Tej ttzyet tcawin Abiam tuj Judá
15
Tuj twajxaklajin abkꞌi ttzyetlen tcawin rey Jeroboam aju tcyꞌajal Nabat, tzyet tcawin Abiam tuj Judá. 2 Ox abkꞌi o cawin tuj Jerusalén. Aju ttxuꞌ Maaca tbi ex tmeꞌjel Abisalom. 3 Ax il tbincha Abiam ic tzaꞌnju il otok tbincha ktzan tman, ex mintiꞌ ajben te Kman aju Tdios tuꞌn tcyakil tanmi ic tzaꞌn te David aju ktzan t-xeꞌchel. 4 Masque icju, nok tuꞌnju tcꞌujlalil Kman tiꞌj David, mintiꞌ cub yupj tiyjil tuꞌn, cyjaꞌtzun tcyimlenxi Abiam, ax jun tcyꞌajal oc tkꞌoꞌn te rey te t-xel, ex cyaj tcyuwsaꞌn ju tnam Jerusalén; 5 porque ate David otok bet tuj tumelxix twitz Kman, ex tuj tcyakil tankꞌibl mintiꞌ el tpaꞌn tib tiꞌj aju otok tzaj tmaꞌn Kman te; oꞌcxcu jun mya baꞌn tbincha tiꞌj Urías aju aj Hetey.6 Tej itzꞌxtok Roboam, cucx oc kꞌoj cyxol tucꞌil Jeroboam, ex tej tcyim Roboam, 7 ax icx oc kꞌoj cyxol Abiam tucꞌil Jeroboam. Aju chꞌintl txꞌolbaben tiꞌj Abiam ex tiꞌj tcyakil aju tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey te Judá. 8 Ex tejtzun tcyim Abiam, cuꞌx makuꞌn tuj ju tnam Ttanmi David tbi. Te tibajxi, aju o cawin te t-xel atzun Asa aju tcyꞌajal.
Tej ttzyet tcawin Asa tuj Judá
9 Otok bant winkin abkꞌi ttzyetlen tcawin Jeroboam aju rey cye aj Israel, tej ttzyet tcawin Asa tuj Judá. 10 O cawin tuj Jerusalén 41 abkꞌi. Aju tyaꞌ Maaca tbi ex tmeꞌjel Abisalom.
11 Ke tbinchben Asa baꞌn e ela tuj twitz Kman, ic tzaꞌnx ke tbinchben David aju ktzan t-xeꞌchel. 12 E jeꞌx tlajoꞌn tuj txꞌotxꞌ akeju xinak in che yaẍin ax tucꞌil juntl xinak, ex el tiꞌn cycyakil ke tilbilal otok che baj cybinchaꞌn ke t-xeꞌchel. 13 Ax icx el tiꞌn toclen Maaca aju tyaꞌ ex t-xuꞌjil ktzan rey Roboam, porque otok txi tmaꞌn Maaca tuꞌn tbant jun tilbilal xuꞌj dios Asera. Cub t-xitun Asa aju tilbilal lu, ex cub tpatun tuj tkꞌab xak Cedrón. 14 Masque mintiꞌ e jeꞌl kꞌiꞌn ke ja te cycꞌulbil xjal mya nimal Dios ke, pero cucx ajben Asa te Kman tuꞌn tcyakil tanmi, 15 ex ocx tkꞌoꞌn tuj tja Kman cycyakil kꞌan pwak ex sak pwak aju toyaj otok txi tkꞌoꞌn te Dios, ex tucꞌixju otok txi tkꞌoꞌn ktzan tman.
Bant tiꞌj jun cyyol Asa tucꞌil Ben-adad
16 Cucx oc kꞌoj cyxol Asa tucꞌil Baasa aju rey cye aj Israel. 17 Tej t-xiꞌ Baasa tuꞌn toc tzokpaj cyiꞌj ke tnam te Judá, oc tkꞌoꞌn muro tiꞌj tnam Ramá, tuꞌntzun mi jun xjal tuꞌn tpon tuj txꞌotxꞌ Judá ex mi jun aj Judá tuꞌn tetz tuj ttanmi. 18 Tzajtzun tiꞌn Asa tcyakil kꞌan pwak ex sak pwak aju atxtok tuj tja Kman ex tuj tja rey, ex xi tkꞌoꞌn cye ke xjal maꞌ cyoclen ateꞌ ttxlaj, tuꞌn t-xi cyiꞌn tucꞌil Ben-adad aju rey te Siria, aju tcyꞌajal Tabrimón ex tal tchman Hezión ex atzun najltok Ben-adad tuj Damasco. Ax icx xi t-samaꞌn jun tkanil cyjaꞌ: 19 E tbant tiꞌj jun kyol kcabil ic tzaꞌn cybincha ke ktzan kman. Lu ma txi nsamaꞌne kꞌan pwak ex sak pwak te jun oyaj teya. Kꞌuchin cuba aju yol cyajni bant tiꞌj tuꞌna tucꞌil Baasa aju rey cye aj Israel, tuꞌntzun miꞌn cucx tkꞌojin wiꞌje.
20 Atzunte Ben-adad cub tuj twitz aju otok cub t-ximan rey Asa, e jeꞌxtzun t-samaꞌn ke nejenel cye ke t-soldad kꞌojlel cyiꞌj ke tnam cye aj Israel. Cyjaꞌtzun e tzyet ke tnam lu tuꞌn: Ijón, Dan, ex Abel-bet-maaca, tucꞌix tcyakil txꞌotxꞌ Cineret ex tcyakil txꞌotxꞌ cye aj Neftalí. 21 Tejtzun tbinte Baasa jlu, xi tcolin tuꞌn toc tkꞌoꞌn muro tiꞌj tnam Ramá ex aj meltzꞌaj tuj tnam Tirsa. 22 E txquettzun cycyakil aj Judá tuꞌn rey Asa, mi jun tuꞌn tcyaj ten, ex xi cyiꞌn ke abj cyucꞌix ke tzeꞌ, akeju otok che ajben tuꞌn Baasa tuꞌn toc tkꞌoꞌn muro tiꞌj tnam Ramá, ex cyuꞌntzun ke abj ex ke tzeꞌ lu, jaw tbinchaꞌn rey Asa tnam Geba tuj cytxꞌotxꞌ tiyjil Benjamín, tucꞌix ju tnam Mizpa.
Tej tcyim Asa
23 Aju chꞌintl txꞌolbaben cabalxix tiꞌj Asa ex tiꞌj tbinchben maꞌxix toclen, ex tiꞌj tcyakilju o tbincha ex cyiꞌj ke tnam e jaw tbinchaꞌn, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey te Judá.
Tej ttijin wen, oc jun yabil cyiꞌj ke tkan. 24 Tejtzun tcyim, cuꞌx makuꞌn cyucꞌil ktzan t-xeꞌchel tuj tnam Ttanmi David tbi. Te tibajxi aju o cawin te t-xel, atzun Josafat aju tcyꞌajal.
Tej ttzyet tcawin Nadab cyxol aj Israel
25 Otok bant cab abkꞌi ttzyetlen tcawin Asa tuj Judá tej ttzyet tcawin Nadab cyxol aj Israel. Ate jlu tcyꞌajal Jeroboam ex nok cab abkꞌi o cawin. 26 Pero mya baꞌn e ela ke tbinchben tuj twitz Kman. O tbincha ic tzaꞌnx ke il otok tbincha ktzan tman, ex cyuꞌntzun ke jlu e binchan aj Israel il. 27 Atzunte Baasa aju tcyꞌajal Ahías aju tiyjil Isacar, baj tchmoꞌn jun cꞌloj xjal junx cyximbetz tucꞌil tuꞌn cykꞌojin tiꞌj Nadab, ex cub byoꞌn Nadab cyuꞌn tuj tnam Gibetón, aju tnam lu cye aj Filistey. Ate Nadab cyucꞌix cycyakil soldad aj Israel otok baj cytxolban cyib tiꞌj tnam Gibetón tuꞌn cykꞌojin tiꞌj.
28 Otok bant ox abkꞌi ttzyetlen tcawin Asa tuj Judá tej tcub byoꞌn Nadab tuꞌn Baasa, ex ax te Baasa cyaj ten cawil te t-xel Nadab cyxol aj Israel. 29 Ex nok oꞌcx tej ttzyet tcawin e cub tbyoꞌn cycyakil ke xjal at cyxilen tucꞌil Jeroboam; mi jun cyaj ankꞌin tuꞌn ic tzaꞌnx otok tma Kman te Ahías aju aj Silo. 30 Bant icju tuꞌn cylaj il e tbincha Jeroboam, ex cyuꞌntzun ke jlu e binchan aj Israel il, ex cyjaꞌtzun tzaj tkꞌoj Kman aju Cydios aj Israel.
31 Aju chꞌintl txꞌolbaben tiꞌj Nadab ex tiꞌj tcyakil aju tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey cye aj Israel.
32 Cucx oc kꞌoj cyxol Asa tucꞌil Baasa aju rey cye aj Israel.
Tej ttzyet tcawin Baasa cyxol aj Israel
33 Otok bant ox abkꞌi ttzyetlen tcawin Asa tuj Judá tej ttzyet tcawin Baasa tuj tnam Tirsa cyibaj cycyakil aj Israel. Ate Baasa tcyꞌajal Ahías, ex o cawin 24 abkꞌi. 34 Pero ke tbinchben mya baꞌn e ela tuj twitz Kman, porque ax ke il e tbincha ic tzaꞌn keju tbincha Jeroboam, ex tuꞌn jlu e binchan aj Israel il.