Ke xuꞌj mya judiy e jeꞌl kꞌiꞌn ke twitz cychmil
10
Tej toc ten Esdras naꞌl Dios ex kꞌmalte cyil xjal te Dios, in okꞌ wen ex cub mutzeꞌ twitz tja Dios, baj cytxolban cyib nimcu xjal aj Israel tiꞌjele, tzaꞌnx ke xinak icx ke xuꞌj ex ke cꞌwaꞌl ax icx in che okꞌtok cyuwxix. 2 Xitzun tmaꞌn Secanías aju tcyꞌajal Jehiel ex tiyjil Elam te Esdras cyjaꞌ: Ma ko binchane il twitz Dios tuꞌnju ma ko mojeꞌye cyucꞌil ke xuꞌj mya judiy ke, te junxitl nasyon ke, pero masque icju, atx oybil cye aj Israel. 3 Cxel ktziyane tuꞌn cyex klajoꞌne kxuꞌjile, akeju mya judiy ke, cyucꞌix ke cyal, tuꞌntzun tjapun aju ley, ic tzaꞌnx o tmaya ex o cyma keju in che nimante tmandamyent Kman. 4 Weꞌctza, porque aya at toclen tuꞌn tbinchante jlu; atzun keye jacu ko onine tiꞌja. Cyuwx tcꞌuꞌja ex binchama jlu.5 Jawtzun weꞌ Esdras cyxol, ex xi tmaꞌn cye nejenel cye pal, cye aj Leví ex cye cycyakil xjal aj Israel, tuꞌn t-xi cytziyan jun yol axix toc twitz Kman, tuꞌn tjapun cyuꞌn ic tzaꞌnx otok tma Secanías; cycyakil xjal baꞌn eꞌla tuj cywitz ex xi cytziyan tuꞌn tbant cyuꞌn. 6 Icꞌtzun Esdras twitz tja Dios ex xiꞌ tuj tcwart Johanán aju tcyꞌajal Eliasib; mintiꞌ o waꞌn ex mintiꞌ o cꞌan tuꞌn tbis, tuꞌn tlaj mya baꞌn otok cybincha ke xjal otok che etz tuj Babilonia ex otok che ul meltzꞌaj tuj Jerusalén.
7 Te tibajxi ex jun txocbil cye cycyakil xjal tuj Judá ex tuj Jerusalén, akeju otok che etz tuj Babilonia, tuꞌn toc cychmon cyib tuj Jerusalén; 8 katzun at jun mintiꞌ ma txi tniman tuꞌn tpon tuj toxin kꞌij, ic tzaꞌnx otok cyaj bant tiꞌj cyuꞌn ke nejenel ex ke tij xjal, cꞌelel kꞌit ttxꞌotxꞌ aju ma cub tetzan, ex biꞌx cꞌelex lajet cyxol ke xjal ma che ul tuj Jerusalén. 9 Cyjaꞌtzun, tuj toxin kꞌij tuj winkin tajlal tbelajin xjaw, cycyakil ke xinak tiyjil Judá ex tiyjil Benjamín oc cychmon cyib tuj Jerusalén. Cycyakiltzun pon baj cychmon cyib tuj lugar jatum in pon cychmon cyib xjal twitz tja Dios, in che luꞌlun tuꞌn tchi aju at tuꞌn tbant tiꞌj ex tuꞌn tlaj jbal in cubtok cyibaj. 10 Jawtzun weꞌ Esdras aju pal, ex xi tmaꞌn cye cyjaꞌ:
—Akeye ma che binchane il tuꞌnju ma che mojeꞌye cyucꞌil ke xuꞌj mya judiy ke, ex tuꞌn jlu ma chꞌiy mastl cyil aj Israel cyuꞌne. 11 Jaꞌlotzun cypaꞌn jatz cyile twitz Dios, aju Cydios ktzan cyxeꞌchele, ex japunx cyuꞌne aju tajbil Kman. Cypaꞌmil cyibe cyiꞌj ke xjal mya nimal Dios, ex cylajoꞌn ele ke cyxuꞌjile mya judiy, chi Esdras.
12 Cycyakiltzun xjal xi cytzakꞌweꞌn tucꞌil tkꞌajkꞌajel cywiꞌ cyuwxix:
—Cbantel kuꞌne nok alcyex ctzajel tmaꞌna keye. 13 Pero nimxix kbete atoꞌye tzalu, mintiꞌ tuꞌn ticꞌ jbal ex mlay bant ax tuꞌn kcyaj tene tuj cay. Aju yol lu mlay bant tiꞌj tuj jun ex mi tuj cab kꞌij, tuꞌnju nimxix kbete o ko binchane il lu. 14 Mas baꞌn tuꞌn cycyaj ten ke nejenel keye te kxele, ex cycyakil keju najlke tuj ktanmiye, akeju o che mojeꞌ cyucꞌil ke xuꞌj mya judiy, baꞌn tuꞌn cyul tuj jun kꞌij cyjel bant tiꞌj ex ctzajel cyucꞌin cyib cyucꞌil ke nejenel ex ke jwes ateꞌ tuj cytanmi, ocxi tel tpaꞌn tib tkꞌoj Kman kiꞌje tuꞌn tlaj kbinchbene mya baꞌn, che chi xjal.
15-16 Cycyakiltzun keju otok che ul tuj Jerusalén baꞌn ela tuj cywitz tuꞌn tbant icju, nok oꞌcx Jonatán aju tcyꞌajal Asael, tucꞌix Jahazías aju tcyꞌajal Ticva, mintiꞌ cub tuj cywitz tuꞌn tbant icju, ex o cyuwsanjtz cyyol tuꞌn Mesulam ex Sabetai, akeju aj Leví. Entons acu pal Esdras jaw scꞌonte junjun xinak nejenel ke cye junjun cꞌloj xjal at cyxilen cyxolx ex oc tkꞌoꞌn cyoclen, ex tuj tnejel kꞌij te tlajin xjaw, cycyakiltzun keju otok tzꞌoc kꞌoꞌn cyoclen oc cychmon cyib tuꞌn tbant tiꞌj jlu cyuꞌn. 17 Ex tuj tnejel kꞌij te tnejel xjaw, pon baj twiꞌ cyuꞌn tuꞌn t-xi cybinchaꞌn cyiꞌj ke xinak otok che mojeꞌ cyucꞌil ke xuꞌj mya judiy ke.
18 Ke pal e mojeꞌ cyucꞌil ke xuꞌj mya judiy ke, atzun ke jlu:
Cyxol tiyjil Jesúa aju tcyꞌajal Josadac, ex cyxol keju at cyxilen tucꞌil, atzun cybi jlu: Maasías, Eliezer, Jarib ex Gedalías, 19 atzun ke jlu xi cytziyan jun yol axix toc tuꞌn tex cylajoꞌn ke cyxuꞌjil mya judiy ke, ex teyle junjun xi tkꞌoꞌn jun tman ẍneꞌl te jun oyaj te chojbil til.
20 Cyxol tiyjil Imer, atzun ke jlu: Hanani ex Zebadías.
21 Cyxol tiyjil Harim, atzun ke jlu: Maasías, Elías, Semaías, Jehiel ex Uzías.
22 Cyxol tiyjil Pasur, atzun ke jlu: Elioenai, Maasías, Ismael, Natanael, Jozabad ex Elasa.
23 Cyxol cyiyjil aj Leví, atzun ke jlu: Jozabad, Simei, Kelaía (ex ka Kelita), Petaías, Judá ex Eliezer.
24 Cyxol cyiyjil ke bitzal, atzun Eliasib.
Cyxol cyiyjil ke xkꞌukil ttzi tja Dios, atzun ke jlu: Salum, Telem ex Uri.
25 Akeju mastl xjal aj Israel e binchante ax il lu, atzun ke jlu:
Cyxol tiyjil Paros, atzun: Ramía, Jezías, Malquías, Mijamín, Eleazar, Malquías ex Benaía.
26 Cyxol tiyjil Elam, atzun ke jlu: Matanías, Zacarías, Jehiel, Abdi, Jeremot ex Elías.
27 Cyxol tiyjil Zatu, atzun ke jlu: Elioenai, Eliasib, Matanías, Jeremot, Zabad ex Aziza.
28 Cyxol tiyjil Bebai, atzun ke jlu: Johanán, Hananías, Zabai ex Atlai.
29 Cyxol tiyjil Bani, atzun ke jlu: Mesulam, Maluc, Adaía, Jasub, Seal ex Ramot.
30 Cyxol tiyjil Pahat-moab, atzun ke jlu: Adna, Quelal, Benaía, Maasías, Matanías, Bezaleel, Binúi ex Manasés.
31 Cyxol tiyjil Harim, atzun ke jlu: Eliezer, Isías, Malquías, Semaías, Simeón, 32 Benjamín, Maluc ex Semarías.
33 Cyxol tiyjil Hasum, atzun ke jlu: Matenai, Matata, Zabad, Elifelet, Jeremai, Manasés ex Simei.
34 Cyxol tiyjil Bani, atzun ke jlu: Madai, Amram, Uel, 35 Benaía, Bedías, Quelúhi, 36 Vanías, Meremot, Eliasib, 37 Matanías, Matenai ex Jaasai.
38 Cyxol tiyjil Binúi, atzun ke jlu: Simei, 39 Selemías, Natán, Adaía, 40 Macnadebai, Sasai, Sarai, 41 Azareel, Selemías, Semarías, 42 Salum, Amarías ex José.
43 Cyxol tiyjil Nebo, atzun ke jlu: Jeiel, Matatías, Zabad, Zebina, Jadau, Joel ex Benaía.
44 Cycyakil ke xjal lu otok che jaw mojeꞌ cyucꞌil ke xuꞌj mya judiy ke, ex cyxol ke xuꞌj lu at junjun otok tzul itzꞌj cyal.