakil twitz txꞌotxꞌ, mintiꞌ in cub numj ex mintiꞌ in sict ex mlay tzꞌel knicꞌ tiꞌj tnabl Dios maꞌxix. 29 In tzaj tkꞌoꞌn tipun aju xjal sicni, ex aju mintiꞌ tipun in tzaj tkꞌoꞌn mastl tipun. 30 Ke cuꞌxun jacu che sict ex jacu che cub numj, ax icx keju maxix kꞌiꞌn cyipun, jacu che cub tzꞌak, 31 atzun keju kꞌukl cycꞌuꞌj tiꞌj Kman, cucx ctzajel kꞌoꞌn cyipun, jacu che lipan mer ic tzaꞌn tꞌiw, jacu che ojkelan ex mlay che sict, jacu che bet ex mlay che cub numj.