Tej tcawin Acaz tuj Judá
16
Otok bant wuklaj abkꞌi ttzyetlen tcawin Peka aju tcyꞌajal Remalías, tej ttzyet tcawin Acaz aju tcyꞌajal Jotam, aju rey te Judá. 2 Toctok Acaz twiꞌ winkin abkꞌi tej ttzyet tcawin, ex o cawin kaklaj abkꞌi tuj Jerusalén, pero mya baꞌn e ela ke tbinchben tuj twitz Kman aju Tdios; mintiꞌ o tbincha ic tzaꞌnx te David aju ktzan t-xeꞌchel, 3 nok oꞌcx xi lpeꞌ tiꞌj cybinchben ke rey cye aj Israel, asta cub tpatun tcyꞌajal te chojbil ic tzaꞌnx costumr icꞌbilxix in cybinchaꞌn ke nasyon, akeju otok che ex tlajoꞌn Kman cywitz aj Israel. 4 Ax icx xi tkꞌoꞌn ke chojbil ex cub tpatun storac cyuj ke ja in che ajben te cycꞌulbil xjal cywiꞌ ke witz, icx cywiꞌ ke tal witz ex cyjakꞌ cycyakil tzeꞌ pin cyxak.5 Tuj tkꞌijlalil lu, ate Rezín aju rey te Siria, tucꞌix Peka aju tcyꞌajal Remalías, aju rey cye aj Israel, e jeꞌx tuj Jerusalén tuꞌn cyoc tzokpaj tiꞌj rey Acaz, ex baj cytxolban cyib tiꞌjele tnam, pero mintiꞌ cub tiꞌj cyuꞌn. 6 Tzyet tnam Elat tuꞌn rey te Siria tuꞌn toc te cye aj Siria, e ex cylajoꞌn aj Siria ke aj Judá tuj tnam Elat. Atzun e ul aj Edom ex axtzun e cyaj ten najal tuj, ex ax ateꞌ jaꞌlo.
7 Atzunte Acaz xi t-samaꞌn junjun sanjel tucꞌil Tiglat-pileser aju rey te Asiria, tuꞌntzun t-xi cymaꞌn te cyjaꞌ: Akine ajbel teya mer ic tzaꞌn jun tcyꞌajala kine. Cyjaꞌtzun tzaja ex chin tcloma twitz rey te Siria ex te rey cye aj Israel, akeju niban cyoc tzokpaj wiꞌje.
8 Ax icx tzaj tiꞌn Acaz sak pwak tucꞌix kꞌan pwak at tuj tja Kman, ex cyucꞌix ke kꞌinumabl ateꞌ tuj tja rey, ex xi t-samaꞌn te jun oyaj te rey te Asiria. 9 Tzajtzun tbiꞌn rey aju tkanbetz, oc tzokpaj tiꞌj tnam Damasco ex tzyet tuꞌn; te tibajxi e jeꞌx tpresin ke xjal najl tuj, atzun e pon tiꞌn tuj tnam Kir, ex cub byoꞌn Rezín tuꞌn.
10 Tejtzun t-xiꞌ rey Acaz tuj tnam Damasco tuꞌn tcꞌulbante tib tucꞌil Tiglat-pileser aju rey te Asiria, o til aju altar at ma chixin. Cubtzun tbinchaꞌn jun tilbilal altar twitz jun uꞌj, ex xi t-samaꞌn tuꞌn tpon tucꞌil pal Urías tuꞌntzun tcub tbinchaꞌn jun altar ic tzaꞌnx jlu. 11 Cubtzun tbinchaꞌn Urías jun altar ic tzaꞌnx tilbilal otok tzaj t-samaꞌn rey Acaz max tuj Damasco. Tej tul meltzꞌaj rey Acaz, otok baj bant altar tuꞌn Urías.
12 Tejtzun tul meltzꞌaj rey tajtzlenxi tuj Damasco, o til ju altar otok baj bant, xitzun lakꞌeꞌ tiꞌj ex cub tkꞌoꞌn oyaj tibaj. 13 Ex cub tpatun jun chojbil tibaj, tucꞌix toyaj tiꞌj twitz awal, cub tkoꞌn toyaj taꞌl twitz uva tibaj altar, ex xi ttxꞌitpuꞌn cychcꞌel ke alumaj tibaj, akeju e jeꞌx tkꞌoꞌn te chojbil te mojbabl tibil.
14 Atzunju altar kꞌan cꞌuxbil, aju tcub twitz tja Kman, aju cyaj ten t-xol acꞌaj altar tucꞌil tja Kman, el tiꞌn Acaz tuj tlugar ex cub tkꞌoꞌn tumlal tbankꞌab kꞌij te acꞌaj altar. 15 Te tibajxi xi tmaꞌn te Urías cyjaꞌ: Jaꞌlo, tibaj acꞌaj ma tij altar cbel tpatuna oyaj aju patun in cub te prim, tucꞌix oyaj tiꞌj twitz awal in xi kꞌot te kale, tucꞌix toyaj rey patun in cub, ex toyaj tiꞌj twitz awal, tucꞌix cyoyaj tnam xjal patun in cub, ax icx cyoyaj tiꞌj twitz awal ex tiꞌj taꞌl twitz uva; ax icx cxel ttxꞌitpuꞌna tibaj altar tcyakil cychcꞌel ke oyaj patun in che cub, ex keju in cheꞌx kꞌoꞌn te chojbil. Atzunju altar kꞌan cꞌuxbil, oꞌcx tuꞌn tajben te weye tuꞌn nkꞌijine, chi Acaz.
16 Tbinchatzun pal Urías tcyakil aju tma rey Acaz te. 17 Eltzun tiꞌn rey Acaz ke tcyajil pacꞌ cytxlaj cycyakil cykꞌukbil tcubil aꞌ, ex el tiꞌn aju nintz pil tcub cyibaj ke tilbilal wacẍ kꞌan cꞌuxbil ke, akeju tzyulte nintz pil, ex cub tkꞌoꞌn tibaj txkan abj binchaꞌmaj. 18 Ex tuꞌn ttzalaj rey te Asiria tiꞌj, el tiꞌn twitz tja Kman aju waꞌlbil tucꞌix ju xmuj tjawtok tibaj, aju otok jaw binchaꞌn tuꞌn tajben tuj kꞌij te ojlabl, ex cyaj tlamoꞌn ttzi ja tetz tiꞌjtzi, aju in ajben te rey tuꞌn tocx tuj tja Dios.