3 Tzajtzun t-xobil Josafat, oc ten kanil onbil te Kman ex xi tmaꞌn cye cycyakil xjal aj Judá tuꞌn tcub cyyoꞌn weꞌyaj, 4 atzun ke xjal najlke cyuj cycyakil tnam at tuj Judá e tzaj ex oc cychmon cyib tuꞌn t-xi cykanin onbil te Kman. 5 Cubtzun weꞌ Josafat cywitz cycyakil tnam xjal aj Judá, akeju otok tzꞌoc cychmon cyib tuj Jerusalén tuj acꞌaj ttxaꞌn peꞌn twitz tja Kman, 6 ex tmatzun Josafat cyjaꞌ: Aya Kman aju Cydios ktzan kxeꞌchele, aya Dios tuj cyaꞌj, aya in cawin cyibaj cycyakil nasyon; maꞌ toclena ex nim tipumala, mi aꞌl jun xjal jacu xcyeꞌ tiꞌja. 7 Kman Dios, aya ex lajonte cye xjal akeju najlketok tuj txꞌotxꞌ lu cywitz aj Israel akeju etzan tuꞌna, ex xi tkꞌoꞌna txꞌotxꞌ te jumajx cye tiyjil Abraham aju tamiwoya. 8 Tejtzun cynajan tuj txꞌotxꞌ lu jaw cybinchaꞌn jun ja te nabl tbiya ex cyma: 9 Ka ma tzaj mya baꞌn kibaje te kcastiwoye, ka kꞌoj, ka txꞌuꞌj yabil ex ka weꞌyaj, ko ule twitz ja lu, porque atzun taꞌya tuj, ex tuj ju yajbil keye cxel kkanine onbil teya, atzun teya ko tzajel tbiꞌna ex ko cletele tuꞌna. 10 Tej cyetz aj Israel tuj Ejipt mintiꞌ takꞌa ambil cye tuꞌn cyicꞌtz tuj cytxꞌotxꞌ aj Amón, tuj cytxꞌotxꞌ aj Moab ex tuj cytxꞌotxꞌ keju najlke tuj tiwitz txꞌotxꞌ Seir, nok oꞌcx el cypaꞌn cyib aj Israel cyiꞌj ex mintiꞌ e naj cyuꞌn. 11 Atzun jaꞌlo te t-xel ju baꞌn o cybincha aj Israel cyiꞌj, ma che ul tuꞌn cyoc tzokpaj kiꞌje, tuꞌn kex lajoꞌne cyuꞌn tuj ju txꞌotxꞌ tzaj tkꞌoꞌna te ketzbile. 12 Kman Dios, ¿maj miꞌn cub tkꞌoꞌna cycastiw? Porque keye mintiꞌ kipune tuꞌn kkꞌojine cyucꞌil ke soldad lu nimxix cybaj wen, akeju ma che ul kꞌojlel kiꞌje. Mintiꞌ baꞌn kuꞌne alcye cbantel kuꞌne, pero ma tzꞌoc keꞌ kcꞌuꞌje tiꞌja, chi Josafat.

13 Cycyakil aj Judá waꞌl cycubtok twitz Kman, cyucꞌix ke cyxuꞌjil, ke cycꞌwaꞌl, ex cyucꞌix ke tal cꞌwaꞌl mas tal chꞌin ke. 14 Tujtzun ju buyj tibil lu, ul T-xew Kman tucꞌil jun xjal aj Leví, Jahaziel tbi, aju tcyꞌajal Zacarías; ate Zacarías tcyꞌajal Benaía, atzunte Benaía tcyꞌajal Jeiel, ex atzunte Jeiel tcyꞌajal Matanías aju tiyjil Asaf, 15 ex tma Jahaziel: Cybintze, akeye xjal aj Judá ex aj Jerusalén, ex tucꞌixa aya rey Josafat; chi Kman in tmaꞌn cyeye cyjaꞌ: Miꞌn che xobe ex miꞌn che jaw secꞌpaje cywitz ke soldad lu nimxix cyajlal, porque tuj kꞌoj lu mya akeye che kꞌojel, ate Dios ckꞌojel. 16 Nchiꞌj bix che cuꞌxe tuꞌn cyoc tzokpaje cyiꞌj. Oc cyjatz twitz jawl tuj lugar Sis, atzun cꞌoquel cycꞌulban cyibe cyucꞌil tuj tkꞌab xak aju tcub twitz lugar tzkij txꞌotxꞌ Jeruel. 17 Mya akeye che kꞌojel tuj kꞌoj lu, nok oꞌcx bix txi cytxolban cyibe, ex bix che cub txuleꞌye, ex oc cyilaꞌye tzaꞌn tten che cletele tuꞌn Kman. Akeye aj Jerusalén ex aj Judá, miꞌn tzaj cyxobile ex miꞌn che jaw secꞌpaje. Cykꞌoncuye be nchiꞌj tuꞌn cyoc tzokpaje cyiꞌj, porque ate Kman ctel cyucꞌile, chi Jahaziel.

18 Atzunte Josafat cub ẍmejeꞌ ex cub mocꞌeꞌ tejxi tpon tacl tibaj twitz max twitz txꞌotxꞌ, ax icx o cybincha cycyakil xjal aj Judá ex aj Jerusalén, e cub ẍmejeꞌ twitz Kman tuꞌn cycꞌulun te. 19 Ex ke aj Leví, akeju tiyjil Coat, cyucꞌix ke tiyjil Coré, e cub weꞌ ex jaw tkꞌajkꞌajel cywiꞌ cyuwxix wen in cynimsaꞌn tbi Kman aju Cydios aj Israel.

20 Tujtzun juntl kꞌij e jaw weꞌ primxix wen tuꞌn tcub be cyuꞌn tuꞌn cypon tuj lugar tzkij txꞌotxꞌ Tecoa. Ex naꞌnxtok cyex, cub weꞌ Josafat cywitz ex xi tmaꞌn ke yol lu cye: Chin cybintze akeye xjal aj Jerusalén ex aj Judá: Keꞌc cycꞌuꞌje tiꞌj Kman aju Cydiose, octzun che tele tuj segur; keꞌc cycꞌuꞌje cyiꞌj ke t-sanjel Dios, ex tcyakil cꞌelel baꞌn cyeye.

21 Tbajlenxitzun yolin Josafat cyucꞌil xjal, e jaw t-scꞌoꞌn junjun xjal tuꞌn cybitzan, toc cyxbalun xjansaꞌmaj, ex tuꞌn cycub nej cywitz ke soldad in cynimsaꞌn tbi Kman tucꞌil bitz cyjaꞌ: Cykꞌonxe chjonte te Kman porque aju tcꞌujlalil cucx in ten te jumajx.

22 Ex tejtzun ttzyet cybitzan ke bitz te nimbil tbi Kman, baj ttzpet-saꞌn Kman cynabl aj Amón ex aj Moab, ex keju najlke tuj tiwitz txꞌotxꞌ Seir, akeju cyjaꞌ cytzaj tuꞌn cyoc tzokpaj cyiꞌj aj Judá, ax baj cybyon cyib cyxolx. 23 Porque ke aj Amón ex ke aj Moab e oc tzokpaj cyiꞌj ke xjal najlke tuj tiwitz txꞌotxꞌ Seir ex e cub baj cybyoꞌn cycyakil, ex tbajlenxi cybyoꞌn ke, ax icx cye cub cybyon cyib cyxolx. 24 Tejtzun cypon aj Judá twi witz, cuꞌx cyqueꞌyin tuj tzkij txꞌotxꞌ ex o cyil nimxix cyximlal aj kꞌoj cyiꞌj txꞌilch ke twitz txꞌotxꞌ, cyimni ke, ex mi jun otok tzokpaj. 25 Xiꞌtzun Josafat cyucꞌix ke t-soldad kꞌilte ju kꞌiꞌntok cyuꞌn aj kꞌoj ex cnet nimcu kꞌinumabl cyuꞌn, ic tzaꞌn ke chej, ke macbil in che ajben tuj kꞌoj, ke xbalun ex nimcu mastl tiꞌxti wiꞌyilxix, ex e oc te tajwil tcyakil. Tuꞌnju nimcu tiꞌxti at, mintiꞌ bant tkꞌinjtz cyuꞌn. Ox kꞌij e ten in che kꞌin cyiꞌj ke tiꞌxti, porque attok nim.

26 Tujtzun tcyajin kꞌij oc cychmon cyib tuj chkꞌajlaj Beraca, ex atzun jaw cynimsaꞌn tbi Kman. Cyjaꞌtzun oc cykꞌoꞌn tbi lugar lu chkꞌajlaj Beraca, ex axtzun tbi toc jaꞌlo. 27 Te tibajxitzun jlu, cub nej Josafat cywitz cycyakil aj Judá ex aj Jerusalén, ex e ajtztzun meltzꞌaj tuꞌn cyul tuj Jerusalén in che tzalaj wen, porque ate Kman otok tzaj kꞌonte tzalajbil cye, tuꞌnju otok che clet tuꞌn tuj cykꞌab aj kꞌoj cyiꞌj. 28 Tejtzun cyul tuj Jerusalén e pon twitz tja Kman tucꞌil tkꞌajkꞌajel twi chnab arpa, quitar ex chun.

29 Ex cycyakil ke nasyon ateꞌ cyiꞌjele aj Israel tzaj nim cyxobil twitz Kman Dios, tej cybinte ka otok kꞌojin cyucꞌil aj kꞌoj cyiꞌj aj Israel. 30 Cyjaꞌtzun tej tcawin rey Josafat, ke xjal o che ten tuj txubtxaj, porque ate Dios tzaj kꞌonte xtalbil cyibaj ex mintiꞌtl e kꞌojin ke mastl nasyon cyiꞌj.

31 Cyjaꞌtzun tten o cawin Josafat cyibaj tiyjil Judá. Toctok twiꞌ 35 abkꞌi tej ttzyet tcawin ex o cawin 25 abkꞌi tuj Jerusalén. Aju ttxuꞌ Josafat Azuba tbi ex tmeꞌjel Silhi.

32 Tuj tumelxix o bet Josafat ic tzaꞌn te Asa aju ktzan tman, mintiꞌ el tpaꞌn tib tiꞌj be xi tiꞌn ktzan tman. Akeju tbinchben puro baꞌn e ela tuj twitz Kman. 33 Masque icju, pero mintiꞌ cyaj cycolin xjal ke lugar jatum in che cꞌulun cywiꞌ ke witz, porque naꞌnxtok tcub cyximan xjal tuꞌn cynimante Cydios ktzan cyxeꞌchel tuꞌn tcyakil cyanmi.

34 Aju chꞌintl txꞌolbaben tiꞌj tbinchben Josafat, atxix tej tkeꞌ tcawin ex tejxi tpon baj, atzun tzꞌiban tuj uꞌj cub ttzꞌiban Jehú aju tcyꞌajal Hanani, ex atzun tzꞌiban tuj libro cye ke rey cye aj Israel.

35 Tbajlenxi jlu, o mojeꞌ tyol Josafat aju rey cye aj Judá tucꞌil Ocozías aju rey cye aj Israel, ex ate Ocozías mya baꞌn tbinchben. 36 Oc tmojban tib tucꞌil tuꞌn tcub cybinchaꞌn ke barc tuꞌn cyxiꞌ tuj tnam Tarsis, ex atzun cub cybinchaꞌn tuj tnam Ezión-geber. 37 Atzunte Eliezer aju aj Maresa, aju tcyꞌajal Dodava, xi tmaꞌn te Josafat alcye tuꞌn tbaj tiꞌj te tibajxi: Cbajel tpaẍuꞌn Kman aju ma baj tbinchaꞌna tuꞌn tlaj ma mojeꞌ tyola tucꞌil Ocozías, chi Eliezer. Atzun ke barc e cub kꞌuchj ex ya mintiꞌ e jeꞌx tuj tnam Tarsis.