Tzaj tyabil Ezequías ex banix
38
Tuj tkꞌijlalil lu tzaj jun tyabil Ezequías cyuwxix wen, ex pon Isaías aju t-sanjel Dios ex tcyꞌajal Amoz queꞌyilte te, ex xi tmaꞌn te cyjaꞌ:—Chi Kman teya cyjaꞌ: Cawin cyaja keju ateꞌ tuj tjaya, porque cymela. Mlayx banixa.
2 Atzunte Ezequías aj tkꞌoꞌn twitz twitz ja ex oc ten naꞌl Dios cyjaꞌ:
3 —In chin cubsane twitza Nman, naꞌntza, o chin ajbene teya tuj tumelxix ex tuꞌn tcyakil wanmiye, ex o nbinchaye aju in tzalaja tiꞌj, chi Ezequías. Ex jaw okꞌ cyuwxix wen.
4 Tzajtzun tmaꞌn Kman te Isaías cyjaꞌ: 5 Txiꞌya ex kꞌmanxa te Ezequías cyjaꞌ: Ate Kman aju Tdios ktzan t-xeꞌchela David in tmaꞌn teya cyjaꞌ: Ma nbiye tnaꞌj Diosa ex ma wile taꞌl twitza. Cxel nkꞌoꞌntle olaj abkꞌi tankꞌibla. 6 Ccletela wuꞌne, ax icx tnam Jerusalén ccletel wuꞌne tuj tkꞌab rey te Asiria. A kine chin colol tiꞌj tnam lu. 7 Atzun techal jlu cxel nyecꞌune teya, tuꞌn tjapun wuꞌne aju yol xi ntziyane teya: 8 Tuj t-reloj Acaz, aju in marcarinjtz tuꞌn t-xlecumal kꞌij, cꞌajel meltzꞌaj t-xlecumal kꞌij laj grad wuꞌne, akeju otok tzꞌoc t-xlecumal kꞌij cyiꞌj, chicuya te Ezequías, chi Dios te Isaías.
Ex aj meltzꞌaj t-xlecumal kꞌij laj grad.
9 Tej tbanix Ezequías aju rey te Judá, cub ttzꞌiban jun bitz lu:
10 O nmaye cyjaꞌ: Tuj tmij wabkꞌiyile chin cymele tuꞌn npone tuj cynajbil cyimni, mlay japun baj wabkꞌiyile aju banimaj tiꞌj tuꞌn wankꞌine tzalu.
11 Cub nximane cyjaꞌ: Mlayx tzꞌoc nqueꞌyintle Kman twitz txꞌotxꞌ lu, mlay tzꞌoc nqueꞌyintle jun xjal cyxol keju najl twitz txꞌotxꞌ.
12 Ic tten nchwinklale ic tzaꞌn cyja pastor ẍneꞌl, xbalun ja, aju nnicꞌ chꞌexpuꞌn. Ic tten nchwinklale ic tzaꞌn jun xbalun nneꞌl kesin tiꞌj ttxuylal tuj chembilte. Kꞌijtl ex konicꞌan in chin cꞌixbisanjtze tuꞌna.
13 Tuj enter konicꞌan in chin schꞌine tuꞌn taꞌw, mer ic tzaꞌn tuꞌn jun balun in baj tokin ke nbakile. Kꞌijtl ex konicꞌan in chin cꞌixbisanjtze tuꞌna.
14 In chin kꞌajte ic tzaꞌn in che kꞌajt ke xtxꞌaꞌyil, in chin okꞌe ic tzaꞌn ke palom. Ma che sict tbakꞌ nwitze tuꞌnju in chin queꞌyine twitz cyaꞌj. Nman, in chin yajlanjtze, chin tonintza.
15 Pero ¿ti cxel nmaꞌne? Ax Kman ma kꞌmante jlu weye ex ax ma binchante. Cheba chin betele tuj tcyakil wankꞌible, tuꞌnju at nim bis tuj wanmiye.
16 Nman, tiꞌj tcyakil jlu in che ankꞌin xjal, ax icx wanmiye in cnet tankꞌibl tiꞌj tcyakil jlu.
Tuꞌna ma chin banixe ex ma tzaj tkꞌoꞌna juntl maj nchwinklale.
17 Bintza, atintoke tuj bis nej, atzun jaꞌlo atine tuj txubtxaj. Tuꞌna ma clet nchwinklale tuꞌn miꞌn nxiꞌye tuj najen, porque tcyakil wile ma cub tnajsaꞌna.
18 Ke xjal o che cyim ax ateꞌ tuj mukbil, mlayx bant tuꞌn tjaw nimsaꞌna cyuꞌn, mlay jaw nimsaꞌna cyuꞌn ke cyimni; akeju o cheꞌx tuj jul mintiꞌ in keꞌ cycꞌuꞌj tuꞌn cycꞌmonte aju tzaj ttziyana cye.
19 Oꞌcx ke xjal itzꞌx jacu bant tnimsanjtza cyuꞌn, ic tzaꞌn in bant wuꞌne jaꞌlo. In xi cymaꞌn mambaj cye cycꞌwaꞌl ka in japun tuꞌna aju in xi ttziyana cye.
20 Chin cletele tuꞌn Kman. Cyjaꞌtzun cꞌoquel kꞌajtzaꞌn ke chnab arpa ex ko bitzal tuj tja Kman tcyakil kꞌij te kankꞌibl.
21 Xi tmaꞌn Isaías tuꞌn tbinchet chꞌin tkꞌotjil twitz higo, tuꞌntzun toc kꞌot jatum toc tyabil rey Ezequías, ex banixtzun.
22 Otok txi tmaꞌn Ezequías te Isaías: ¿Alcyetzun jun techal ctzajel yecꞌun tuꞌn tel nnicꞌe tiꞌj ka chin xeꞌle juntl maj tuj tja Kman?