Tej tcub tiꞌj tnam Samaria ex tej cyxi kꞌiꞌn aj Israel pres
17
Otok bant cablaj abkꞌi ttzyetlen tcawin Acaz aju rey te Judá, tej ttzyet tcawin Oseas aju tcyꞌajal Ela cyibaj aj Israel, ex o cawin belaj abkꞌi tuj Samaria. 2 Pero mya baꞌn e ela ke tbinchben tuj twitz Kman, masque mya icx ic tzaꞌn cybinchben ke rey cye aj Israel, akeju otok che ten nej.3 Ate Salmanasar aju rey te Asiria oc tzokpaj tiꞌj Oseas, cyajtzun ten Oseas tjakꞌ tcawbil ex chjet chojenj tuꞌn. 4 Pero o tbi Salmanasar ka ate Oseas otok cub t-ximan tuꞌn tjaw tiꞌn tib tiꞌj, ex otok cheꞌx t-samaꞌn junjun xjal at cyoclen ttxlaj tucꞌil So aju rey te Ejipt, ex mintiꞌtl in chjet chojenj tuꞌn aju in chjet tuj abkꞌi. Xitzun tkꞌoꞌn Salmanasar orden tuꞌn ttzaj tzyuꞌn Oseas ex tuꞌn tocx kꞌoꞌn pres. 5 Ocxtzun Salmanasar tuj cytxꞌotxꞌ aj Israel ex oc tzokpaj tiꞌj tnam Samaria, ex ox abkꞌi o kꞌojin tiꞌj. 6 Tuj tbelajin abkꞌi ttzyetlen tcawin Oseas, tzyet tnam Samaria tuꞌn rey te Asiria, ex e jeꞌx tiꞌn ke aj Israel pres tuꞌn cypon tuj Asiria. Atzun e cub tkꞌoꞌn tuj tnam Halah ttzi nima Habor aju at tuj tcwent Gozán, ex cyuj ke tnam cye aj Media.
7 Bant jlu icju, tuꞌnju otok che binchan aj Israel il twitz Kman aju Cydios, aju otok tzꞌetz kꞌinte cye tuj Ejipt ex otok clonte cye tjakꞌ tcawbil Faraón aju rey te Ejipt, ex tuꞌnju e cꞌulun cywitz ke tilbilal cydios xjal, 8 ex e jeꞌx lpeꞌ tiꞌj cybinchben ke nasyon, akeju otok che ex lajoꞌn cywitz tuꞌn Kman, ex o cybincha mya baꞌn ic tzaꞌn otok cybincha ke rey cye aj Israel.
9 Ax icx tuj ewaj o cybincha aj Israel mya baꞌn twitz Kman aju Cydios, ex jaw cybinchaꞌn ke ja te cꞌulbil cye ke tilbilal cyuj cycyakil cytanmi ex cyuj ke ja maꞌ cywaꞌl in che ajben te xkꞌukbil, ax icx cyuj ke tnam toc muro cyiꞌj. 10 Ax icx cub cywaban ke tilbilal cydios, akeju tilbilal cydios abj ke ex ke tilbilal xuꞌj dios Asera, cywiꞌ junjun tal witz ex cyjakꞌ cycyakil tzeꞌ pin cyxak, 11 cub cypatun storac cywi witz cyuj ke ja te cꞌulbil cye tilbilal, ex cybincha mya baꞌn ic tzaꞌnx in cybinchaꞌn ke nasyon akeju otok che ex lajoꞌn cywitz tuꞌn Kman. Tuꞌntzun jlu tzaj tkꞌoj Kman cyiꞌj. 12 E cꞌulun cywitz ke tilbilal akeju otok tma Kman cye tuꞌn miꞌn cycꞌulun twitz.
13 Cycyakil t-sanjel Dios ex ke xjal baꞌn che nabin tuꞌn Dios otok che ajben tuꞌn Kman tuꞌn t-xi cymaꞌn cye aj Israel tuꞌn tajtz tiꞌj cyanmi, tuꞌn tchꞌexpet cymod, ex tuꞌn cyjapun ke tmandamyent Kman cyuꞌn, cyucꞌix ke tley ex ke t-xnakꞌtzbil, akeju otok tzaj tmaꞌn Kman cye cyxeꞌchel cyuꞌn ke tmajen ex ke t-sanjel. 14 Atzun cye mintiꞌ xi cybiꞌn, nok oꞌcx e oc puro cyuw cywiꞌ, ic tzaꞌnx ke cyxeꞌchel akeju mintiꞌ oc keꞌ cycꞌuꞌj tiꞌj Kman aju Cydios. 15 El cyicꞌun ke tley Dios, tucꞌix ju yol otok cyaj bant tiꞌj tuꞌn cyucꞌil cyxeꞌchel, ex cyucꞌix ke mandamyent otok tzaj kꞌoꞌn cye. Ax icx e oc lpeꞌ cyiꞌj cydios xjal mintiꞌ cyajben, ex tuꞌn jlu e oc te mintiꞌ cyajben, ex e oc lpeꞌ tiꞌj cybinchben ke nasyon ateꞌ cyiꞌjele, aju otok tma Kman tuꞌn miꞌn cybinchante. 16 Cyaj cykꞌoꞌn cycyakil ke tmandamyent Kman aju Cydios, ex cub cybinchaꞌn cabe tilbilal tal tor kꞌan pwak cytxꞌotxꞌil nnoꞌcx cykꞌoꞌn tuj kꞌakꞌ tuꞌn tcub ulj, ex tucꞌix tilbilal xuꞌj dios Asera; ax icx e cꞌulun cywitz cycyakil cheꞌw ateꞌ twitz cyaꞌj, ex twitz tilbilal Baal. 17 Ax icx cub cypatun ke cycyꞌajal ex ke cymeꞌjel cywitz ke tilbilal cydios, baj cyxnakꞌtzan cyib tuꞌn tbant cykꞌijin ex tuꞌn tbant mañ cyuꞌn, ex xi cykꞌon cyib tuꞌn cybinchante aju mya baꞌn tuj twitz Kman; ex tuꞌn jlu tzaj tkꞌoj Kman cyiꞌj.
18 Cyjaꞌtzun tzaj ttxꞌuꞌjil Kman cyiꞌj aj Israel, ex e ex tlajoꞌn tuꞌn miꞌn cytentl twitz, oꞌcxtzun ke tiyjil Judá e cyaj ten, 19 pero ax icx ke aj Judá mintiꞌ e japun ke tmandamyent Kman cyuꞌn, aju Cydios, nok oꞌcx e oc lpeꞌ tiꞌj aju otok cybincha ke aj Israel. 20 E eltzun ticꞌun Kman cycyakil cyiyjil aj Israel ex cub tkꞌoꞌn cycastiw, e jeꞌx tkꞌoꞌn tuj cykꞌab keju e oc tzokpaj cyiꞌj tejxi cyex tlajoꞌn tuꞌn miꞌn cytentl twitz. 21 E el tpaꞌn Kman ke aj Israel cyiꞌj ke tiyjil David, atzun cye aj Israel oc cykꞌoꞌn Jeroboam te cyrey, aju tcyꞌajal Nabat, aju el paꞌnte cye aj Israel tiꞌj Kman ex maꞌxix il cybincha. 22 Cyjaꞌtzun, ax il cybincha aj Israel ic tzaꞌnx otok tbincha Jeroboam, ex mintiꞌ xi cycolin tuꞌn cybinchan il. 23 E ex tlajoꞌn Kman ke aj Israel tuꞌn miꞌn cucx cytentl twitz, ic tzaꞌnx otok tma Kman cye cycyakil t-sanjel akeju tmajen, ex cyjaꞌtzun e jeꞌx kꞌiꞌn ke aj Israel pres tuj Asiria, ex axtzun ateꞌ jaꞌlo.
E pon kꞌiꞌn junxitl cꞌloj xjal tuꞌn cynajan tuj Samaria
24 Tzaj tiꞌn rey te Asiria ke xjal aj Babilonia, aj Cuta, aj Ava, aj Hamat ex aj Sefarvaim, ex e ocx tkꞌoꞌn tuꞌn cynajan cyuj ke tnam ateꞌ tuj txꞌotxꞌ Samaria, te cyxel ke aj Israel. Cyjaꞌtzun tten e oc te tajwil tnam Samaria cyucꞌix mastl tnam ateꞌ tiꞌjele. 25 Pero akeju xjal lu mintiꞌ in che cꞌulun twitz Kman; cyjaꞌtzun, tej ttzyet cynajan cyuj tnam, e tzaj t-samaꞌn Kman ke balun cyxol, ex at junjun cye e cub byoꞌn cyuꞌn. 26 Cyjaꞌtzun e jeꞌx kꞌmalte te rey te Asiria: Akeju xjal ma che pon tkꞌoꞌna tuj Samaria tuꞌn cynajan ma chixin, mintiꞌ baꞌn cyuꞌn alcye tumel tuꞌn cycꞌulun twitz cydios ke xjal te txꞌotxꞌ lu, ex tuꞌnju mintiꞌ baꞌn cyuꞌn, ma che tzaj t-samaꞌn Dios ke balun, ex niban cycub byoꞌn ke xjal cyuꞌn.
27 Cyjaꞌtzun xi tkꞌoꞌn rey te Asiria ju orden lu: Cysamanxe jun pal cyxol keju e tzaj cypresine, tuꞌntzun tnajan ma chixin ex tuꞌn t-xi t-xnakꞌtzaꞌn cye xjal alcye tumel tuꞌn cycꞌulun twitz cydios xjal, akeju e ten tuj txꞌotxꞌ nej.
28 Xiꞌtzun jun cye ke pal, akeju otok che tzaj kꞌiꞌn pres tuj Samaria, ex atzun o najan tuj Betel, ex xi t-xnakꞌtzaꞌn cye xjal tzaꞌn tten tuꞌn cycꞌulun te Kman. 29 Pero teyle junjun cꞌloj xjal cub tbinchaꞌn tex tdios tuj tnam jatum e najan, ex ocx cykꞌoꞌn cyuj ke ja in che ajbentok te cycꞌulbil xjal cywiꞌ ke witz, akeju otok jaw cybinchaꞌn ke aj Samaria nej. 30 Ke xjal aj Babilonia cub cybinchaꞌn jun tilbilal cydios Sucot-benot tbi, ke aj Cuta cub cybinchaꞌn jun tilbilal cydios Nergal tbi, ex ke aj Hamat cub cybinchaꞌn jun tilbilal cydios Asima tbi, 31 ke aj Ava cub cybinchaꞌn jun tilbilal cydios Nibhas tbi ex jun tilbilal cydios Tartac tbi, ex ke aj Sefarvaim ocx cypatun ke cycꞌwaꞌl tuj kꞌakꞌ te jun chojbil twitz tilbilal cydios Adramelec tbi, ex twitz juntl cydios Anamelec tbi. 32 Ax icx e cꞌulun twitz Kman, pero ax cyxolx oc cykꞌoꞌn cyoclen ke pal tuꞌn cyajben cyuj ke ja te cycꞌulbil xjal cywiꞌ ke witz. 33 Cyjaꞌtzun, masque o che cꞌulun twitz Kman, pero cucx e cꞌulun cywitz keju cyex cydios, ic tzaꞌnx in cybinchaꞌn ke nasyon jatum ateꞌtok nej.
34 Icx jaꞌlo cucx in cybinchaꞌn ic tzaꞌnx nej, porque mya tuꞌn tcyakil cyanmi in che cꞌulun twitz Kman, ex mintiꞌ in cybinchaꞌn ic tzaꞌnx in cymaꞌn ke tley ex ke orden tuꞌn, ex mintiꞌ in cybinchaꞌn ic tzaꞌnx ke xnakꞌtzbil ex ke mandamyent aju tzaj tmaꞌn Kman tuꞌn tjapun cyuꞌn ke tiyjil Jacob, aju oc tkꞌoꞌn tbi Israel. 35 Tej tbant tiꞌj jun yol tuꞌn Kman cyucꞌil, xi tmaꞌn cye cyjaꞌ: Miꞌn che cꞌulune cywitz junxitl dios, miꞌn che cub ẍmejeye cywitz, miꞌn che ajbene cye ex miꞌn cub cypatune ke chojbil cywitz. 36 Che cꞌulune nwitze, akine Cymane ex Cydiose, akine in etz kꞌinte cyeye tuj Ejipt tucꞌil nimxix wipumale. Oꞌcx nwitze baꞌn tuꞌn cycꞌulune, oꞌcx nwitze baꞌn tuꞌn cycub ẍmejeꞌye ex oꞌcx nwitze baꞌn tuꞌn tcub cypatune ke chojbil. 37 Ax icx che japunx ke ley cyuꞌne, cyucꞌix ke orden, ke xnakꞌtzbil ex ke mandamyent akeju e jeꞌx ntzꞌibane cyeye, ex miꞌn che cꞌulune cywitz junxitl dios. 38 Miꞌn tzicꞌ tnaꞌl cyuꞌne aju yol cyaj bant tiꞌj wuꞌne cyucꞌile, ex miꞌn che cꞌulune cywitz junxitl dios. 39 Nwitze baꞌn tuꞌn cycꞌulune, akine Cymane ex Cydiose, ex akine chin colil cyiꞌje tuꞌn cyetze tjakꞌ cycawbil ke aj kꞌoj cyiꞌje, chi Dios otok tma.