2 CRÓNICAS
Xi tkanin Salomón tuꞌn ttzaj tkꞌoꞌn Dios tnabl
1
O cyuwsanjtz Salomón aju tcyꞌajal David tuj tcawbil, porque ate Kman aju Tdios o ten tucꞌil, cyjaꞌtzun o chꞌiyxix toclen. 2 E tzajtzun ttxcoꞌn Salomón cycyakil aj Israel: Ke nejenel cye soldad, akeju at jun milchak soldad tuj cycwent ex keju at jun syentchak soldad tuj cycwent, ke jwes, ex cycyakil ke nejenel te junjun cꞌloj aj Israel at cyxilen cyxolx. 3 Cycyakil xjal otok che chmet tucꞌil Salomón e jeꞌx tuj lugar te cꞌulbil tuj Gabaón, porque atzun taꞌtok ja xbalun te mojbabl tibil tucꞌil Dios, aju otok bant tuꞌn tmajen Dios Moisés tuj lugar tzkij txꞌotxꞌ. 4 Pero otok tzaj tiꞌn David ju cax cꞌubl tley Dios tuj tnam Quiriat-jearim, ex ul tiꞌn tuj Jerusalén tuj lugar jatum otok bant tten tuꞌn, porque otok jaw tbinchaꞌn jun ja xbalun tuꞌn tocx ten cax tuj. 5 Aju altar kꞌan cꞌuxbil, aju otok baj tbinchaꞌn Bezaleel aju tcyꞌajal Uri ex tal tchman Hur, ax icx axtok taꞌ tuj Gabaón, tcub twitz ja xbalun te Kman. Tujtzun lugar lu xiꞌ Salomón ex cycyakil xjal cꞌulul te Kman.6 Jaxtzun Salomón jatum taꞌ altar kꞌan cꞌuxbil, aju tcub twitz Kman twitz ja xbalun te mojbabl tibil tucꞌil Dios; tibajtzun altar lu cub tpatun Salomón jun mil alumaj te jun oyaj te Kman.
7 Tujx ju konicꞌan lu, cub tyecꞌun tib Dios twitz Salomón ex tma: Kanintza weye alcye tajbila ex jacu txi nkꞌoꞌne.
8 Atzunte Salomón xi ttzakꞌweꞌn te Dios cyjaꞌ: Nimxix o tcꞌujlaya David aju ktzan nmane, ex a kine ma chin oc tkꞌoꞌna cawil te t-xel. 9 Atzun jaꞌlo Nman Dios, japunx tuꞌna aju tzaj tmaꞌna te David aju ktzan nmane, tuꞌnju ma chin oc tkꞌoꞌna te rey cyibaj tnam xjal nimxix cyajlal ex mlay bant cyajlanjtz. 10 Cyjaꞌtzun kꞌontza nnable ex wojtzkible tuꞌntzun cyxi nẍaklune ke tnam xjal lu; porque ¿alcye jun jacu bant tcawin cyibaj ke xjal etzan tuꞌna nim cyajlal? Chi Salomón.
11 Tzajtzun tzakꞌweꞌn Salomón tuꞌn Dios cyjaꞌ: Tuꞌnju ma tzaj tkanina jlu weye, ex mintiꞌ ma tzaj tkanina tuꞌn tten tkꞌinumabla, mi tuꞌn tjaw nimsaꞌna, mi tuꞌn cycyim ke aj kꞌoj tiꞌja, ex mi tuꞌn t-xi lakꞌeꞌ tuj tankꞌibla, nok oꞌcx ma tzaj tkanina tnabla ex tojtzkibla tuꞌn tbant tcawina cyibaj ke xjal etzan wuꞌne, ex wuꞌne ma tzꞌoc nkꞌoꞌna te rey tuꞌn tcawina cyibaj, 12 cyjaꞌtzun cxel nkꞌoꞌne tnabla ex tojtzkibla, ax icx cxel nkꞌoꞌne tkꞌinumabla, ex cjawil nimsaꞌna; ctel mas tnabla ex tkꞌinumabla cywitz ke rey akeju e ten nej naꞌnxtok toc teya te rey, ex cywitz keju che oquel te rey te tibajxiya.
13 Te tibajxi ajtztzun Salomón tuj lugar te cꞌulbil tuj Gabaón, aju tcub twitz ja xbalun te mojbabl tibil tucꞌil Dios, pon tuj Jerusalén ex o cawin cyibaj aj Israel.
Oc ten Salomón xcꞌaꞌmil cyiꞌj carwaj ex chej cabay
14 Bajtzun tchmoꞌn Salomón ke carwaj ex ke chej cabay. Attok jun mil tucꞌil cyaje syent tcarwaj ex cablaj mil tchej cabay. Ake jlu e ocx tkꞌoꞌn Salomón cyuj ke tnam jatum ateꞌ ke cwartel cye carwaj te kꞌojbil, ex at carwaj ex cabay ax e ocx tkꞌoꞌn tuj lugar nikayin ttxlaj tuj Jerusalén. 15 O chmet nimxix sak pwak ex kꞌan pwak tucꞌil rey Salomón tuj Jerusalén, mer ic tzaꞌn abj; ex nim tzeꞌ wiꞌten o chmet, mer ic tzaꞌn tkan higo in tzaj chꞌiy tuj cꞌul tuj chkꞌajlaj t-xe witz. 16 Ke chej cabay te Salomón atzun in che tzaj kꞌiꞌn tuj Ejipt ex tuj Cilicia, porque ke comersyant te Salomón in tzaj cylakꞌoꞌn ma chixin. 17 Oc in tzaj cylakꞌoꞌn jun carwaj tuj Ejipt, kak syent sak pwak twiꞌ, ex atzun twiꞌ jun chej, jun syent tucꞌil 50. Ex cycyakil ke rey cye aj Hetey ex cye aj Siria in xi cylakꞌoꞌn ke jlu cyucꞌil ke tmajen Salomón.