3 O onin Kman tiꞌj Josafat porque o tbincha ic tzaꞌn o tbincha David t-xe tnejel, aju ktzan t-xeꞌchel, ex mintiꞌ oc ten cꞌulul cywitz ke tilbilal Baal, 4 nok oꞌcx ajben te Dios aju Tdios ktzan tman, ex e japun ke tmandamyent tuꞌn, ex mintiꞌ oc lpeꞌ tiꞌj cybinchben aj Israel. 5 Cyjaꞌtzun tzaj tkꞌoꞌn Kman tipun tcawbil, ex cycyakil aj Judá pon cyiꞌn oyaj te. Ten nim tkꞌinumabl ex nimbilte. 6 Nim tgan tuꞌn tbet tuj tbe Kman, ex e el tiꞌn ke lugar tuj Judá jatum in che cꞌulun ke xjal cywiꞌ ke witz, cyucꞌix ke tilbilal xuꞌj dios Asera.

7 Tej otok bant ox abkꞌi ttzyetlen tcawin Josafat, e jeꞌx t-samaꞌn ke xjal maꞌ cyoclen ttxlaj, ex atzun ke jlu: Ben-hail, Abdías, Zacarías, Natanael, ex Micaías, tuꞌn t-xi cykꞌoꞌn xnakꞌtzbil cye ke xjal cyuj ke tnam at tuj Judá, 8 ex cyucꞌil ke jlu e jeꞌx ke aj Leví lu: Semaías, Netanías, Zebadías, Asael, Semiramot, Jonatán, Adonías, Tobías ex Tobadonías, ex cyucꞌix ke pal Elisama ex Joram e jeꞌx cyucꞌil. 9 E jeꞌx t-samaꞌn ex kꞌiꞌntok aju libro cyuꞌn jatum tzꞌiban tley Kman tuj, tuꞌntzun t-xi cykꞌoꞌn xnakꞌtzbil cye aj Judá, ex baj cybetin cyuj cycyakil tnam at tuj Judá, in cykꞌoꞌntok xnakꞌtzbil cye tnam xjal.

10 Cycyakil keju in che cawin cyuj ke nasyon ateꞌ tiꞌjele Judá tzaj nim cyxobil twitz Kman ex mintiꞌ e oc ten kꞌojlel tiꞌj Josafat. 11 Nokpe at junjun cyxol aj Filistey pon cyiꞌn oyaj te Josafat ex pon cyiꞌn sak pwak te chojenj, ax icx ke aj Arabia pon cyiꞌn wuk mil tucꞌil wuk syent tman ẍneꞌl, ex wuk mil tucꞌ wuk syent tman chip. 12 Nok cyjaꞌ o chꞌiy tipumal tcawbil Josafat. E jaw tbinchaꞌn ke ja maꞌ cywaꞌl te xkꞌukbil cye tnam at tuj Judá, ax icx e jaw tbinchaꞌn ke tnam jatum tuꞌn t-xi cꞌuꞌt twitz awal cyuj. 13 Ex o ten nim tkꞌinumabl cyuj ke tnam at tuj Judá, ax icx tuj Jerusalén e ten nim t-soldad cyuw cycꞌuꞌj tuj kꞌoj, 14 ex atzun cyajlal jlu ic tzaꞌnx junjun cꞌloj cyiyjil:

Cyxol tiyjil Judá, aju comandant cye ke nejenel at jun milchak soldad tuj cycwent, atzun Adnas, ex attok ox syent mil soldad tuj tcwent, cyuw cycꞌuꞌj tuj kꞌoj. 15 Aju tcabin comandant, atzun Johanán; ate Johanán at cab syent tucꞌil 80 mil soldad tuj tcwent, 16 aju toxin comandant, atzun Amasías aju tcyꞌajal Zicri; ate xjal lu tuꞌn tex tgan otok txi tkꞌon tib tuꞌn tajben te Kman, ex at cab syent mil soldad tuj tcwent, cyuwxix cycꞌuꞌj tuj kꞌoj.

17 Cyxol ke tiyjil Benjamín, aju comandant atzun Eliada; aju xjal lu cyuw tcꞌuꞌj tuj kꞌoj ex attok cab syent mil soldad tuj tcwent, banin cyten tucꞌil xobl cyplech ex cymakbil, 18 atzun juntl comandant, atzun Jozabad, ex attok jun syent tucꞌil 80 mil soldad tuj tcwent, banin cyten tuꞌn cyxiꞌ tuj kꞌoj.

19 Atzun ke jlu in che ajben te rey ex mintiꞌ e oc te tajlal akeju otok che cub tkꞌoꞌn rey cyuj cycyakil tnam toc muro cyiꞌj at tuj Judá.