Ke xjal e tzaj samaꞌn tuj Babilonia e cꞌmet tuꞌn Ezequías
39
Tuj tkꞌijlalil lu tzaj t-samaꞌn Merodac-baladán jun uꞌj ex jun oyaj te Ezequías, tuꞌnju o tbi tej tyabt Ezequías ex otok banix. Toctok Merodac-baladán te rey tuj Babilonia, aju tcyꞌajal Baladán. 2 Atzunte Ezequías jaw tzalaj tej cypon ke sanjel ex xi tyecꞌun ke tkꞌinumabl cye, sak pwak ex kꞌan pwak, cyucꞌix ke perjum ex ju aseyt tbanilxix tucꞌix jatum cꞌuꞌn ke macbil in che ajben tuj kꞌoj ex cycyakil ke ja jatum cꞌuꞌn tkꞌinumabl. Mintiꞌ jun tiꞌxti at tuj tja rey ex tuj enter tcawbil mintiꞌwt xi tyecꞌun cye. 3 Xiꞌtzun Isaías aju t-sanjel Dios tucꞌil rey Ezequías ex xi tkanin te cyjaꞌ:—¿Jatum ẍe tzaj ke xinak lu, ex ti saj cymaꞌn teya?
—Ma che tzaj tuj jun txꞌotxꞌ najchak wen, max ma che tzaj tuj Babilonia, chi Ezequías, xi ttzakꞌweꞌn.
4 Xi tkanintl Isaías te:
—¿Ti ma cyil ke xjal lu tuj tjaya?
Xi ttzakꞌweꞌn Ezequías cyjaꞌ:
—Ma cyil tcyakil aju at tuj njaye. Mintiꞌ jun tiꞌxti jatum cꞌuꞌn ke nkꞌinumable mintiꞌwt ma txi nyecꞌune cye.
5 Xitzun tmaꞌn Isaías te Ezequías cyjaꞌ:
—Bintza aju ma tma Kman aju Tajaw Tcyakil: 6 Tzul kꞌij tuꞌn cyxi kꞌiꞌn cycyakil ke tiꞌxti ateꞌ tuj tjaya ex tcyakilju o baj cychmoꞌn ktzan t-xeꞌchela ojtxi ex aju cucx tchmet jaꞌlo, ex cxel kꞌiꞌn tcyakil jlu tuj Babilonia. Misicyer jun cyjel ten tzalu. 7 Ex cyucꞌix junjun tiyjila che ul itzꞌj te tibajxi che xel kꞌiꞌn tuj Babilonia ex che oquel te aj sanjelal tuj tja rey.
8 Xitzun ttzakꞌweꞌn Ezequías te Isaías:
—Aju tkanil ma tzul tiꞌna, aju ma tzaj tmaꞌn Kman teya, baꞌn te jlu. Ex tmatl: Acux itzꞌx kine ko tel tuj txubtxaj ex segurxix ko tel.