5 Oc keꞌxix tcꞌuꞌj Ezequías tiꞌj Kman aju Cydios aj Israel. Cyxol cycyakil ke rey te Judá, mintiꞌ jun o pon ic tzaꞌn te Ezequías, mi tej naꞌnxtok toc te rey ex mi te tibajxi. 6 Oc lpeꞌxix tiꞌj Kman ex mintiꞌ el tpaꞌn tib tiꞌj, nok oꞌcx e japun ke tmandamyent tuꞌn, akeju e tzaj tkꞌoꞌn Kman te Moisés. 7 Cyjaꞌtzun o ten Kman tucꞌil, ex tcyakil aju in tbinchaꞌntok puro baꞌn eꞌla te te.

Jaw tiꞌn tib Ezequías tiꞌj rey te Asiria ex mintiꞌ ocx tkꞌon tib tjakꞌ tcawbil. 8 Ax icx cub cyiꞌj aj Filistey tuꞌn; pon tuj tnam Gaza ex pon baj max tuj tcyakil tmojonil, tzajx jatum ateꞌ ke ja maꞌ cywaꞌl, jatum in che ocx ten ke soldad xkꞌukil tnam, ex pon baj max jatum ateꞌ ke tnam toc muro cyiꞌj.

9 Tej otok bant cyaje abkꞌi ttzyetlen tcawin Ezequías tuj Judá, ex tuj twukin abkꞌi ttzyetlen tcawin Oseas aju tcyꞌajal Ela cyibaj aj Israel, ul Salmanasar aju rey te Asiria, baj cytxolban cyib ke t-soldad tiꞌjele tnam Samaria ex e oc tzokpaj tiꞌj. 10 Tuj toxin abkꞌi cub tiꞌj tuꞌn. Atzun tkakin abkꞌi toclen Ezequías te rey tuj Judá, ex ya otok bant belaj abkꞌi toclen Oseas te rey cye aj Israel, tej tcub tiꞌj tnam Samaria cyuꞌn aj Asiria. 11 Aju rey cye aj Asiria e jeꞌx tiꞌn ke aj Israel tuꞌn cypon tuj tnam Asiria, ex e cub tkꞌoꞌn jun cꞌloj tuj tnam Halah, ex juntl cꞌloj nikayin ttzi nima Habor tuj txꞌotxꞌ Gozán, atzun juntl cꞌloj e cub tkꞌoꞌn cyuj ke tnam cye aj Media. 12 O baj jlu icju, tuꞌnju mintiꞌ e niman te Kman aju Cydios, nok oꞌcx e icꞌ tibaj ju yol cyaj bant tiꞌj tuꞌn cyucꞌil, ex mintiꞌ xi cybiꞌn tcyakilju o tma Moisés cye aju tmajen Kman, ex mintiꞌ e ximan tiꞌj tuꞌn tjapun cyuꞌn.

13 Tuj tcyajlajin abkꞌi toclen Ezequías te rey tuj Judá, oc tzokpaj Senaquerib aju rey te Asiria cyiꞌj cycyakil tnam toc muro cyiꞌj tuj Judá, ex cub cyiꞌj tuꞌn. 14 Xitzun t-samaꞌn Ezequías jun t-sanjel tucꞌil rey cye aj Asiria, porque atzun taꞌtok tuj tnam Laquis, ex atzun yol lu tuꞌn t-xi tmaꞌn t-sanjel: Ma bant jun mya baꞌn wuꞌne. Texa tuj ntanmiye ex jacu txi nchjoꞌne tcyakil aju ctzajel tkanina weye, chi t-sanjel.

Atzunte rey te Asiria xi tkanin te Ezequías aju rey te Judá, tuꞌn ttzaj tkꞌoꞌn cab syent quintal sak pwak te ex winkin quintal kꞌan pwak. 15 Tuꞌntzun jlu xi tkꞌoꞌn Ezequías tcyakil sak pwak te, aju tocx tuj tja Kman, tucꞌix kꞌinumabl tocx tuj tja rey. 16 Tujx tkꞌijlalil lu el tiꞌn Ezequías kꞌan pwak tiꞌj tlamel tja Kman ex cyiꞌj ke tmarquil, aju tuꞌnx otok tzꞌoc tloꞌtzin, ex xi tkꞌoꞌn te rey cye aj Asiria.

17 Te tibajxi jlu, e jeꞌx t-samaꞌn rey cye aj Asiria ox xjal maꞌ cyoclen ex nejenel ke cye soldad, cyucꞌix nimcu soldad, tuꞌn cypon tucꞌil rey Ezequías. Cubtzun be cyuꞌn tuj tnam Laquis tuꞌn cypon tuj Jerusalén, ex tuꞌn cyoc tzokpaj tiꞌj. Tejtzun cypon tuj Jerusalén e cub ten ttxlaj tbeyil aꞌ in pon tuj chembil te, tjax te jawni, ttzi be nneꞌx tuj tcojbil Txꞌjol tiꞌj Xbalun. 18 Txquettzun rey cyuꞌn, ex atzun ke jlu e etz tuꞌn cyyolin cyucꞌil ke aj Asiria: Eliaquim, aju mayordom tuj tja rey, aju tcyꞌajal Hilcías, tucꞌix Sebna, aju aj tzꞌibal te rey, ex tucꞌix Joa, aju tcyꞌajal Asaf, aju mas maꞌ toclen toc ttxlaj rey. 19 Aju xjal maꞌ toclen ttxlaj rey te Asiria tzaj tmaꞌn cye:

—Cykꞌmanxe te Ezequías aju tkanil lu, aju ma tzaj tmaꞌn nintz rey, aju rey cye aj Asiria: ¿Al iꞌj nnoꞌc keꞌ tcꞌuꞌja? 20 Chitzuna in tmaꞌna: At nnable ex at wipune tuꞌn nkꞌojine, chiya, pero nok tuꞌn ttziꞌya in tmaꞌna jlu. ¿Al iꞌj ma tzꞌoc keꞌ tcꞌuꞌja tuꞌnju ma jaw tiꞌn tiba tuꞌn tkꞌojina wiꞌje? 21 Tuj nwitze a nnoꞌc keꞌ tcꞌuꞌja tiꞌj onbil tuꞌn Ejipt. Pero aju tnam Ejipt ic tten ic tzaꞌn jun ajlaj toknaj, ex oc ttzaj ktzyuꞌn tuꞌn tajben te kcyꞌakoꞌch, ka ma txi kkꞌoꞌn kalil tibaj in cub tokj, ex in xi tzꞌupl tuj kkꞌab. Ictzun tten Faraón aju rey te Ejipt cye cycyakil xjal nnoꞌc keꞌ cycꞌuꞌj tiꞌj. 22 Ex ka ma cymaye weye: Keye, atzun kꞌukl kcꞌuꞌje tiꞌj Kmane aju Kdiose, ka che chiye, pero, ¿myapetzun o che baj tkꞌuchin Ezequías ke lugar te cꞌulbil cyucꞌix ke altar teju Dios lu, ex o tma cye aj Judá ex cye aj Jerusalén tuꞌn cycꞌulun oꞌcx twitz altar tuj Jerusalén? 23 Cybinchame tiꞌj jun cyyole tucꞌil npatrone aju rey te Asiria: Jacu txi nkꞌoꞌne cabe mil chej teya, ka jacu che cnet xjal tuꞌna tuꞌn cychejin cyibaj. 24 Balpelo mlay tzꞌel ok jun nejenel cye soldad cye aj Asiria tuꞌna, aju mas chꞌin toclen, ¿ex che cnetelpetzun ke chej tuj Ejipt tuꞌna, cyucꞌix ke xjal baꞌn che chejin? 25 ¿Ex chipetzuna ka nok tuꞌn wexe wajbile ma chin tzaje tzalu tuꞌn woc tzokpaje tiꞌj tnam lu tuꞌn tcub nxitune, ex ka mintiꞌ ma txi nkanine te Kman? Ate Kman ma tzaj kꞌmante weye tuꞌn woc tzokpaje tiꞌj tnam lu ex tuꞌn tcub nxitune tnam, chitzun nintz rey, chi xjal.

26 Xitzun cytzakꞌweꞌn Eliaquim, Sebna ex Joa te xjal maꞌ toclen ttxlaj rey te Asiria:

—Binchama xtalbil, yolina kucꞌile tuj yol Aramey, porque atzunju nneꞌl knicꞌe tiꞌj. Miꞌn tzaj yolina kucꞌile tuj yol Hebrey, porque cycyakil xjal cyjax twi muro in che bin tiꞌj.

27 Atzunte xjal maꞌ toclen ttxlaj rey te Asiria xi tmaꞌn:

—Baka tucꞌil cypatrone, ex baka cyucꞌile ẍin tzaj samaꞌne kꞌmalte jlu tuꞌn rey cye aj Asiria; cyelpe cye xjal, akeju ateꞌjx twi muro, porque ake jlu icx che telba ic tzaꞌnx che telba cyeye, cxel cywaꞌn cytxaꞌ ex cxel cycꞌaꞌn cytzꞌaꞌl.

28 Cubtzun weꞌ ju xjal maꞌ toclen, ex jaw tkꞌajkꞌajel twiꞌ cyuw wen tuj yol Hebrey ex tma:

—Cybintze aju in tmaꞌn nintz rey, aju rey te Asiria: 29 Miꞌn txi cykꞌon cyibe tuꞌn cycub sbuꞌne tuꞌn Ezequías; mlay che clete tuꞌn tuj nkꞌabe. 30 Ka taj Ezequías tuꞌn tcub tiꞌj cynable tuꞌn, ex ka ma tma cyeye tuꞌn toc keꞌ cycꞌuꞌje tiꞌj Cydiose, ex ka chi: Ax toc ate Kman Dios ccolol kiꞌj ex mlay takꞌ ambil tuꞌn tcub tiꞌj tnam lu tuꞌn tipumal rey te Asiria, ka chi, 31 miꞌn txi cybiꞌne tyol. Ma chin tzaj lajoꞌne tuꞌn rey te Asiria kꞌmalte cyeye tuꞌn miꞌn ttentl kꞌoj kxol, ex tuꞌn taj cykꞌon cyibe tucꞌil, ex teyle junjun cyeye jacu nicꞌben tiꞌj twitz t-uva ex tiꞌj twitz t-higo, ex jacu cꞌan aꞌ tujx tex t-xoch. 32 Te tibajxitzun che xel kꞌiꞌne tuꞌn tuj jun tnam ic tzaꞌnx ju cytanmiye, aju tnam lu at triw tuj ex at tkan uva, jacu cnet pan te cywaye ex taꞌl twitz uva te cycꞌaye, ex tuj tnam lu at aseyt nneꞌl tiꞌj twitz tzeꞌ olivo, ex at taꞌl cab. Jacu che ankꞌine baꞌn, ex mlay che cyime, pero miꞌn txi cybiꞌne tyol Ezequías, porque in che cub sbuꞌne tuꞌn oc in tmaꞌn cyeye ka che cletele tuꞌn Cydiose. 33 Baka o che clet txkantl tnam cyuꞌn ke cydios tuj tkꞌab rey te Asiria. 34 ¿Jatum ateꞌ ke dios te tnam Hamat jaꞌlo, ex ke dios te tnam Arfad? ex ¿jatum ateꞌ ke dios te tnam Sefarvaim, ke dios te tnam Hena, ex ke dios te tnam Iva? ¿Opetzun clet tnam Samaria cyuꞌn tuj tkꞌab rey te Asiria? 35 ¿Alcyetzun cyxol cycyakil ke dios cye tnam lu ma che clet ke tnam cyuꞌn tuj tkꞌab rey te Asiria? ¿Tzaꞌntzun tten in cub cyximane ka jacu clet tnam Jerusalén tuꞌn Cydiose? Chi xjal maꞌ toclen, baj tmaꞌn.

36 Ke xjal mintiꞌ e kꞌajt, ex mi jun yol xi cytzakꞌweꞌn, tuꞌnju otok txi kꞌmaꞌn cye tuꞌn rey Ezequías tuꞌn miꞌn t-xi cytzakꞌweꞌn jun yol. 37 Tzajtzun tbis Eliaquim aju mayordom tuj tja rey, tucꞌix Sebna aju aj tzꞌibal te rey, ex tucꞌix Joa aju xjal maꞌ toclen toc ttxlaj rey, el cysbitꞌun cyxbalun cyiꞌj ex e jeꞌx kꞌmalte te Ezequías tcyakil yol otok tma xjal maꞌ toclen ttxlaj rey te Asiria.