Bant tiꞌj jun cyyol Asa tucꞌil Ben-adad
16
Pero tej otok bant 36 abkꞌi ttzyetlen tcawin rey Asa, xiꞌ Baasa aju rey cye aj Israel ex oc tzokpaj tiꞌj tnam Judá, oc tkꞌoꞌn muro tiꞌj tnam Ramá tuꞌntzun mi jun tuꞌn tetz ex mi tuꞌn tocx tuj txꞌotxꞌ Judá jatum in cawin rey Asa. 2 Etztzun tiꞌn Asa kꞌan pwak ex sak pwak, aju tocx tuj tja Dios ex tuj tex tja, xi t-samaꞌn tucꞌil Ben-adad aju rey te Siria, aju najltok tuj tnam Damasco. Ax icx xi t-samaꞌn jun tkanil te cyjaꞌ: 3 E tbant tiꞌj jun kyol kcabil ic tzaꞌn cybincha ktzan kman ojtxi. Lu ma pon nsamaꞌne kꞌan pwak ex sak pwak te oyaj teya. Kꞌuchan cuba aju yol o cyaj bant tiꞌj tuꞌna tucꞌil Baasa aju rey cye aj Israel, tuꞌntzun miꞌn tkꞌojin wiꞌje.4 Atzunte rey Ben-adad cub tuj twitz aju tkanbetz rey Asa, xitzun t-samaꞌn ke nejenel cye soldad tuꞌn cyoc tzokpaj cyiꞌj ke tnam cye aj Israel. Cyjaꞌtzun e tzyet ke tnam lu tuꞌn: Ijón, Dan, Abel-maim ex cycyakil ke tnam in che ajben te cꞌubl twitz awal tuj cytxꞌotxꞌ aj Neftalí. 5 Tejtzun tbinte Baasa jlu xi tcolin tuꞌn toc tkꞌoꞌn muro tiꞌj tnam Ramá, ex biꞌx xi tcolin akꞌuntl. 6 E tzajtzun tiꞌn rey Asa cycyakil aj Judá ex xi cyiꞌn ke abj ex ke tzeꞌ ateꞌ tuj tnam Ramá, akeju otok che ajben tuꞌn Baasa tuꞌn toc tkꞌoꞌn muro tiꞌj, ex cyuꞌntzun ke abj ex ke tzeꞌ lu oc tkꞌoꞌn rey Asa muro tiꞌj tnam Geba ex Mizpa.
7 Tuj tkꞌijlalil lu pon Hanani, aju baꞌn nabin tuꞌn Dios, tucꞌil Asa aju rey tuj Judá ex xi tmaꞌn te: Tuꞌnju ma tzꞌoc keꞌ tcꞌuꞌja tiꞌj rey cye aj Siria ex mya tiꞌj Kman aju Tdiosa ma tzoc keꞌ tcꞌuꞌja, cyjaꞌtzun ma che tzokpaj ke t-soldad rey te Siria tuj tkꞌaba. 8 Ke aj Etiopía ex ke aj Libia, ¿myapetzun nimxix cyajlal soldad lu tucꞌix nim cyajlal xjal cyjax cyibaj chej cyucꞌix ke carwaj in che ajben tuj kꞌoj? Masque icju axte Kman xi kꞌonte cye tuj tkꞌaba porque oc keꞌ tcꞌuꞌja tiꞌj. 9 Porque ate Kman in queꞌyin tiꞌj tcyakilju in baj twitz txꞌotxꞌ ex in xi tkꞌoꞌn cyipun keju axix toc nnoꞌc keꞌ cycꞌuꞌj tiꞌj. Atzun teya mintiꞌ tnabla tuꞌnju ma tbinchaya jlu. Cyjaꞌtzun texju jaꞌlo cucx cꞌoquel mastl kꞌoj tucꞌila, chi Hanani.
10 Atzunte Asa tzaj tkꞌoj tiꞌj Hanani, aju baꞌn nabin tuꞌn Dios, ex ocx tpresin. Ax icx tuj tkꞌijlalil lu e baj tyajlaꞌn junjun xjal ateꞌ tuj tnam.
Tej tcyim Asa
11 Aju txꞌolbaben tiꞌj tbinchben Asa atxix tej tkeꞌ tcawbil ex tejxi tpon baj, atzun tzꞌiban tuj uꞌj jatum taꞌ txꞌolbaben cyiꞌj ke rey cye aj Judá ex cye aj Israel. 12 Tej otok bant 39 abkꞌi ttzyetlen tcawin Asa oc jun yabil cyuwxix cyiꞌj ke tkan, pero tej tyabt mintiꞌ oc ten kanil onbil te Kman, nok oꞌcx xiꞌ cyucꞌil ke kꞌanal. 13 Cyimtzun Asa tej otok bant 41 abkꞌi ttzyetlen tcawin, 14 ex ocx makuꞌn tuj ju mukbil aju otok txi tmaꞌn tuꞌn tbaj binchaꞌn tuj ju tnam toc tbi Ttanmi David. Cub kꞌoꞌn twitz jun tal watbil nojni tuꞌn perjum ex tuꞌn tcyakil txcaj tcꞌocꞌjal tbanilxix wen, ex cub cykꞌoꞌn jun nintz kꞌakꞌ te nimbilte.