Oc kꞌoj cyxol Abías tucꞌil Jeroboam. 3 Tzyettzun kꞌoj tuꞌn Abías cyucꞌix cyaje syent mil soldad otok che jaw t-scꞌoꞌn. Ax icx te Jeroboam bant tten tuꞌn tkꞌojin tiꞌj Abías, cyucꞌix wajxak syent mil soldad scꞌoꞌmaj tuꞌn. 4 Tejtzun cypon ke soldad aj Judá twi witz Zemaraim aju tcub tuj tiwitz txꞌotxꞌ cye aj Efraín, xi schꞌin rey Abías tiꞌj rey Jeroboam ex cyiꞌj aj Israel ex xi tmaꞌn cyjaꞌ: Chin cybintze: 5 ¿Mintiꞌpe baꞌn cyuꞌne, ate Kman aju Cydios aj Israel o txi tkꞌoꞌn ju cawbil te jumajx te David ex cye ke tiyjil, ex aju yol o tzaj ttziyan Dios te David mlay chꞌexpet? 6 Pero ate Jeroboam aju tcyꞌajal Nabat ex tmajen Salomón, jaw tiꞌn tib tiꞌj Salomón aju tcyꞌajal David, 7 ex oc cychmon cyib junjun xinak tucꞌil, cyꞌaj ke ex mya baꞌn cymod, ex mas icꞌ nej cyyol twitz tyol Roboam aju tcyꞌajal Salomón, porque ate Roboam matok cuꞌxunx ex naꞌnxtok tbant t-ximan tiꞌj alcye tuꞌn tbant tuꞌn. Cyjaꞌtzun mintiꞌ ten tipun tuꞌn tweꞌ cywitz. 8 Atzun jaꞌlo cyaje tuꞌn tcub tiꞌj tcawbil Kman cyuꞌne, aju at tuj cykꞌab ke tiyjil David, nok tuꞌnju nimxix cyeye cybet ex tuꞌnju at ke cyilbilal tal wacẍ kꞌan pwak cyucꞌile, akeju e cub tbinchaꞌn Jeroboam tuꞌn cyoc te cydiose. 9 Ax icx o tzꞌex cylajoꞌne ke pal te Kman, akeju tiyjil Aarón, cyucꞌix ke aj Leví, ex o tzꞌoc cykꞌoꞌne cyoclen junjun xjal te pal tuꞌn cyajben cyxole ic tzaꞌn in cybinchaꞌn ke nasyon mya nimal Dios. Nok alcye jun xjal ma tzul xjansal tib kꞌiꞌn jun tal wacẍ tuꞌn tucꞌix wuk ẍneꞌl, jacu tzꞌoc te pal tuꞌn tajben cye ke tilbilal nnoꞌc cydiosine. 10 Atzun keye, aju Kdiose a Kman, ex mintiꞌ ma cyaj kcoline. Akeju keye kpal in che ajben te Kman, tiyjil Aarón ke ex atzun ke aj Leví in che onin cye; 11 tcyakil prim ex tcyakil kale in xi cykꞌoꞌn ke oyaj patun in che cub te Kman, tucꞌix storac, ex in che cub cykꞌoꞌn ke pan twi mes xjansamaj, ex tcyakil kale nnoꞌc cytxakoꞌn ke candil tuꞌn cycꞌant twi cycubil kꞌan pwak cytxꞌotxꞌil. Porque keye in japun kuꞌne aju in tzaj tmaꞌn Kman aju Kdiose, atzun cyeye ma cyaj cycoline. 12 Tzꞌelx cynicꞌe tiꞌj, ate Dios at kucꞌile tuꞌn tcub nej kwitze, ex ke pal in che ajben te banin cyten tuꞌn toc cykꞌajtzaꞌn ke chun tuꞌn toc kꞌoj kuꞌne cyucꞌile. Cyjaꞌtzun, akeye aj Israel, miꞌn che kꞌojine tiꞌj Kman aju Cydios ktzan kxeꞌchel, porque mlay cub tiꞌj cyuꞌne, chi Abías.

13 Pero e jeꞌx t-samaꞌn Jeroboam txkan soldad cyiꞌjxi aj Judá tuꞌntzun cytzaj kꞌojlel cyiꞌj, atzun txkantl t-soldad Jeroboam e cyaj ten cywitz aj Judá tuꞌntzun cyoc tzokpaj kꞌojlel cyiꞌj. 14 Tejtzun cylonte aj Judá cyjaꞌtok cyoc tzokpaj t-soldad Jeroboam kꞌojlel cyiꞌjxi ax icx cywitz, e cubsan twitz Kman ex e octzun ten ke pal kꞌajtzalte chun. 15 Tejtzun cyjaw schꞌin aj Judá tuꞌn toc kꞌoj, cub tiꞌj Jeroboam cyucꞌix cycyakil aj Israel tuꞌn Abías ex cyuꞌn aj Judá, nok tuꞌn tipumal Dios. 16 E eltzun ok aj Israel cywitz aj Judá, porque ax te Dios otok txi kꞌonte cye tuj cykꞌab aj Judá. 17 Nimxix xjal cyim tuꞌn Abías ex cyucꞌix ke t-soldad, cub cybyoꞌn jweꞌ syent mil soldad, akeju mejor che kꞌojin ateꞌ cyxol aj Israel. 18 Cyjaꞌtzun tten cub cyiꞌj aj Israel tuj tkꞌijlalil lu, ex ake aj Judá e camban porque oc keꞌ cycꞌuꞌj tiꞌj Kman aju Cydios ktzan cyxeꞌchel.

19 Cucx oc ten Abías kꞌojlel tiꞌj Jeroboam ex el tiꞌn ke tnam lu tuj tcwent: Betel, Josana ex Efraín, cyucꞌix ke cy-aldey. 20 Mintiꞌtl oc tipun tcawbil Jeroboam tej itzꞌxtok Abías. Te tibajxi oc cꞌixbisaꞌn Jeroboam tuꞌn Kman ex biꞌx cyim, 21 atzunte Abías oc mastl tipun tcawbil. O ten cyajlaj t-xuꞌjil ex tzaj 22 tcyꞌajal ex kaklaj tmeꞌjel. 22 Aju chꞌintl txꞌolbaben tiꞌj Abías ex tiꞌj tcyakilju o tbincha tuj tankꞌibl, atzun tzꞌiban tuj uꞌj cyaj ttzꞌiban Iddo aju t-sanjel Dios.