5 Tuꞌntzun jlu xi kꞌoꞌn tuj tkꞌab rey cye aj Siria tuꞌn Kman aju Tdios, o cub tiꞌj cyuꞌn aj Siria, nimcu xjal e jeꞌx kꞌiꞌn pres ex e pon kꞌiꞌn tuj tnam Damasco. Ax icx xi kꞌoꞌn tuꞌn Kman tuj tkꞌab rey cye aj Israel ex nimxix xjal o naj tuꞌn. 6 Porque ate Peka aju tcyꞌajal Remalías tuj junx kꞌij e cub tbyoꞌn jun syent tucꞌ winkin mil xinak tuj Judá, akeju cyuwxix cycꞌuꞌj tuj kꞌoj. O bant jlu tuꞌnju cyaj cycolin Kman aju Cydios ktzan cyxeꞌchel. 7 Ax icx te Zicri aju aj Efraín ex cyuw tcꞌuꞌj tuj kꞌoj, cub byoꞌn Maasías tuꞌn, aju tcyꞌajal rey, tucꞌix Azricam aju nejenel tuj tja rey, tucꞌix Elcana aju nejenel cye keju at cyoclen ttxlaj rey. 8 Ax icx ke soldad aj Israel xi cypresin cab syent mil xjal aj Judá; at xuꞌj, at tal kꞌa ex at tal txin. Ax icx xi cyiꞌn nimcu tiꞌxti ex pon cyiꞌn tuj Samaria.

9 Attok jun t-sanjel Dios ma chixin, Oded tbi, etz canul cyiꞌj ke soldad tej cyjaꞌtok cyocx tuj Samaria ex xi tmaꞌn cye:

—Ma tzaj tkꞌoj Kman aju Cydios ktzan kxeꞌchel cyiꞌj aj Judá ex cyjaꞌtzun ma cub cyiꞌj cyuꞌne. Atzun cyeye ma che cub cybyoꞌne tucꞌil nimxix cytxꞌuꞌjile, ex aju cybinchbene mya baꞌn lu ma japun tucꞌil Dios tuj cyaꞌj. 10 Ax icx ma cub cyximane tuꞌn toc cykꞌoꞌne te cymajene ke xinak ex ke xuꞌj aj Judá ex aj Jerusalén. Pero ¿myapetzun icx cyeye in che binchane il twitz Kman aju Cydiose? 11 Cyjaꞌtzun chin cybintze ex cykꞌoꞌn aje ke xjal ma che tzaj cypresine, akeju ax cyermaniye, porque nimxix tkꞌoj Kman ma tzaj cyiꞌje.

12 Atzunte Azarías aju tcyꞌajal Johanán, tucꞌix Berequías aju tcyꞌajal Mesilemot, tucꞌix Ezequías aju tcyꞌajal Salum, ex tucꞌix Amasa aju tcyꞌajal Hadlai, akeju nejenel cye aj Efraín, e oc cymayoꞌn keju otok cheꞌx aj tuj kꞌoj, 13 ex xi cymaꞌn cye:

—Miꞌn che tzaj cyiꞌne tzalu ke xjal ma che tzaj cypresine, porque tuꞌn jlu jacu tzaj kil tiꞌj tuꞌn Kman. Ya ma chmet kil, ex atzun cyeye cyajbile tuꞌn tchmet mastl, ex tuꞌn jlu ctzajel nimxix tkꞌoj Kman kiꞌj.

14 Atzun cye soldad xi cykꞌoꞌn ke pres tuj cycwent nejenel ex tnam xjal, tucꞌix tcyakil tiꞌxti otok tzꞌel cyiꞌn cye tuj kꞌoj, 15 atzun cye nejenel jaw cyscꞌoꞌn junjun xinak tuꞌn cycyaj ten ke pres tuj cycwent, cyucꞌix ke tiꞌxti otok tzꞌel kꞌiꞌn cye. Cyxol ke tiꞌxti lu tzaj cyiꞌn ke xbalun tuꞌn toc cykꞌoꞌn cyiꞌj ke xjal skiꞌt cyiꞌj, oc cykꞌoꞌn cyxajab, xi cykꞌoꞌn cywa ex cycꞌa, oc cykꞌanan ke ẍil cyiꞌj, cycyakil keju mintiꞌ cyipun tuꞌn cybet e jax cykꞌoꞌn cyibaj ke bur, xi cyiꞌn tuꞌn cypon tuj Jericó aju tnam at nim tkan xaꞌj tuj, ex e cyaj cykꞌoꞌn cyucꞌil ke cyxjalil. Te tibajxi jlu e ajtz meltzꞌaj tuꞌn cyul tuj Samaria.

16 Tuj tkꞌijlalil lu xi t-samaꞌn rey Acaz junjun xjal kanil onbil tucꞌil rey cye aj Asiria, 17 porque otok che oc tzokpaj juntl maj aj Edom cyiꞌj aj Judá, otok cub cyiꞌj cyuꞌn, ex otok cheꞌx cyiꞌn junjun aj Judá pres. 18 Ax icx ke aj Filistey otok cub cyiꞌj ke tnam cyuꞌn, akeju ateꞌ tuj chkꞌajlaj t-xe witz ex tuj txꞌotxꞌ Néguev, aju cyetok aj Judá, ex otok tzꞌel cyetzan ke tnam lu: Bet-semes, Ajalón, Gederot, Soco, Timna ex Gimzo, cyucꞌix ke aldey ateꞌ cyiꞌjele, ex otok che cub ten najal cyuj. 19 Porque tuꞌn Kman cub cycastiw aj Judá, nok tuꞌn tlaj Acaz aju cyrey, porque xi tkꞌoꞌn Acaz ambil cye aj Judá tuꞌn cybinchante nimcu mya baꞌn, ex jumajx otok tzꞌel tpaꞌn tib Acaz tiꞌj Kman.

20 Pero mintiꞌ o onin Tiglat-pileser aju rey cye aj Asiria tiꞌj rey Acaz, nokpe o tzaj tuꞌn toc tzokpaj kꞌojlel tiꞌj ex oc ten yajlal te. 21 Masque etz tiꞌn rey Acaz ke tiꞌxti wiꞌyilxix ateꞌ tuj tja Kman, cyucꞌix keju ateꞌ tuj tja rey ex keju ateꞌ tuj cyja ke nejenel, tuꞌn t-xi tkꞌoꞌn te chojenj te rey te Asiria, pero mi tuꞌn jlu mintiꞌ o cnet onbil tuꞌn. 22 Ex masque o tzaj nim mya baꞌn tibaj rey Acaz, pero cucx o binchan il twitz Kman. 23 Xi tkꞌoꞌn chojbil cye ke cydios aj Damasco, como cyuꞌntzun ke jlu otok cub tiꞌj. Cub t-ximan cyjaꞌ: Ka o che onin ke cydios aj Siria cyiꞌj ke cyrey, ax icxtzun weye, jaculo che onin wiꞌje ka ma txi nkꞌoꞌne chojbil cye, chi Acaz. Tuꞌntzun jlu o tzaj nimcu mya baꞌn tibaj ex cyibaj cycyakil aj Israel. 24 E oc tchmoꞌn Acaz ke macbil ateꞌ tuj tja Dios ex biꞌx e baj tbuchin, cyaj tlamoꞌn ke tpwertil tja Dios ex xi tmaꞌn tuꞌn cyjaw binchet altar cyuj cycyakil t-scyin cay te tnam Jerusalén, tuꞌn cyajben cye cydios xjal mya nimal Dios ke. 25 E jaw tbinchaꞌn ke altar cyuj cycyakil tnam ateꞌ tuj Judá, tuꞌntzun tcub patit storac cywitz junxitl dios, ex tuꞌn jlu tzaj tkꞌoj Kman tiꞌj, aju Cydios ktzan t-xeꞌchel.

26 Aju chꞌintl txꞌolbaben tiꞌj ex tiꞌj tcyakilju o bant tuꞌn, atxix tej ttzaj keꞌ ex tejxi tpon baj, atzun tzꞌiban tuj ju uꞌj jatum taꞌ tcyakil txꞌolbaben cyiꞌj ke rey cye aj Judá ex cye aj Israel. 27 Tejtzun tcyim, cuꞌx makuꞌn cyucꞌil ktzan t-xeꞌchel tuj tnam Jerusalén, pero mintiꞌ ocx makuꞌn tuj cypantyón ke rey. Te tibajxi, aju o cawin te t-xel, atzun Ezequías aju tcyꞌajalx.