ESDRAS
Aju orden tuꞌn Ciro
1
Tuj tnejel abkꞌi ttzyetlen tcawin Ciro aju rey cye aj Persia, ate Kman o cꞌasunte tnabl tuꞌn tbant jun orden tuꞌn; cub ttzꞌiban aju orden lu cyuj uꞌj ex e jeꞌx t-samaꞌn cyuj cycyakil tnam jatum in cawin. O bant orden lu tuꞌntzun tjapun tyol Kman aju o kꞌmanjtz tuꞌn Jeremías. 2 Aju yol in tmaꞌn tuj uꞌj atzun jlu: Chitzun Ciro aju rey cye aj Persia: Ate Kman Dios at tuj cyaꞌj ma tzaj tkꞌoꞌn woclene tiꞌj tcyakil cawbil twitz txꞌotxꞌ, ex ma tzaj tmaꞌn weye tuꞌn tcub nbinchaꞌne jun nintz ja te cꞌulbil te tuj Jerusalén, aju tnam taꞌ tuj txꞌotxꞌ Judá. 3 Cyjaꞌtzun nok alcyex cyeye toc te tajlal cyxol ke xjal etzan tuꞌn Kman, awt Dios onil te, ex baꞌn tuꞌn t-xiꞌ tuj Jerusalén aju at tuj Judá, tuꞌn tjaw binchet jun nintz ja te Kman aju Cydios aj Israel, aju ax najl tuj Jerusalén. 4 Ax icx cycyakil keju itzꞌx cyxol keju e tzaj tuj Jerusalén ex nok alcyex lugar ateꞌ, e cyonin ke cyvesin cyiꞌj tuꞌn t-xi cykꞌoꞌn sak pwak ex kꞌan pwak cyucꞌix ke alumaj ex mastl tiꞌxti, ex part oyaj tuꞌn ttzaj cykꞌoꞌn tuꞌn cyex cygan tuꞌn tajben tuꞌn tjaw binchet tja Dios tuj Jerusalén, chi yol tuj uꞌj.Tej cyajtz junjun aj Israel tuꞌn cyul tuj Jerusalén
5 Ke nejenel cyxol junjun cꞌloj tiyjil Judá ex Benjamín, ke pal ex ke aj Leví ex cycyakil keju otok tzaj tmaꞌn Dios tuj cyanmi, bant cyten tuꞌn cyxiꞌ tuj Jerusalén ex tuꞌn tjaw cybinchaꞌn juntl maj tja Dios. 6 Cycyakil ke cyvesin e onin cyiꞌj xi cykꞌoꞌn sak pwak ex kꞌan pwak cye, cyucꞌix ke alumaj ex ke tiꞌxti at cyucꞌil, ex junjun tiꞌxti wiꞌyilxix, ex part tcyakil txcaj oyaj xi cykꞌoꞌn tuꞌn cyex cygan. 7 Atzunte rey Ciro e jeꞌtz tiꞌn cycyakil ke macbil in che ajben tuj tja Dios, akeju otok che tzaj tiꞌn Nabucodonosor tuj Jerusalén ex otok che ocx tkꞌoꞌn tuj tja ke tdios. 8 Xi tmaꞌn Ciro te Mitrídates aju cꞌuꞌlte tkꞌinumabl, tuꞌn cyetz tiꞌn ex tuꞌn cycub tajlaꞌn; cybajlenxitzun tajlaꞌn, e jeꞌx tkꞌoꞌn te Sesbasar aju nejenel cye aj Judá. 9 Atzun cyajlal ke macbil japun jlu: 30 lak ma tij kꞌan pwak cytxꞌotxꞌil, jun mil lak ma tij sak pwak cytxꞌotxꞌil, 29 cchil, 10 ax icx 30 lak kꞌan pwak cytxꞌotxꞌil, 410 lak sak pwak cytxꞌotxꞌil ex juntl mil macbil. 11 Aju tajlal macbil kꞌan pwak ex sak pwak cytxꞌotxꞌil, japun jweꞌ mil tucꞌ cyaje syent. Cycyakil ke jlu xi tiꞌn Sesbasar juntl maj tuj Jerusalén tej tajtz tuj Babilonia cyucꞌix ke xjal.