Tej cyclet aj Judá tuj tkꞌab rey Senaquerib
19
Tejtzun tbinte rey Ezequías jlu, el t-sbitꞌun t-xbalun tiꞌj te jun techal tiꞌj tbis, oc tkꞌoꞌn t-xbalun chꞌiꞌx twitz ex xiꞌ tuj tja Dios. 2 Xi t-samaꞌn Ezequías Eliaquim, aju mayordom tuj tja, tucꞌix Sebna aju aj tzꞌibal, ex cyucꞌix ke pal mas tij xjal ke; cycyakil ke jlu toc cyxbalun chꞌiꞌx twitz te jun techal tiꞌj cybis, e jeꞌx samaꞌn tucꞌil Isaías aju t-sanjel Dios, aju tcyꞌajal Amoz, 3 tuꞌntzun t-xi cymaꞌn te aju yol otok txi tmaꞌn Ezequías cye, ex cyma: Atoꞌ tuj jun tkꞌijlalil xobajil, te castiw, ex ma cub kchꞌixwi; ic kten ic tzaꞌn jun xuꞌj mintiꞌ tipun tuꞌn tul itzꞌj tal. 4 Cuchiwt ma tbi Kman Dios tyol ju xjal maꞌ toclen saj samaꞌn tuꞌn tpatrón aju rey te Asiria, tuꞌn tyolin mya baꞌn tiꞌj ju Dios itzꞌ, ex cuchiwt cub kꞌoꞌn tcastiw tuꞌn tlaj tcyakil yol mya baꞌn ma tma, aju ax Kman Dios ma binte te. Chux naꞌna Dios cyiꞌj keju ateꞌx tuj Jerusalén, chi rey Ezequías, che chicuye te Isaías.5 Ke xjal maꞌ cyoclen ateꞌ ttxlaj rey Ezequías e jeꞌxtzun tucꞌil Isaías; 6 atzunte Isaías tzaj tmaꞌn cye tuꞌn t-xi cymaꞌn te cypatrón cyjaꞌ: Chitzun Kman in tmaꞌn: Miꞌn xoba cyuꞌn ke yol mya baꞌn ma kꞌmanjtz wiꞌje cyuꞌn ke tmajen rey te Asiria. 7 Bintza, oc nbinchaꞌye tuꞌn tbinte jun tkanil mya baꞌn ex tuꞌn jlu ctzajel t-xobil ex cꞌajel meltzꞌaj tuj ttanmi, ex oc nbinchaꞌye tuꞌn tcub byoꞌn tuꞌn spad ma chixin, chi Kman, chi Isaías.
8 O tbi ju xjal maꞌ toclen ttxlaj rey te Asiria, ka otok tzicꞌ rey te Asiria tuj tnam Laquis, ajtzun meltzꞌaj tuꞌn tpon tucꞌil rey, ex o cnet rey tuꞌn in kꞌojintok tiꞌj tnam Libna. 9 Atzun o tbi rey te Asiria ka otok tzꞌetz rey Tirhaca, aju rey te Etiopía, cyucꞌil txkan soldad nim cybet tuꞌn tkꞌojin tiꞌj. Xitzun t-samaꞌn juntl maj rey te Asiria ke t-sanjel tuꞌn cyxiꞌ max tucꞌil rey Ezequías tuj Judá, 10 tuꞌn t-xi cymaꞌn te cyjaꞌ: Miꞌn tzꞌoc keꞌ tcꞌuꞌja tiꞌj Tdiosa, aju in tcyuwsaꞌn teya ka mlay cub tiꞌj Jerusalén wuꞌne; ex miꞌn txi tkꞌon tiba tuꞌn t-sbunjtza tuꞌn. 11 O tbiya aju cybincha ke rey te Asiria cyiꞌj cycyakil tnam o che baj naj cyuꞌn. ¿Yajtzun teya, maj octzun cletela? 12 ¿Opetzun che clet mastl tnam cyuꞌn ke cydios, akeju tnam e baj naj cyuꞌn ke nxeꞌchele, ic tzaꞌn keju tnam Gozán, Harán, Resef, ex ke xjal aj Bet-edén akeju najl tuj lugar Telasar? 13 ¿Jatum ateꞌ ke rey te tnam Hamat, Arfad, Sefarvaim, Hena ex Iva? Chi rey te Asiria.
14 Xitzun tcꞌmoꞌn Ezequías aju uꞌj xi kꞌoꞌn te cyuꞌn ke sanjel ex jaw t-schꞌiꞌn. Tbajlenxi t-schꞌiꞌn, xiꞌ tuj tja Dios, cub tlicꞌbaꞌn ju uꞌj twitz Kman, 15 ex oc ten naꞌl Dios cyjaꞌ: Aya Kman aju Cydios aj Israel tcubsaꞌn tkꞌukbila cyibaj ke querubín; oꞌcx aya Dios in cawina cyibaj cycyakil cawbil at twitz txꞌotxꞌ; aya o binchante cyaꞌj ex txꞌotxꞌ. 16 Aya Kman, kꞌonca cwent tiꞌj ex bintza; queꞌyintza ex bintza tcyakil tyol Senaquerib ma tzul t-samaꞌn wucꞌile in yolin mya baꞌn tiꞌja, aya Dios itzꞌ. 17 Ax toc Kman, e baj naj ke nasyon tucꞌix cytxꞌotxꞌ cyuꞌn ke rey te Asiria, 18 ex ocx cypatun ke cydios xjal tuj kꞌakꞌ, porque axix toc mya dios ke jlu, tzeꞌ ke, ex abj ke, binchamaj cyuꞌn xjal. Cyjaꞌtzun e baj naj cyuꞌn. 19 Jaꞌlotzun Kman, aya Kdiose, ko tcloma tuj tkꞌab, tuꞌntzun tel cynicꞌ cycyakil ke nasyon twitz txꞌotxꞌ tiꞌja, ka aya Kmane, ex oꞌcxcu aya jun Dios, chi Ezequías tma tuj tnaꞌj Dios.
20 Xitzun t-samaꞌn Isaías tkanil te Ezequías cyjaꞌ: Atzun yol jlu ma tma Kman aju Cydios aj Israel: Ma nbiye aju tnaꞌj Diosa tiꞌj Senaquerib aju rey te Asiria.
21 Atzun yol jlu ma tma Kman tiꞌj rey te Asiria:
Aju tnam Sión ic tten ic tzaꞌn jun tal kꞌapoj in tzeꞌn tiꞌja, aya Senaquerib. Ke aj Jerusalén cxel cyyucun cywiꞌ te xmaybil oc tel oka.
22 ¿Alcye ma tzꞌoc ticꞌleꞌna ex ma yolina mya baꞌn tiꞌj? ¿Al iꞌj xjaw tkꞌajkꞌajel twiꞌya cyuw? ex ¿al iꞌj ma jaw tqueꞌyin twitza te nimbil tiba? Tiꞌj Dios xjan cye aj Israel ma tbinchaya jlu.
23 Tzaj t-samaꞌna ke t-sanjela tuꞌn cyyolin mya baꞌn tiꞌj Dios. Chiya ma tmaya: Cyucꞌil nim cyajlal ncarwaje in che ajben tuj kꞌoj in jaxe tuj tiwitz txꞌotxꞌ cywiꞌ ke witz, ex in exe cyjakꞌ ke tzeꞌ cwest tuꞌn kex cyxol twi witz Líbano. E jaw ntxꞌemine ke tzeꞌ wiꞌten mas matij cywaꞌl, cyucꞌix ke tzaj tbanilxix. In japune max cywiꞌ ke nmak witz tuj tiwitz txꞌotxꞌ, ex in pone tjakꞌ txkan tzeꞌ pin t-xak.
24 Cyuj ke txꞌotxꞌ miꞌn ojtzkiꞌn wuꞌne cuꞌx nlacuꞌne jul tuꞌn tcnet aꞌ ex in cꞌane cyiꞌj ke aꞌ lu. Cycyakil ke nima tuj Ejipt e baj tzkij tjakꞌ nkane, chitzuna.
25 ¿Naꞌnxpetzun tel tnicꞌa tiꞌj ka akine Dios, ex akine in binchante tcyakil jlu? Atxix tuj tkꞌijlalil ojtxi o baj nnacꞌuꞌne tiꞌj, ex matzun in binchet wuꞌne jaꞌlo; cyjaꞌtzun in che cub t-xituna ke tnam toc muro cyiꞌj ex nok ttxꞌakan in che cyaj ten tuj byujin tuꞌna.
26 Ke xjal najlke cyuj mintiꞌ cyipun, tzaj nim cyxobil ex cychꞌixwi, ic e oc ic tzaꞌn cꞌul tuj cojbil, ex ic tzaꞌn chaꞌx cꞌul, ex e oc ic tzaꞌn cꞌul in tzaj chꞌiy tibaj xcꞌoꞌn twi ja, in naj tuꞌn taꞌw cyak naꞌnxtok tchꞌiy.
27 Baꞌn wuꞌne tcyakilju in bant tuꞌna ex tcyakilju taja tuꞌn tbant, ex baꞌntl wuꞌne ma tzaj tkꞌoja wiꞌje.
28 Tuꞌnju ma wile aju tkꞌoja ma tzaj ex ju tnimbil tiba, jaꞌlo cꞌoquel nkꞌoꞌne jun argoy twi ttxaꞌna, tucꞌix jun pren cꞌoquex nkꞌoꞌne tuj ttziꞌya, ex tuꞌntzun jlu cꞌajel meltzꞌaja wuꞌne tuj tbeya jatum otok tzaja, chi Dios.
29 Ax icx xi tmaꞌn Isaías te Ezequías:
Atzun jun techal jlu tiꞌj ju cbajel: Tuj abkꞌi lu ex tuj juntl, che waꞌle tiꞌj triw aju tuꞌnx cjawil pokꞌl, tujtzun toxin abkꞌi che awale ex cjawil cychmoꞌne twitz, che awale uva ex che loꞌle tiꞌj twitz.
30 Ke xjal aj Judá, akeju che cyjel ankꞌin, ic che oquel ic tzaꞌn awal: cxeꞌl cylocꞌ ex cꞌoquel cywitz.
31 Porque il tiꞌj che cyjel ten junjun xjal tuj Jerusalén; ax icx twi witz Sión che cyjel ankꞌin junjuntl. A jlu oc tbinchaꞌ Kman aju Tajaw Tcyakil tuꞌnju at nimxix tcꞌujlalil cyiꞌj.
32 Atzun tiꞌj rey te Asiria ma tma Kman cyjaꞌ:
Mlay tzꞌocx tuj Jerusalén, mlay txi t-xoꞌn jun plech tuꞌn xobl, mlay tzꞌoc tzokpaj tuꞌn tkꞌojin tucꞌil makbil in ajben tuꞌn tuj kꞌoj, ex mlay jaw tchꞌukin txꞌotxꞌ tiꞌjele muro tuꞌn tocx tuj tnam.
33 Tujx be jatum otok tzaj, ax cꞌajel meltzꞌaj juntl maj; mlay tzꞌoctz tuj tnam lu. Akine Dios in chin kꞌmante jlu.
34 Akine chin colol tiꞌj tnam lu ex ccletel wuꞌne nok tuꞌn tlaj ju yol xi ntziyane te nmajene David, ex tuꞌn tjaw nimsaꞌn nbiye, chi Dios.
35 Tujx konicꞌan lu, pon jun t-anjel Kman tuj cycampament ke t-soldad rey te Asiria, ex e cub tbyoꞌn jun syent tucꞌil 85 mil xjal, ex cycyakil ke jlu cyimnike tej tjawil kꞌij. 36 Atzunte Senaquerib aju rey te Asiria cub be tuꞌn, ex aj meltzꞌaj tuꞌn tpon tuj tnam Nínive. 37 At jun kꞌij tej matok in cꞌulun Senaquerib tuj tja tdios Nisroc tbi, pon Adramelec tucꞌix Sarezer akeju tcyꞌajal, ex cub cybyoꞌn tuꞌn spad, ex atzun e pon ok t-xe witz Ararat. Te tibajxi jlu aju cyaj ten te rey te t-xel Senaquerib, atzun Esarhadón aju tcyꞌajalx.