2 Tbajlenxi junjun abkꞌi, xiꞌ Josafat tuj Samaria visitaril te Acab; atzunte Acab cub tbyoꞌn nim ẍneꞌl ex nim wacẍ te tchiꞌ Josafat ex te cychiꞌ ke tucꞌil, ex xi tmaꞌn Acab te Josafat ka jacu txiꞌ tucꞌil tuꞌn cyoc tzokpaj tiꞌj tnam Ramot aju at tuj txꞌotxꞌ Galaad. 3 Xitzun tkanin Acab aju rey cye aj Israel te Josafat aju rey cye aj Judá cyjaꞌ:

—¿Jacupe txiꞌya wucꞌile tuꞌn koc tzokpaj tiꞌj tnam Ramot aju at tuj Galaad?

Atzunte Josafat xi ttzakꞌweꞌn:

—Akine ex ke nsoldadiye lu koꞌye lu te onil teya ex te onil cye ke t-xjalila, jacu koꞌxe tucꞌila tuj kꞌoj. 4 Ax icx xi tmaꞌn: Pero naꞌnxtok tbant jlu kuꞌn, kaninxa te Kman ka baꞌn tuꞌn kxiꞌ.

5 Atzunte rey cye aj Israel e oc tchmoꞌn ke xjal otok tzꞌoc tkꞌoꞌn cyoclen ic tzaꞌn t-sanjel Dios, attok cyaje syent cybaj, xitzun tkanin cye cyjaꞌ:

—¿Baꞌnpe tuꞌn koc tzokpaje tiꞌj tnam Ramot aju at tuj Galaad, ex ka mya baꞌn?

Atzun cye tzaj cytzakꞌweꞌn:

—Toc tzokpaja tiꞌj porque cbel tiꞌj tuꞌna tuꞌn tipumal Dios.

6 Atzunte Josafat xi tkanintl te Acab:

—¿Mintiꞌpe juntl mer t-sanjel Dios at tzalu tuꞌn t-xi kkanin te?

7 Atzunte rey cye aj Israel xi ttzakꞌweꞌn te Josafat:

—Atx juntl baꞌn tuꞌn t-xi kkanin te alcye tajbil Kman. Atzun Micaías aju tcyꞌajal Imla, pero aju xjal lu icꞌun wuꞌne, porque mintiꞌ in tzaj tmaꞌn jun yol baꞌn weye, nok oꞌcx yol mya baꞌn in tzaj tmaꞌn weye tcyakil maj.

Atzunte Josafat xi tmaꞌn te:

—Miꞌn tmaya icju, tat Rey.

8 Tzajtzun ttxcoꞌn rey cye aj Israel jun xjal at toclen ttxlaj ex xi tmaꞌn te cyjaꞌ:

—Txcaꞌtza Micaías aju tcyꞌajal Imla tuꞌn tul naj tzalu.

9 Tzaꞌnx te rey cye aj Israel, ax icx te Josafat aju rey cye aj Judá, tocsaꞌn t-xbalun rey cyiꞌj, ex kꞌuklke tuj cykꞌukbil te cawbil ttxaꞌn peꞌn ttzi tpwertil tnam Samaria, ex cycyakil keju otok tzꞌoc kꞌoꞌn cyoclen mer ic tzaꞌn t-sanjel Dios in cychicꞌbaꞌn aju nnuꞌl tuj cynabl cywitz ke cabe rey lu. 10 Atzunte Sedequías aju tcyꞌajal Quenaana otok baj tbinchaꞌn jun cꞌuxbil mer ic tzaꞌn tcach wacẍ tten, ex in jawtok tkꞌajkꞌajel twiꞌ cyjaꞌ: Chitzun Kman ma tma: Atzun ke cach lu che ajbel tuꞌna tuꞌn toc tzokpaja cyiꞌj aj Siria ocxi cycub baj tuꞌna.

11 Cycyakil keju otok tzꞌoc kꞌoꞌn cyoclen mer ic tzaꞌn t-sanjel Dios ax yol in cymaꞌn; che chi in cymaꞌn te rey cyjaꞌ: Toc tzokpaja tiꞌj tnam Ramot aju at tuj Galaad, ex cbel tiꞌj tuꞌna, porque ate Kman ctzajel kꞌonte tnam lu tuj tkꞌaba tuꞌn tcub tiꞌj tuꞌna.

12 Atzunju sanjel otok txi samaꞌn txcolte Micaías xi tmaꞌn te:

—Cycyakil t-sanjel Dios ma txi cymaꞌn jun yol puro baꞌn te rey. Cyjaꞌtzun in chin cubsane twitza tuꞌn t-xi tmaꞌna ax yol ic tzaꞌnx ma cyma cycyakil, tuꞌn t-xi tmaꞌna jun yol puro baꞌn te.

13 Atzunte Micaías xi ttzakꞌweꞌn:

—Cxel nmaꞌne jun yol axix toc twitz Kman; oꞌcx cxel nmaꞌne aju yol ctzajel tmaꞌn Kman weye.

14 Pontzun Micaías twitz rey ex xi tkanin rey te:

—Micaías, ¿baꞌnpe tuꞌn koc tzokpaje tiꞌj tnam Ramot aju at tuj Galaad ex ka miꞌn?

Atzunte Micaías xi ttzakꞌweꞌn:

—Cyoc tzokpaje tiꞌj ex cbel tiꞌj cyuꞌne, porque axte Kman cꞌonil cyeye tuꞌn tcub tiꞌj cyuꞌne.

15 Atzunte rey xi tmaꞌn:

—¿Jteꞌ maj cxel nmaꞌne teya tuꞌn ttzaj tmaꞌna weye jun yol axix toc twitz Kman?

16 Atzunte Micaías xi tmaꞌn:

17 Xitzun tmaꞌn rey cye aj Israel te Josafat:

—¿Baka mintiꞌ ma txi nmaꞌne teya tiꞌj xinak lu mintiꞌ in tzaj tmaꞌn jun yol baꞌn weye, oꞌcx ju yol mya baꞌn in tzaj tman?

18 Ex tmatl Micaías:

—Cyjaꞌtzun cybintze aju tyol Kman: Ma wile Kman kꞌukl tuj tkꞌukbil cyucꞌix cycyakil keju ateꞌ tuj cyaꞌj nim cyajlal, waꞌl ke junx tucꞌil tuj tbankꞌab ex tuj tnayaj. 19 Ex chi Kman xi tkanin cye: ¿Alcye cxel toꞌyil te Acab aju rey cye aj Israel tuꞌn toc tzokpaj tiꞌj tnam Ramot aju at tuj Galaad, ex atzun tuꞌn tcyim ma chixin? Chi Kman. At junjun tzaj cymaꞌn junjun tumlal ex junjuntl tzaj cymaꞌn juntl tumlal. 20 Pero minaben pon jun xewbaj twitz Kman ex tma: Jacu chinxe toꞌyil te Acab. Atzunte Kman xi tkanin te tzaꞌn tten tuꞌn ttenba tuꞌn. 21 Atzunte xewbaj xi ttzakꞌweꞌn: Chin xeꞌle ex wuꞌne che yolil nicꞌaj yol cycyakil ke xjal o tzꞌoc tkꞌoꞌn Acab cyoclen mer ic tzaꞌn t-sanjela. Xitzun tmaꞌn Kman te: Cbel tiꞌj tnabl tuꞌna, txiꞌya ex binchama icju, chi Kman te xewbaj. 22 Atzun jaꞌlo ma tzaj tkꞌoꞌn Kman jun xewbaj nicꞌal yol tuꞌn tyolin tuj cytziꞌ ke xjal o tzꞌoc tkꞌoꞌna cyoclen ic tzaꞌn t-sanjel Dios ex ma tma Kman tuꞌn tnaja, chi Micaías.

23 Atzunte Sedequías aju tcyꞌajal Quenaana pon ttxlaj Micaías, oc ttzꞌajan jun twitz Micaías ex tma:

—¿Baka ma tzꞌel tpaꞌn tib T-xew Kman wiꞌje tuꞌn tyolin tucꞌila?

24 Atzunte Micaías xi ttzakꞌweꞌn:

—Cꞌelel tnicꞌa tiꞌj tuj kꞌij oc t-xiꞌya ewal tiba tujile cyja xjal.

25 Xitzun tmaꞌn rey Acab cye aj sanjelal:

—Cytzyuntze Micaías ex cyiꞌnxe twitz Amón aju cawil tuj tnam, ex twitz Joás aju ncyꞌajale, tuꞌn tocx tuj pres. 26 Cymanxe cye ka akine ma chin kꞌmante tuꞌn tocx tuj pres, ex cymanxe tuꞌn t-xi kꞌot nok chꞌin twa ex nok chꞌin tcꞌa aꞌ ocxi wul meltzꞌaje tuj txubtxaj otok chin cambane tuj kꞌoj.

27 Atzunte Micaías xi tmaꞌntl:

Ax icx xi tmaꞌntl: Cybinxe aju yol ma txi nmaꞌne cyeye, akeye tnam xjal, chi Micaías.

28 Cyjaꞌtzun ate Acab aju rey cye aj Israel, tucꞌix Josafat aju rey cye aj Judá, e jeꞌx kꞌojlel tiꞌj tnam Ramot aju at tuj Galaad. 29 Aju rey cye aj Israel xi tmaꞌn te Josafat cyjaꞌ:

—Cꞌelel nchꞌexpuꞌne nxbalune tuꞌntzun miꞌn tel nicꞌbaj wiꞌje oc nkꞌojine, atzun teya baꞌn tuꞌn toc tkꞌoꞌna t-xbalun rey tiꞌja.

Eltzun tchꞌexpuꞌn Acab t-xbalun tuꞌn miꞌn tel nicꞌbaj tiꞌj, ex tzyettzun kꞌoj cyuꞌn. 30 Pero ate rey cye aj Siria otok txi tmaꞌn cye ke capitán cye ke tcarwaj in che ajben tuj kꞌoj, oꞌcx tuꞌn cyoc tzokpaj tiꞌj rey cye aj Israel, ex mya tiꞌj junxitl. 31 Tejtzun tilwaj Josafat cyuꞌn ke capitán, akeju ateꞌcx tuj carwaj in che ajben tuj kꞌoj, cub cyximan ka atzun rey cye aj Israel jlu, ex baj cytxolban cyib tuꞌn cyoc tzokpaj tiꞌj, atzunte Josafat jaw schꞌin, ex ate Dios o onin te, e el tlakꞌbaꞌn Dios ke aj kꞌoj tiꞌj. 32 Tejtzun tel cynicꞌ ke capitán tiꞌj ka mya a rey cye aj Israel jlu, ya mintiꞌtl e oc lpeꞌ tiꞌj tuꞌn tcub cyuꞌn. 33 Pero at jun soldad aj Siria nok elaj xi t-xoꞌn jun plech, ex tcꞌulbacu a Acab aju rey cye aj Israel aꞌw tuꞌn, ex atzun xiꞌ ju plech jatum ocni mojeꞌ chicyet cꞌuxbil toc tiꞌj. Xitzun tmaꞌn rey Acab teju yucul tcarwaj:

—Chux kꞌon welt carwaj tuꞌna, ex chin tiꞌn exa tzalu tuj kꞌoj, porque nim weye ma tzaꞌw, chi Acab.

34 Cyuwxix kꞌoj oc tuj kꞌij lu, atzunte rey cye aj Israel ax cub waꞌlbaꞌn tuj tcarwaj cywitz aj Siria tejxi toc kax. Tej chꞌixtok tex kꞌij cyimtzun.