—Baꞌn cyuꞌne, aju tnam Ramot aju at tuj Galaad, ketok jlu nej. Jaꞌlo ¿myapelo baꞌn tuꞌn tetz kcolpiꞌn tjakꞌ tcawbil rey te Siria?

4 Xitzun tkanin Acab te Josafat:

—¿Jacupe txiꞌya wucꞌile tuꞌn koc tzokpaj tiꞌj tnam Ramot aju at tuj Galaad?

Atzunte Josafat xi ttzakꞌweꞌn:

—Akine cyucꞌix ke nsoldadiye ex ke ncheje, lu koꞌye lu te onil teya ex te onil cye t-xjalila. 5 Pero naꞌnxtok tbant jlu kuꞌn, kaninxa te Kman ka jacu ko camban, chi Josafat.

6 E octzun tchmoꞌn rey Acab ke xjal otok tzꞌoc cykꞌon cyib ic tzaꞌn t-sanjel Dios, chꞌixmi cyaje syent cybet, ex xi tkanin cye:

—¿Baꞌnpe tuꞌn woc tzokpaje tiꞌj tnam Ramot aju at tuj Galaad, ex ka mya baꞌn?

Atzun cye xi cytzakꞌweꞌn:

—Toc tzokpaja tiꞌj, porque che tzajel tkꞌoꞌn Kman ke xjal tuj tkꞌaba tuꞌn tcub cyiꞌj tuꞌna.

7 Atzunte Josafat xi tkanin te Acab:

—¿Mintiꞌpe juntl xjal at tzalu axix toc t-sanjel Dios, tuꞌn t-xi kkanin te?

8 Atzunte rey Acab xi ttzakꞌweꞌn:

—Atx juntl xjal baꞌn tuꞌn t-xi kkanin te alcye tajbil Kman, atzun Micaías aju tcyꞌajal Imla, pero icꞌun jlu wuꞌne porque mintiꞌ in tzaj tmaꞌn jun yol baꞌn weye, nok oꞌcx jun yol mya baꞌn in tzaj tmaꞌn.

Atzunte Josafat xi tmaꞌn te:

—Miꞌn tmaya icju.

9 Tzajtzun ttxcoꞌn rey Acab jun xjal at toclen ttxlaj ex xi tmaꞌn te:

—Txcaꞌtza Micaías aju tcyꞌajal Imla, tuꞌn tul naj wucꞌile.

10 Tzaꞌnxix te Acab aju rey cye aj Israel, ax icx te Josafat aju rey te Judá, tocsaꞌntok t-xbalun rey cyiꞌj, ex kꞌuklkeꞌtok tuj cykꞌukbil tuj plas nikayin ttzi tpwertil tnam Samaria; ex cycyakil xjal otok tzꞌoc cykꞌon cyib ic tzaꞌn t-sanjel Dios in cychicꞌbaꞌntok aju nnuꞌl tuj cynabl cywitz ke cabe rey lu. 11 Atzunte Sedequías aju tcyꞌajal Quenaana otok che baj tbinchaꞌn junjun cꞌuxbil mer ic tzaꞌn tcach wacẍ, ex in jawtok tkꞌajkꞌajel twiꞌ cyjaꞌ: Chitzun Kman ma tma: Atzun ke cach lu che ajbel tuꞌna tuꞌn tbaj t-ẍuꞌyina ke aj Siria ocxi cybaj naj tuꞌna.

12 Cycyakil keju otok tzꞌoc cykꞌoꞌn cyib ic tzaꞌn t-sanjel Dios ax yol in cymaꞌn: Toc tzokpaja tiꞌj tnam Ramot aju at tuj Galaad, ex cbel tiꞌj tuꞌna, porque ate Kman ctzajel kꞌonte tnam lu tuj tkꞌaba, che chi xi cymaꞌn te rey.

13 Atzunte sanjel otok txi samaꞌn txcolte Micaías xi tmaꞌn te:

—Cycyakil mastl t-sanjel Dios ma cyma jun tzakꞌwebl baꞌn te rey. Cyjaꞌtzun in chin cubsane twitza tuꞌn t-xi tmaꞌna jun yol baꞌn, ic tzaꞌnx ma cyma cycyakil.

14 Atzunte Micaías xi ttzakꞌweꞌn te:

—Cxel nmaꞌne jun yol axix toc twitz Kman; oꞌcx cxel nmaꞌne aju yol ctzajel tmaꞌn Kman weye.

15 Pontzun Micaías twitz rey ex xi tkanin rey te:

—Aya Micaías, ¿baꞌnpe tuꞌn koc tzokpaje tiꞌj tnam Ramot ex ka miꞌn?

Atzunte Micaías xi ttzakꞌweꞌn:

—Toc tzokpaja tiꞌj ex cbel cyiꞌj xjal tuꞌna, porque tuꞌn Kman che tzajel tkꞌoꞌn tuj tkꞌaba.

16 Atzunte rey xi ttzakꞌweꞌn:

—¿Jteꞌ maj cxel nmaꞌne teya tuꞌn ttzaj tmaꞌna weye jun yol axix toc twitz Kman?

17 Atzunte Micaías xi ttzakꞌweꞌn:

18 Xitzun tmaꞌn rey Acab te Josafat:

—¿Baka mintiꞌ ma txi nmaꞌne teya tiꞌj xinak lu, mintiꞌ in tzaj tmaꞌn jun yol baꞌn weye, oꞌcx mya baꞌn in tzaj tmaꞌn?

19 Atzunte Micaías xi tmaꞌntl:

—Bintza aju ma tma Kman: Ma wile Kman kꞌukl tuj tkꞌukbil, cyucꞌix cycyakil keju ateꞌ tuj cyaꞌj nim cyajlal waꞌl ke junx tucꞌil tuj tbankꞌab ex tuj tnayaj. 20 Ex chi Kman xi tkanin cye: ¿Alcye cxel toꞌyilte Acab tuꞌn toc tzokpaj tiꞌj tnam Ramot aju at tuj Galaad, ex ax tuꞌn tcyim ma chixin? At junjun in tzaj cymaꞌn jun tumel, atzun junjuntl in tzaj cymaꞌn juntl tumel. 21 Pero minaben pon jun xewbaj ex xi tmaꞌn te Kman ka a tuꞌn t-xiꞌ toꞌyil te Acab. Atzunte Kman xi tkanin te:

—¿Tzaꞌn ctelba tuꞌna?

22 Xi ttzakꞌweꞌn ju xewbaj:

Chin xeꞌle ex chin yolile nicꞌaj yol tuj cytziꞌ cycyakil ke xjal nnoꞌc cykꞌon cyib te t-sanjel Dios ateꞌ tucꞌil Acab.

Atzunte Kman xi tmaꞌn:

Cbel tiꞌj tnabl tuꞌna. Txiꞌya ex binchama icju, chi Kman te xewbaj.

23 Atzun jaꞌlo, ma tzaj tkꞌoꞌn Kman jun xewbaj nicꞌal yol tuꞌn tyolin tuj cytziꞌ cycyakil keju nnoꞌc cykꞌon cyib te t-sanjel Dios ateꞌ tucꞌila, ex ma tma Kman tuꞌn tnaja.

24 Pontzun lakꞌeꞌ Sedequías aju tcyꞌajal Quenaana ttxlaj Micaías, oc ttzꞌajin jun twitz Micaías ex tma:

—¿Baka ma tzꞌel tpaꞌn tib T-xew Kman wiꞌje, ex a tuꞌn tyolin tucꞌila?

25 Atzunte Micaías xi ttzakꞌweꞌn:

—Cꞌelel tnicꞌa tiꞌj tuj kꞌij oc t-xiꞌya ewal tiba tujile cyja xjal.

26 Xitzun tmaꞌn Acab cye aj sanjelal:

—Cytzyuntze Micaías ex cyiꞌnxe twitz Amón aju gobernador te tnam, ex twitz Joás aju ncyꞌajale, tuꞌn tocx tuj pres. 27 Cymanxe cye ka akine ma chin kꞌmante tuꞌn tocx tuj pres, ex mya nim twa ex tcꞌa tuꞌn t-xi kꞌoꞌn maxi oc wul meltzꞌaje tuj txubtxaj.

28 Atzunte Micaías xi tmaꞌn:

—Katzun baꞌn ma tzul meltzꞌaja tuj kꞌoj, entons aju yol ma txi nmaꞌne cyeye myatzun a Kman ma kꞌmante te. Cybintze aju yol lu, akeye tnam xjal, chi Micaías.

29 Cyjaꞌtzun, ate Acab aju rey cye aj Israel, tucꞌix Josafat aju rey cye aj Judá, e pon kꞌojlel tiꞌj tnam Ramot aju at tuj Galaad. 30 Atzunte rey Acab xi tmaꞌn te Josafat:

—Cꞌelel nchꞌexpuꞌnwe nxbalun tuꞌn miꞌn tel nicꞌbaj wiꞌje oc nkꞌojine, atzun teya, baꞌn tuꞌn toc tkꞌoꞌna t-xbaluna aju in ajben teya oc in cawina.

Eltzun tchꞌexpuꞌn Acab t-xbalun tuꞌn miꞌn tel nicꞌbaj tiꞌj, ex tzyettzun kꞌoj cyuꞌn. 31 Pero otok txi tmaꞌn rey te Siria cye 32 capitán cye tcarwaj akeju in che ajben tuj kꞌoj, oꞌcx tuꞌn cykꞌojin tiꞌj rey cye aj Israel ex mya tiꞌj junxitl. 32 Tejtzun tilwaj Josafat cyuꞌn ke capitán, akeju ateꞌcx tuj carwaj in che ajben tuj kꞌoj, cub cyximan ka atzun rey cye aj Israel jlu, ex baj cytxolban cyib tiꞌj tuꞌn cyoc tzokpaj tiꞌj. Atzunte Josafat jaw schꞌin ex oc ten kanil onbil. 33 Eltzun cynicꞌ capitán tiꞌj ka mya a rey cye aj Israel jlu, ex ya mintiꞌtl e oc lpeꞌ tiꞌj tuꞌn tcub cyuꞌn. 34 Pero at jun soldad aj Siria nok elaj xi t-xoꞌn jun plech ex tcꞌulbacu a Acab aꞌw tuꞌn, atzun xiꞌ plech jatum ocni mojeꞌ chicyet cꞌuxbil toc tiꞌj. Xitzun tmaꞌn Acab teju yucul tcarwaj:

—Chux kꞌon welt carwaj tuꞌna, ex chin tiꞌn exe tzalu tuj kꞌoj porque nim weye ma tzaꞌw.

35 Cyuwxix kꞌoj oc tuj kꞌij lu, atzunju rey otok tzaꞌw ax cub walbaꞌn tuj tcarwaj cywitz aj Siria. Pero tej toc kax cyimtzun, ex aju chicꞌ tuj ẍil o bekin tel tuj carwaj. 36 Tej chꞌixtok tex kꞌij xi samaꞌn jun tkanil cyxol cycyakil soldad aj Israel chi in tmaꞌn cyjaꞌ: Teyle junjun cu taj tuj ttanmi, ex teyle junjun cu taj tuj ttxꞌotxꞌ jatum tzajni, 37 Cyjaꞌtzun cyim rey Acab, ex xi kꞌiꞌn t-ximlal tuj Samaria ex atzun cuꞌx makuꞌn. 38 Te tibajxi xi kꞌiꞌn ju carwaj tuꞌn tbaj txꞌjet jatum taꞌ ju nintz pil tuj Samaria, jatum in che chin ke xuꞌj jawni cywitz cyucꞌil xinak. Atzun ke txꞌyan e baj lekꞌante tchcꞌel Acab, ic tzaꞌnx otok tma Kman.

39 Aju chꞌintl txꞌolbaben tiꞌj Acab ex tiꞌj tcyakil aju o bant tuꞌn, ex tiꞌj marfil loꞌtzin twitz tja te tujxi, ex cyiꞌj ke tnam e jaw tbinchaꞌn, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel. 40 Tej tcyim Acab, a Ocozías aju tcyꞌajal cyaj ten te rey te t-xel.

41 Otok bant cyaje abkꞌi ttzyetlen tcawin Acab cyxol aj Israel tej ttzyet tcawin Josafat aju tcyꞌajal Asa tuj Judá. 42 Otok japun Josafat twiꞌ 35 abkꞌi tej ttzyet tcawin ex o cawin 25 abkꞌi tuj Jerusalén. Aju ttxuꞌ Azuba tbi ex tmeꞌjel Silhi.

43 Tuj tumelxix o bet Josafat tuj tcyakil ic tzaꞌn te Asa aju ktzan tman. Tzꞌaklxix e ela ke tbinchben tuj twitz Kman. Masque icju, pero mintiꞌ e baj tkꞌuꞌchin ke lugar cywi witz jatum in xi cykꞌoꞌn tnam xjal ke chojbil, ex jatum in cub cypatun storac.

44 Mintiꞌ o ten kꞌoj cyxol Josafat cyucꞌil ke rey cye aj Israel.

45 Aju chꞌintl txꞌolbaben tiꞌj Josafat ex cyiꞌj ke tbinchben maꞌxix cyxilen, ex cyiꞌj ke kꞌoj e oc tuꞌn, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Judá. 46 E ex tlajoꞌn Josafat ke xjal tuj cytanmi aj Judá, akeju in che yaẍin tucꞌil juntl xinak ex a jlu in cybinchaꞌn te jun cꞌulbil cywitz ke tilbilal; akeju xjal lu otok che cyaj ankꞌin tuj tkꞌijlalil tej tten Asa aju ktzan tman. 47 (Tuj Edom mintiꞌtok rey at, nok oꞌcx jun gobernador tocsaꞌn.)

48 Ax icx e baj tbinchaꞌn Josafat ke barc ic tzaꞌn cye aj Tarsis, tuꞌn t-xi kꞌibaj kꞌan pwak tuj txꞌotxꞌ Ofir; pero mintiꞌ e jeꞌx porque e baj pax ke barc tuꞌn tipun aꞌ tuj tnam Ezión-geber. 49 Xi tmaꞌn Ocozías aju tcyꞌajal Acab te Josafat, tuꞌn ttzaj tkꞌoꞌn ambil cye keju yucul tbarc tuꞌn cyxiꞌ cyucꞌil ke te yucul tbarc, pero mintiꞌ xi tkꞌoꞌn Josafat ambil tuꞌn cyxiꞌ.

50 Cyimtzun Josafat ex ax cuꞌx makuꞌn tuj tnam Ttanmi David tbi, aju ktzan t-xeꞌchel. Te tibajxi aju o cawin te t-xel, atzun Joram aju tcyꞌajal.

51 Otok bant wuklaj abkꞌi ttzyetlen tcawin Josafat tuj Judá, tej ttzyet tcawin Ocozías aju tcyꞌajal Acab cyibaj aj Israel tuj Samaria, ex cab abkꞌi o cawin. 52 Pero aju tbinchben Ocozías mya baꞌn ela tuj twitz Kman, porque ax xi lpeꞌ tiꞌj tbinchben ktzan tman ex ttxuꞌ, ex tiꞌj tbinchben Jeroboam aju tcyꞌajal Nabat, aju e binchan aj Israel il tuꞌn. 53 O cꞌulun twitz Baal ex ajben te ic tzaꞌn otok tbincha ktzan tman, ex tuꞌn jlu tzaj tkꞌoj Kman tiꞌj, aju Cydios aj Israel.