3 Tejtzun nbinteye tkanil lu, el nsbitꞌune nxbalune wiꞌje, jatz nbakoꞌne ttzmal nwiꞌye ex nxmatze te jun yecꞌbil te taꞌw nbise tuj wanmiye, in cub keꞌye ex tzaj nimxix nbise. 4 Cycyakil keju in che xobtok twitz Dios, aju Cydios aj Israel, ul baj cychmon cyib wucꞌile tuꞌn tlaj il cybincha keju otok cheꞌx kꞌiꞌn pres ex otok che ul meltzꞌaj; atzun weye cucx kꞌukl kine tuꞌn nim nbise tejxi tpon or tuꞌn tcub patit chojbil te kale. 5 Tujtzun or lu in jaw weꞌye jatum kꞌukl kintoke tuꞌn bis, ex tocxtok nxbalune sbitꞌumaj, in cubtzun ẍmejeꞌye twitz Kman aju Ndiose, 6 ex xi nmaꞌne te cyjaꞌ: Aya Nman Dios, in chin chꞌixwiye ex tzpetni taꞌ nnable, mintiꞌ in cnet ttxolil nyole tuꞌn nyoline tucꞌila; ma chmet nimxix kpaltile twitza, aju kile nimxix ma japun tucꞌila tuj cyaꞌj. 7 Atxix tuj tkꞌijlalil tej cyten ktzan kxeꞌchele ax icx jaꞌlo cucx in ko binchane nimxix il. Tuꞌn tlaj kbinchbene mya baꞌn o koꞌx kꞌoꞌne tuj cykꞌab ke rey cye mastl nasyon, tzaꞌnx keye, cyucꞌix kreye ex ke pal. At o che cub byoꞌn tuꞌn spad ex o ex kꞌiꞌne tuj ktanmiye tuꞌn kxiꞌye tuj juntl tnam, el kꞌiꞌn aju at keye ex o el icꞌune, ax icx in baj kiꞌje jaꞌlo. 8 Pero ax icx jaꞌlo, aya Kman ex Kdiose, tuꞌnju tcꞌujlalila ma tzaj tkꞌoꞌna ambil keye tuꞌn kcyaj tene jun byuj kbete tuꞌn kule najal tuj txꞌotxꞌ xjan; tuꞌna ma spicꞌeꞌ tuj kwitze juntl maj, ex masque majentok koꞌye, ma tzaj tkꞌoꞌna tzalajbil tuj kanmiye. 9 Masque majen koꞌye, pero mintiꞌ ma ko cyaj tcolina; ma tzaj tyecꞌuna tcꞌujlalila keye cywitz ke rey cye aj Persia, ma tzaj tkꞌoꞌna acꞌaj kchwinklale tuꞌn tjaw kbinchaꞌne juntl maj tjaya aju o cub xitj, ma tzaj tkꞌoꞌna colbil keye tuj Judá ex tuj Jerusalén.

10 Atzun jaꞌlo Kman Dios ¿ti cxel kmaꞌne tibaj tcyakil jlu? Mintiꞌ ma che japun ke tmandamyenta kuꞌne, 11 aju tzaj tmaꞌna cye t-sanjela akeju tmajena. Biꞌx tzaj tmaꞌna keye ka nimxix mya baꞌn at tuj txꞌotxꞌ jatum tuꞌn kocxe tuj, aju tuꞌn toc te ketzbile. Tuꞌn tlaj cybinchben xjal najlke tuj lugar lu ex tuꞌnju cycostumr puro icꞌbilxix, nojni twitz txꞌotxꞌ tuꞌn mya baꞌn. 12 Ax icx tzaj tmaꞌna keye tuꞌn miꞌn t-xi kkꞌoꞌne kmeꞌjele tuꞌn cymojeꞌ cyucꞌil cycyꞌajal ke xjal lu, ex tuꞌn miꞌn t-xi kkꞌoꞌne ambil tuꞌn cymojeꞌ ke cymeꞌjel cyucꞌil kcyꞌajale, ex tuꞌn miꞌn k-onine cyiꞌj ke xjal lu tuꞌn cyankꞌin tuj txubtxaj; tuꞌntzun tocxix kipune ex tuꞌn kwaꞌne tiꞌj cywitz awal in tzaj tkꞌoꞌn txꞌotxꞌ, ex te tibajxi tuꞌn tcyaj ten txꞌotxꞌ lu te cyetzbil ke kiyjile te jumajx.

13 Te tibajxi tcyakilju ma tzaj kiꞌje tuꞌn tlaj kbinchbene mya baꞌn ex kile nimxix, mintiꞌ ma cub tkꞌoꞌna kcastiwoye ic tzaꞌnx kile, nok oꞌcx ma tzaj tkꞌoꞌna ambil keye, jun byuj kbete, tuꞌn kule tzalu. 14 ¿Baꞌnpetzun tuj twitza tuꞌn miꞌn t-xi knimane tmandamyenta ex tuꞌn kmojeꞌye cyucꞌil ke xjal icꞌunxix cycostumr tuꞌna? ¿Mlaypetzun tzaj tkꞌoja kiꞌje ex mlaypetzun ko cub baj tbyoꞌna tuꞌn miꞌn tcyaj ankꞌin jun keye?

15 Aya Nman aju Cydios aj Israel tzꞌaklxixa kucꞌile; nok tuꞌn t-xtalbila ma cyaj ankꞌin jun byuj kbete ic tzaꞌn in kile jaꞌlo. Keye ax toc aj il koꞌye twitza; tuꞌntzunju mintiꞌ koclene tuꞌn ktene twitza, nchiye tuj nnaꞌj Diose.