NEHEMÍAS
In cubsan Nehemías twitz Dios tiꞌj ttanmi
1
Atzun ke tyol Nehemías jlu, aju tcyꞌajal Hacalías. Tej otok bant winkin abkꞌi ttzyetlen tcawin Artajerjes, tuj xjaw Quisleu tbi, akine Nehemías atintoke tuj nintz tnam Susa, 2 tej tpon wermaniye Hanani cyucꞌix junjun xinak tzajni ke tuj Judá. Xitzun nkanine cye tiꞌj tnam Jerusalén ex cyiꞌj ke xjal Judiy, akeju otok che aj tuj Babilonia ex otok che pon tuj Jerusalén. 3 Atzun cye tzaj cymaꞌn weye: Akeju o che aj tuj Babilonia ex o che pon tuj Judá ateꞌ tuj nim bis ex in che chꞌixwi; atzunju muro toc tiꞌjele tnam Jerusalén jumajx o baj xitj, ex ke tlamel tnam o che baj tzꞌeꞌy tuꞌn kꞌakꞌ, che chi.4 Tejtzun nbinteye tkanil lu, in cub keꞌye okꞌel ex in bisune cab ox kꞌij; cub nyoꞌne weꞌyaj ex in oc tene naꞌl Dios aju at tuj cyaꞌj. 5 Ex xi nmaꞌne te tuj nnaꞌj Diose cyjaꞌ: Nman Dios ata tuj cyaꞌj, aya Dios maꞌ toclen ex xobajilxix, mintiꞌ in baj tchꞌexpuꞌn tyola aju in cyaj bant tiꞌj, ex at tkꞌakꞌbil tcꞌuꞌja cyiꞌj keju in che cꞌujlan teya ex in che japun ke tmandamyenta cyuꞌn. 6 Jaꞌlo in chin cubsane twitza tuꞌn ttzaj tbiꞌna nnaꞌj Diose kꞌijl ex konicꞌan cyiꞌj ke tmajena ake aj Israel. Akoꞌye aj Israel ma ko binchane il twitza; akine cyucꞌix keju at nxilene cyucꞌil ma ko binchane il. 7 Nim mya baꞌn ma kbinchaye twitza; mintiꞌ ma che japun ke tmandamyenta kuꞌne, cyucꞌix ke tleya ex ke tcawbila, akeju e tzaj tmaꞌna te tmajena Moisés. 8 Naꞌntza aju yol tzaj tmaꞌna te tmajena Moisés, chiya cyjaꞌ: Ka ma che binchane il, che bajel l cyuj mastl nasyon; 9 katzun ma che ajtz meltzꞌaje juntl maj wucꞌile ex ka ma txi cynimane ke nmandamyente ex ka ma che japun cyuꞌne, masque cyetbzbil cyibe max ttxaꞌnpun txꞌotxꞌ, che tzajel wiꞌne ma chixin tuꞌn cyule juntl maj tuj lugar scꞌoꞌmaj wuꞌne, jatum tuꞌn ttzaj naꞌn nbiye tuj, chitzuna, tmaya te Moisés.
10 Tmajena koꞌye ex etzan koꞌye tuꞌna, ex o ko colpete tuꞌna tuꞌn nimxix tipumala. 11 In chin cubsane twitza Nman, tuꞌn ttzaj tbiꞌna nkanbetze ex cykanbetz ke tmajena, akeju at cygan tuꞌn tjaw nimsaꞌn tbiya cyuꞌn. Oꞌcx in chin kanine teya tuꞌn baꞌn tel nbeye ex tuꞌn ntzaj xtaline tuꞌn rey, nchiye tuj nnaꞌj Diose.
Porque akine toctok te kꞌol tcꞌa rey Artajerjes.