Ke oyaj e tzaj kꞌoꞌn tuꞌn tbant tja Dios
29
Te tibajxi jlu xi tmaꞌn rey David cye tcyakil tnam xjal: Aju ncyꞌajale Salomón, oꞌcxcu a ma jaw t-scꞌoꞌn Dios, ma cuꞌxunx taꞌ ex naꞌnx toc tnabl, ex aju akꞌuntl lu matijxix, porque aju ja cbantel mya tja jun xjal, sino atzunju tja Dios aju Kman. 2 Tuꞌn tcyakil wipune ma baj nchmoꞌne aju cꞌajbel tiꞌj tja Kman Dios, ex atzun ke jlu: Kꞌan pwak, sak pwak, kꞌan cꞌuxbil, cꞌuxbil ex ke tzeꞌ. Ax icx o baj nchmoꞌne tal abj tbanilxix cornalina tbi, ex ke tal abj tuꞌn cyocx loꞌtzit tiꞌj jun tiꞌxti, ex ke tal abj in che koptzꞌaj, ex cycyakil tal abj elaꞌ txcajin che queꞌyin, ex nimcu tajlal abj alabastro tbi. 3 Pero te tibajxi tcyakilju ma baj nchmoꞌne tuꞌn tajben tiꞌj tja Dios, ex tuꞌnju at ncꞌujlalile tiꞌj tja Kman Dios, cxel nkꞌoꞌne aju wexe nkꞌinumable tuꞌn tajben tiꞌj tja Dios, cxel nkꞌoꞌne kꞌan pwak ex sak pwak; 4 cab mil tucꞌil cab syent quintal kꞌan pwak aju mas tbanil, ex jweꞌ mil tucꞌil cab syent quintal sak pwak mas tbanilxix tuꞌn toc loꞌtzit cywitz ke tcajonil ja te tujxi, 5 aju kꞌan pwak tuꞌn cybant ke macbil kꞌan pwak cytxꞌotxꞌil, ex aju sak pwak tuꞌn cybant ke macbil sak pwak cytxꞌotxꞌil ex tuꞌn cyajben tiꞌj tcyakil akꞌuntl cbantel cyuꞌn keju at cynabl tiꞌj akꞌuntl. Ex atzun jaꞌlo, ¿alcye tajbil tuꞌn tonin tuꞌn tex tgan tuꞌn t-xi tkꞌoꞌn jun toyaj te Kman?6 Cyjaꞌtzun, akeju nejenel cye junjun cꞌloj at cyxilen cyxolx, cyucꞌix ke nejenel cye cablaj cꞌloj cyiyjil aj Israel, ke nejenel cye soldad akeju at jun milchak soldad tuj cycwent, ex keju at jun syentchak soldad tuj cycwent, ex ke mayordom cwentil takꞌun rey, xi cykꞌoꞌn cyoyaj tuꞌn cyex cygan; 7 xi cykꞌoꞌn ox mil tucꞌil wajxak syent quintal kꞌan pwak tuꞌn tajben tiꞌj tja Kman, ex laj mil pwak kꞌan pwak, ex wuk mil tucꞌil jweꞌ syent quintal sak pwak, ex oxlaj mil tucꞌil jweꞌ syent quintal kꞌan cꞌuxbil, ex 75 mil quintal cꞌuxbil.
8 Ax icx keju at ke tal abj tbanilxix cyucꞌil, xi cykꞌoꞌn tuj cꞌubl kꞌinumabl tiꞌj tja Kman aju tcyajsaꞌn tuj tcwent Jehiel, aju tiyjil Gersón.
9 E jaw tzalaj tnam xjal tiꞌj ju otok tzꞌoc cychmoꞌn, porque otok txi cykꞌoꞌn tcyakil jlu te Kman tuꞌn tcyakil cyanmi ex tuꞌn cyex cygan. Ax icx te rey David nimxix o tzalaj wen.
10 Jawtzun tnimsaꞌn David tbi Kman cywitz cycyakil tnam xjal ex tma cyjaꞌ:
Nimanxwit tbiya te jumajx, aya Dios aju Tdios ktzan kxeꞌchele Israel.
11 Nman, nimxix toclena, nim tipumala, nim tajwalila, teya ju cawbil ex aya rey. Porque tcyakilju at twitz cyaꞌj ex twitz txꞌotxꞌ teya tcyakil, ex aya in cawin tibaj tcyakil, ex mas maꞌ toclena cywitz cycyakil.
12 Ex tucꞌila in tzaj kꞌinumabl ex nimbil. Aya in cawin tibaj tcyakil. Tucꞌila in tzaj ipumalj, ex tuꞌna in tzaj tkꞌoꞌna cyoclen ex cyipumal xjal.
13 Cyjaꞌtzun Kman Dios, in xi kkꞌoꞌne chjonte teya jaꞌlo ex in jaw knimsaꞌne tbiya maꞌ toclen.
14 Akine ex ke xjal ateꞌ tjakꞌ ncawbile mintiꞌ koclene tuꞌn t-xi kkꞌoꞌne ke oyaj lu teya. Ax toc tucꞌila in tzaj tcyakil, ex tcyakilju ma txi kkꞌoꞌne teya tucꞌila in tzaj.
15 Porque tuj twitza ic ktene ic tzaꞌn stranjer xjal ex betin xjal, ic tzaꞌn o baj cyiꞌj cycyakil ktzan kxeꞌchele, ex aju kchwinklale twitz txꞌotxꞌ ic tten ic tzaꞌn jun xlecun mya nim tuj in ten.
16 Aya Kman Dios, tcyakilju kꞌinumabl lu aju ma bant tten kuꞌne tuꞌn tjaw binchet jun ja jatum tuꞌn ttzaj naꞌt ju tbiya xjan tuj, teya tcyakil ex tuꞌna ma tzaj tkꞌoꞌna. 17 Aya Nman Dios, baꞌn wuꞌne in baj tqueꞌyina aju at tuj cyanmi xjal, ex in jaw tzalaja cyiꞌj keju tuj tumel in che bet twitza. Cyjaꞌtzun tuꞌn tcyakil wanmiye ma txi nkꞌoꞌne tcyakil jlu teya. Ex atzun jaꞌlo ma wile aju tnam etzan tuꞌna, akeju cychmon cyib tzalu, tucꞌil tzalajbil ma txi cykꞌoꞌn cyoyaj teya tuꞌn tcyakil cyanmi. 18 Nman, aya Tdios Abraham, Isaac ex Israel, akeju ktzan kxeꞌchele, yolina tuj cyanmi tnam xjal etzan tuꞌna tuꞌn cucx tuꞌn tten cygan tiꞌja ex cucx tuꞌn cyniman teya. 19 Ax icx onintza ncyꞌajale Salomón tuꞌn tten tanmi tuj tumelxix, tuꞌn cyjapun ke tmandamyenta tuꞌn, cyucꞌix ke tcawbila ex ke t-xnakꞌtzbila, ex tuꞌn tjaw tbinchaꞌn tjaya, aju ma baj nchmoꞌne tcyakilju cꞌajbel tiꞌj tuꞌn tbant.
20 Ax icx xi tmaꞌn David cye tnam xjal: Cynimsaꞌnctze tbi Kman aju Cydiose. Ex cycyakiltzun tnam xjal jaw cynimsaꞌn tbi Kman aju Cydios ktzan cyxeꞌchel, e cub ẍmejeꞌ ex cub mocꞌe cywiꞌ twitz Kman ex twitz rey. 21 Tuj juntl kꞌij xi cykꞌoꞌn chojbil te Kman ex ke oyaj patun in che cub. Xi cykꞌoꞌn jun mil tal tor, jun mil tman ẍneꞌl, jun mil tal tman ẍneꞌl, tucꞌix taꞌl twitz uva in xi kꞌot te tmoj oyaj ex nimxix chojbil xi cykꞌoꞌn cycyakil aj Israel. 22 Tuj kꞌij lu e waꞌn ex e cꞌan tucꞌil nim tzalajbil twitz Kman. Te tibajxi oc cykꞌoꞌn toclen Salomón aju tcyꞌajal David te rey, tcabinmajiꞌn twitz Kman; jax cykoꞌn aseyt tuj twiꞌ tuꞌn toc te cawil, ax icxte Sadoc, jax cykoꞌn aseyt tuj twiꞌ tuꞌn toc toclen te pal. 23 Cyjaꞌtzun tten oc Salomón te rey, ex cubtzun keꞌ tuj tkꞌukbil Kman te t-xel David aju tman, ex baꞌn eꞌla tcyakil te. Ex cycyakil aj Israel e niman te. 24 Ex cycyakil ke nejenel cye tnam xjal ex ke nejenel cye soldad, ex cycyakil ke tcꞌwaꞌl rey David, baꞌn eꞌla tuj cywitz tuꞌn toc Salomón te rey. 25 Ex jaw nimsaꞌn Salomón tuꞌn Kman cywitz cycyakil xjal aj Israel, ex xi tkꞌoꞌn nim tajwalil tej tcawin. Ke rey cye aj Israel e ten nej twitz, mintiꞌ jun o pon tajwalil ic tzaꞌn te.
Tej tcyim David
26 Ate David aju tcyꞌajal Isaí o cawin cyibaj cycyakil aj Israel. 27 O cawin 40 abkꞌi cyibaj aj Israel; wuk abkꞌi o cawin tuj Hebrón ex 33 abkꞌi tuj Jerusalén. 28 Tuj txubtxaj o cyim David tej otok tijin wen. Nim abkꞌi o ten twitz txꞌotxꞌ; attok nimxix tkꞌinumabl ex otok tcꞌam nimxix nimbil te. Ex aju cyaj ten cawil te t-xel, atzun Salomón aju tcyꞌajal.
29-30 Aju txꞌolbaben tiꞌj tbinchben rey David, atxix tej ttzaj keꞌ ex tejxi tpon baj, tucꞌix tcyakilju o tbincha tuj tcawbil ex tcyakil tipumal, ax icx tiꞌj tcyakilju o baj tiꞌj ex cyiꞌj aj Israel ex cyiꞌj ke mastl nasyon, atzun tzꞌiban cyuj ke uꞌj e cyaj tzꞌiban tuꞌn Samuel ex Natán akeju t-sanjel Dios, ex cyuj ke uꞌj e cyaj tzꞌiban tuꞌn Gad aju baꞌn nabin tuꞌn Dios.