2 REYES
Tej tcyim Ocozías
1
Tcyimlenxitzun Acab, jaw cyiꞌn cyib aj Moab cyiꞌj aj Israel. 2 Atzunte Ocozías tzaj tzꞌak ttziꞌ jun ventan tuj tcabin colin tja rey at tuj Samaria, ex nim te cꞌixbi. E jeꞌxtzun t-samaꞌn ke sanjel tuꞌn cyxiꞌ kanil te Baal-zebub aju cydios aj Ecrón ka tuꞌn tbanix. 3 Pero xi tmaꞌn t-anjel Kman te Elías aju aj Tisbe: Txiꞌya makolte cye ke t-sanjel rey te Samaria, ex kaninxa cye cyjaꞌ: ¿Mintiꞌpe Dios at cyxol aj Israel, tuꞌnju ma cheꞌxe kanilte cyxjele te Baal-zebub aju cydios aj Ecrón? 4 Cyjaꞌtzun, ate Kman in kꞌmante te Ocozías cyjaꞌ: Ya mlay jaw weꞌtla tuj tcoẍbila, nok oꞌcx cnajela, chi t-anjel Dios te Elías.—¿Tikuꞌn ma che ajtz meltzꞌaje?
6 Atzun cye xi cytzakꞌweꞌn:
—Porque at jun xinak setz tuj kbeye ex saj tmaꞌn keye tuꞌn kajtz meltzꞌaje tucꞌil rey aju otok txi samante keye, ex tuꞌn t-xi kmaꞌne te cyjaꞌ: Chi Kman in tmaꞌn: ¿Baka mintiꞌ Dios at cyxol aj Israel tuꞌnju in cheꞌx t-samaꞌna ke xjal kanil t-xjela te Baal-zebub aju cydios aj Ecrón? Tuꞌnju ma tbinchaya jlu, ya mlay jaw weꞌtla tuj tcoẍbila, nok oꞌcx cnajela, chi xjal, che chi ke sanjel.
7 Atzunte rey xi tkanin cye:
—¿Tzaꞌn queꞌyin aju xinak setz tuj cybeye, aju saj kꞌmante jlu?
8 —Aju xinak lu ttzꞌumal alumaj t-xbalun tocsaꞌn, ex tzꞌuꞌm cꞌalbil tcꞌuꞌj, che chi xi cytzakꞌweꞌn.
—Entons a Elías aju aj Tisbe, chi rey xi ttzakꞌweꞌn. 9 Xi t-samaꞌn rey jun capitán cyucꞌix 50 soldad jyolte Elías. Tejtzun cypon, lutok Elías kꞌukl twiꞌ jun witz. Xitzun tmaꞌn capitán te:
—Aya t-sanjel Dios, ma tzaj tmaꞌn rey tuꞌn tcuꞌtza.
10 Tzajtzun ttzakꞌweꞌn Elías:
—Ka ax toc akine t-sanjel Dios, e ttzaj kꞌakꞌ twitz cyaꞌj tuꞌn tcub tzꞌeꞌya tuꞌn, cyucꞌix ke 50 t-soldadiya.
Jurattzun cuꞌtz kꞌakꞌ twitz cyaꞌj ex e baj tzꞌeꞌy tuꞌn.
11 Xi t-samaꞌntl rey juntl capitán cyucꞌix 50 soldad. Xitzun capitán ex xi tmaꞌn te Elías cyjaꞌ:
—Aya t-sanjel Dios, ma tzaj tmaꞌn rey tuꞌn tcuꞌtz naja.
12 Tzaj ttzakꞌweꞌntl Elías:
—Ka ax toc akine t-sanjel Dios, e ttzaj kꞌakꞌ twitz cyaꞌj tuꞌn tcub tzꞌeꞌya tuꞌn, cyucꞌix ke 50 t-soldadiya.
Jurattzun cuꞌtz kꞌakꞌ twitz cyaꞌj ex e baj tzꞌeꞌy tuꞌn.
13 Xi t-samaꞌn rey toxinmajin juntl capitán cyucꞌix 50 soldad, pero aju toxin capitán jax max jatum taꞌ Elías, cub ẍmejeꞌ twitz, oc ten cubsal twitz ex tma:
—Aya t-sanjel Dios binchama xtalbil, miꞌn txi tkanina te Dios tuꞌn ncyime cyucꞌix keju 50 ajbel teya lu; 14 porque ma tzaj kꞌakꞌ tuj cyaꞌj ex ma che cub tzꞌeꞌy ke cabe capitán cyucꞌix ke xinak ucꞌin cyuꞌn. In chin cubsane twitza tuꞌn ttzaj kꞌakꞌan tcꞌuꞌja wiꞌje, chi capitán.
15 Tzajtzun tmaꞌn t-anjel Kman te Elías:
—Txiꞌya tucꞌil ex miꞌn xoba twitz.
—Chi Kman ma tma: Tuꞌnju ma cheꞌx t-samaꞌna ke sanjel kanilte t-xjela te Baal-zebub aju cydios aj Ecrón, mer ic tzaꞌn mintiꞌ Dios at cyxol aj Israel jatum tuꞌn t-xi tkanin t-xjela te, cyjaꞌtzun mlay jaw weꞌtla tuj tcoẍbila, nok oꞌcx cnajela, chi Elías.
17 Cyimtzun Ocozías ic tzaꞌnx otok tma Kman te Elías. Tuꞌnju mintiꞌ tcꞌwaꞌl Ocozías tzaj, cyjaꞌtzun aju o cawin te t-xel, atzun Joram aju terman. A jlu o baj tuj tcabin abkꞌi ttzyetlen tcawin Joram aju tcyꞌajal Josafat tuj Judá.
18 Aju chꞌintl txꞌolbaben tiꞌj Ocozías ex tiꞌj tbinchben, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.