Oc mayoꞌn Josafat tuꞌn Jehú aju t-sanjel Dios
19
Tuj txubtxaj ajtz meltzꞌaj Josafat aju rey cye aj Judá, ex ul tja tuj Jerusalén. 2 Pero ate Jehú aju baꞌn nabin tuꞌn Dios, aju tcyꞌajal Hanani, xiꞌ canul tiꞌj rey Josafat ex xi tkanin te cyjaꞌ: ¿Tikuꞌn ma onina tiꞌj ju xjal mya baꞌn ex ma tzꞌoc tmojban tiba cyucꞌil ke xjal in che icꞌun tiꞌj Kman? Cyjaꞌtzun tuꞌn tlaj jlu, ma tzaj tkꞌoj Kman tiꞌja. 3 Masque icju pero at junjun baꞌn ma tbinchaya, porque ma che cub t-xituna ke tilbilal xuꞌj dios Asera, akeju ateꞌtok tuj txꞌotxꞌ Judá, ex ma tzꞌoc tilil tuꞌna tuꞌn tbant tajbil Dios, chi Jehú.E oc tkꞌoꞌn Josafat jwes cyxol aj Judá
4 Atzun najltok Josafat tuj Jerusalén, pero in xi ajtok visitaril cye t-xjalil, xiꞌynix tuj Beerseba ex ponin baj max tuj tiwitz txꞌotxꞌ cye aj Efraín, tuꞌn tajtz tiꞌj cyanmi xjal tuꞌn tucꞌil Kman aju Cydios ktzan cyxeꞌchel. 5 Ax icx e oc tkꞌoꞌn ke jwes cyuj cycyakil tnam toc muro cyiꞌj at tuj Judá. 6 Ex xi tmaꞌn cye ke jwes cyjaꞌ: Cykꞌoꞌnque cwent tiꞌj ju cbantel cyuꞌne, porque mya cyuꞌn xjal ma tzꞌoc kꞌoꞌn cyoclene, nok oꞌcx tuꞌn Kman aju ctel cyucꞌile oc tbant tiꞌj xtis cyuꞌne. 7 Cyjaꞌtzun, tenx tchiylal Kman cyeye ex ten cycwente tiꞌj ju cbantel cyuꞌne, porque mintiꞌ in tzalaj aju Kdios ka mya tuj tumel cxel cybinchaꞌne cyiꞌj xjal, ka ma tzꞌoc cykꞌoꞌne cywitze tiꞌj t-xilen xjal ex ka in xi cycꞌmone pwak tuꞌn miꞌn tcub cysentens xjal cyuꞌne.
8 Ex e oc tkꞌoꞌn Josafat junjun aj Leví, junjun pal ex junjun nejenel cyxol aj Israel tuj Jerusalén, tuꞌn cyajben tuj takꞌun Kman ex tuꞌn t-xi cybinchaꞌn tiꞌj kꞌoj cyxol xjal tuj Jerusalén. Cycyakil ke jlu ax najlke tuj Jerusalén. 9 Ex xi tmaꞌn cye alcye tuꞌn tbant cyuꞌn, chi cyjaꞌ: Che nimane te Kman tuj tcyakilju oc cybinchaꞌye, japunx tyol cyuꞌne ex che oque tzꞌaklxix. 10 Ka ma che tzaj ke cyxjalile cyuj nok alcyex cytanmi tuꞌn cyul xtisil cywitze tuꞌn tlaj otok cub cybyoꞌn jun xjal, ex ka ma che ul xjelil tiꞌj tley Dios, ex ka tiꞌj xnakꞌtzbil, ex ka cyiꞌj mandamyent, ex ka tiꞌj cawbil, cychicꞌbanxe cye alcye tuꞌn tbant cyuꞌn, tuꞌn miꞌn cybinchan il twitz Kman Dios, tuꞌntzun miꞌn ttzaj tkꞌoj cyiꞌje ex cyiꞌj xjal. Cybinchame jlu tuꞌntzun mintiꞌ cyile twitz Kman. 11 Aju tnejel pal Amarías, atzunju mas maꞌ toclen ctel cyxole tuꞌn tbaj nucꞌet tiꞌj tuꞌn tjapun tajbil Dios cyuꞌn xjal, atzunte Sebadías aju tcyꞌajal Ismael, aju nejenel cyxol ke tiyjil Judá, atzunju mas maꞌ toclen ctel cyxole tuꞌn t-xi binchet tuꞌn tjapun tley rey cyuꞌn xjal, ex atzun ke aj Leví che onil cyiꞌje. Tenx cyipune ex cytzyume akꞌuntl lu ex awt Kman ten cyucꞌile ka ma che akꞌnane tuj tumel.