—Chi Kman in tmaꞌn: Kꞌmanxa cye keju ateꞌ tuj tjaya alcye tuꞌn tbant cyuꞌn, porque cymela ex mlay banixa tuꞌnju yabil toc tiꞌja.

2 Atzunte Ezequías aj tkꞌoꞌn twitz twitz ja ex oc ten naꞌl Dios cyjaꞌ: 3 In chin cubsane twitza Nman, tuꞌn ttzaj tnaꞌna tzaꞌn tten ma chin ajbene teya tuj tumelxix ex tzꞌaklxix, ex ma nbinchaye aju in tzalaja tiꞌj, chi Ezequías. Ex oc ten okꞌel cyuwxix wen.

4 Ex tej naꞌnxtok teꞌlel Isaías ttxaꞌn peꞌn twitz tja rey, tzaj yolin Kman te ex tma cyjaꞌ: 5 Taj meltzꞌaja ex kꞌmanxa te Ezequías aju nejenel cye tnam xjal etzan wuꞌne cyjaꞌ: Ate Kman, aju Tdios David aju ktzan t-xeꞌchela in tmaꞌn cyjaꞌ: Ma nbiye aju tnaꞌj Diosa ex ma wile taꞌl twitza ma tzꞌetz. Cbantela wuꞌne teju yabil toc tiꞌja, ex tuj toxin kꞌij jaꞌlo jacu txiꞌya tuj njaye. 6 Cꞌankꞌila olaj abkꞌitl wuꞌne. Aya tucꞌix tnam Jerusalén che cletele wuꞌne tuj tkꞌab rey te Asiria. Cꞌoquel ncwentine tnam lu nok tuꞌnju at ncꞌujlalile tiꞌj David aju nmajene, ex tuꞌn tjaw nimsaꞌn nbiye, chi Dios.

7 Xitzun tmaꞌn Isaías tuꞌn tbaj cheꞌt txkan twitz higo; banttzun icju ex oc cykꞌoꞌn tiꞌj rey jatum toc cyakcꞌu, ex banttzun rey. 8 Atzunte Ezequías xi tkanin te Isaías:

—¿Alcyetzun jun techal ctzajel yecꞌun weye tuꞌn tel nnicꞌe tiꞌj ka chin banixele tuꞌn Kman, ex ka tuj ox kꞌij jaꞌlo chin xeꞌle tuj tja?

9 Xi ttzakꞌweꞌn Isaías:

—Atzun jun techal lu ctzajel tyecꞌun Kman teya, tuꞌntzun tel tnicꞌa tiꞌj ka cjapunel aju ma tzaj ttziyan: ¿Tajpeya tuꞌn t-xi lakꞌeꞌ laj grad xlecun te reloj, ex ka tuꞌn taj lakꞌeꞌ laj grad?

10 Xi ttzakꞌweꞌn Ezequías:

—Ka ma txi lakꞌeꞌ laj grad xlecun te reloj, mya cwest te jlu. Aju mas cwest, aju tuꞌn taj lakꞌeꞌ laj grad.

11 Octzun ten Isaías aju t-sanjel Dios cubsal twitz Kman tuꞌn tbant jlu, ex tbinchatzun Kman tuꞌn taj lakꞌeꞌ laj grad xlecun, aju otok marcarinjtz tuꞌn reloj tcub tiꞌj tkan kꞌij, aju otok bant tuꞌn rey Acaz.

12 Tuj tkꞌijlalil lu, o tbi Merodac-baladán aju tcyꞌajal Baladán ex rey te Babilonia ka otok yabt Ezequías, ex e tzaj t-samaꞌn junjun sanjel kꞌolte uꞌj ex oyaj te. 13 E tcꞌamtzun Ezequías ke sanjel ex xi tyecꞌun ke tkꞌinumabl cye; aju sak pwak ex ju kꞌan pwak, cyucꞌix ke perjum, tucꞌix aseyt tbanilxix, tucꞌix jatum cꞌuꞌn ke macbil in che ajben tuj kꞌoj, ex tucꞌix tcyakilju at tuj cꞌubl tkꞌinumabl. Mintiꞌ jun tiꞌxti at tuj tja rey ex tuj enter tcawbil mintiꞌwt xi tyecꞌun.

14 Xiꞌtzun Isaías aju t-sanjel Dios tucꞌil rey Ezequías, ex xi tkanin te:

—¿Jatum ma che tzaj ke xinak lu, ex ti ma cyma teya?

Xi ttzakꞌweꞌn Ezequías:

—Ma che tzaj tuj jun txꞌotxꞌ najchak wen; max ẍe tzaj tuj Babilonia.

15 Xi tkanintl Isaías te:

—Ex ¿ti ma cyil tuj tjaya?

Xi ttzakꞌweꞌn Ezequías:

—Ma cyil tcyakil aju at tuj njaye. Mintiꞌ jun tiꞌxti cyxol ke nkꞌinumable mintiꞌwt ma txi nyecꞌune cye.

16 Xitzun tmaꞌn Isaías te Ezequías:

—Bintza aju ma tma Kman: 17 Cpol tkꞌijlalil che elex kꞌiꞌn cycyakil ke tiꞌxti ateꞌ tuj tjaya, tucꞌix tcyakilju o baj cychmoꞌn ktzan t-xeꞌchela ojtxi, che xeꞌl kꞌiꞌn tuꞌn cypon tuj Babilonia. Misicyer jun tiꞌxti cyjel ten tzalu. 18 Cyucꞌixpe junjun tiyjila che ul itzꞌj te tibajxi che xel kꞌiꞌn tuj Babilonia, ex che oquel kꞌoꞌn te majen tuj tja rey, chi Isaías.

19 Xi tmaꞌn Ezequías te Isaías:

—Aju tkanil ma tzul tiꞌna aju ma tzaj tmaꞌn Kman, baꞌn te jlu, chi, porque cub t-ximan ka mintiꞌ jun tiꞌxti tuꞌn ttzaj tiꞌj, ex ka cucx tuꞌn tten tzalajbil acux itzꞌxtok.

20 Aju chꞌintl txꞌolbaben tiꞌj Ezequías ex cyiꞌj ke tbinchben maꞌxix cyxilen, ex tiꞌj tzaꞌn tten bant tanque te aꞌ tuꞌn, ex tiꞌj tbe aꞌ ocx tlacuꞌn tjakꞌ txꞌotxꞌ tuꞌn tpon aꞌ tuj tnam, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey te Judá. 21 Tejtzun tcyim Ezequías aju o cawin te t-xel, atzun Manasés aju tcyꞌajal.