Tej tcawin Asa tuj Judá
14
Tejtzun tcyim Abías, cuꞌx makuꞌn tuj tnam toc tbi Ttanmi David. Te tibajxi aju o cawin te t-xel, atzun Asa aju tcyꞌajal. Tuj tkꞌijlalil tej tcawin Asa puro tuj txubtxaj e ten aj Judá tuj laj abkꞌi. 2 Akeju tbinchben Asa puro baꞌn ex tzꞌaklxix e eꞌla tuj twitz Kman aju Tdios. 3 E el tiꞌn ke altar cye ke tilbilal nnoꞌc cydiosin xjal, akeju in che tzaj kꞌiꞌn tuj junxitl nasyon, ax icx ke lugar jatum in che cꞌulun ke xjal cywiꞌ ke witz; e baj tbuchin ke abj xjansamaj ex e cub t-xitun ke tilbilal xuꞌj dios Asera. 4 Ax icx xi tmaꞌn cye aj Judá tuꞌn cyoc lpeꞌ tiꞌj Kman aju Cydios ktzan cyxeꞌchel, ex tuꞌn cyjapun ke tley ex ke tmandamyent cyuꞌn. 5 Cyuj cycyakil tnam ateꞌ tuj Judá e baj t-xitun ke lugar ex ke altar jatum in che cꞌulun ke xjal cywiꞌ ke witz, ex puro tuj txubtxaj o che ten xjal tjakꞌ tcawbil.6 Tuj tkꞌijlalil lu e jaw tbinchaꞌn Asa ke tnam toc muro cyiꞌj ateꞌ tuj Judá, porque tuj txubtxaj taꞌtok tnam, ex mintiꞌ jun o kꞌojl tiꞌj, ex tuꞌn Kman e ten tuj txubtxaj. 7 Ex xi tmaꞌn cye aj Judá: Kbinchan jaw ke tnam lu, ex kbinchan jaw muro cyiꞌjele, kbinchan jaw ke ja maꞌ cywaꞌl jatum tuꞌn cyocx ten ke xkꞌukil tnam, kkꞌoꞌn oc ke cypwertil cyucꞌix ke tranc cyiꞌj acux at txꞌotxꞌ tuj kcwent, porque ma ko niman te Kman aju Kdios ex baꞌn kten cyucꞌil mastl nasyon, chi Asa cye aj Judá. Cyjaꞌtzun jaw cybinchaꞌn ke tnam ex baꞌn ela cyakꞌun.
8 Cyxol aj Judá attok ox syent mil t-soldad Asa banin cyten tucꞌil cymakbil ex cylans, ex attok cab syent tucꞌil 80 mil aj Benjamín ax icx banin cyten tucꞌil cymakbil ex xobl cyplech. Cycyakil ke soldad lu cyuwxix cycꞌuꞌj tuj kꞌoj. 9 At jun xjal aj Etiopía Zera tbi tzaj kꞌojlel cyiꞌj, ul tucꞌil txkan soldad nimxix cyajlal wen, cyucꞌix ox syent carwaj in che ajben tuj kꞌoj ex pon max tuj tnam Maresa. 10 Etztzun Asa cyucꞌix ke t-soldad tuꞌn cyoc tzokpaj cyiꞌj, ex bant cyten tuꞌn ttzyet kꞌoj cyuꞌn tuj chkꞌajlaj Sefata, aju tcub ttxlaj tnam Maresa. 11 Octzun ten Asa naꞌl Dios ex xi tmaꞌn cyjaꞌ: Aya Nman, junx taꞌ te teya tuꞌn tonina tiꞌj ju xjal mintiꞌ tipun ex ka tiꞌj ju xjal at nim tipun. Cyjaꞌtzun ko tonintza, porque tiꞌja ma tzꞌoc keꞌ kcꞌuꞌje, ex tuꞌn tipumala ma ko tzaje kꞌojlel cyiꞌj ke soldad lu. Nman, aya Kdiose, miꞌn takꞌa ambil tuꞌn tcub tiꞌja cyuꞌn xjal, chi Asa.
12 Entons nok tuꞌn tipumal Dios cub cyiꞌj aj Etiopía tuꞌn Asa ex cyuꞌn aj Judá, ex e jeꞌl ok. 13 Pero ate Asa cyucꞌix ke t-soldad e oc lpeꞌ cyiꞌj tuꞌn cycub cyuꞌn tejxi cypon tuj tnam Gerar, atzun e cub byoꞌn ke aj Etiopía cyuꞌn ke soldad ex mi jun cyaj ankꞌin cyuꞌn; cycyakil e baj cyim nok tuꞌn tipumal Kman, ex tzaj cyiꞌn nimcu tiꞌxti otok cyaj ten cyuꞌn aj kꞌoj. 14 Te tibajxi e oc tzokpaj cyiꞌj ke tnam ateꞌ tiꞌjele Gerar, porque cycyakil xjal otok tzaj cyxobil twitz Kman. Etz cyiꞌn aj Judá nimcu kꞌinumabl cyuj ke tnam lu. 15 Ax icx e oc tzokpaj cyiꞌj cycampament ke cwentil alumaj ex tzaj cyiꞌn nimcu ẍneꞌl ex camey. Te tibajxi e ajtz meltzꞌaj tuꞌn cyul tuj Jerusalén.