Pon Sisac kꞌojlel tiꞌj txꞌotxꞌ Judá
12
Tej tcyuwset tcawbil Roboam ex tej tnaꞌnte attok nim tipun tuj tcawbil, cyaj tcolin tuꞌn tjapun tley Kman tuꞌn, ax icx o cybincha cycyakil aj Israel. 2 Ex tuꞌnju el cypaꞌn cyib tiꞌj Kman, cyjaꞌtzun tuj tjweꞌyin abkꞌi ttzyetlen tcawin rey Roboam oc tzokpaj Sisac aju rey te Ejipt tiꞌj Jerusalén, 3 pon tucꞌil jun mil tucꞌil cab syent carwaj in che ajben tuj kꞌoj, tucꞌix 60 mil soldad cyjax cyibaj chej ex cyucꞌix mastl soldad nimxix cyajlal tzaj cyucꞌin cyib tuj Ejipt; ake jlu aj Libia, aj Suquín ex aj Etiopía ke. 4 Ke tnam toc muro cyiꞌj tuj Judá cub cyiꞌj tuꞌn ex pon max nikayin ttxlaj Jerusalén.5 Pontzun Semaías aju t-sanjel Dios tucꞌil Roboam ex cyucꞌil ke nejenel cye aj Judá, akeju otok pon cychmon cyib tuj tnam Jerusalén tuꞌnju in che xobtok twitz Sisac, ex xi tmaꞌn cye:
—Chi Kman cyjaꞌ: Tuꞌnju ma chin cyaj cycoline, cyjaꞌtzun ma che cyaj nkꞌoꞌne tuꞌn tcub cyiꞌje tuꞌn Sisac.
6 Atzun cye nejenel cye aj Israel tucꞌix rey el cynicꞌ tiꞌj, cyjaꞌtzun cub cymansin cyib ex cyma:
—Tuj tumelxix ma tbincha Kman jlu kiꞌj.
7 Tejtzun tqueꞌyinte Kman otok cub cymansin cyib, tzaj yolin juntl maj tucꞌil Semaías ex tzaj tmaꞌn cyjaꞌ: Tuꞌnju ma cub cymansin cyib nwitze, mlay che naj wuꞌne, che cletel naj wuꞌne ex mlay txi nkꞌoꞌne ambil te Sisac tuꞌn tcub tkꞌoꞌn cycastiw aj Jerusalén; 8 pero che cyjel ten tjakꞌ tcawbil Sisac, ex cꞌelel cynicꞌ tiꞌj alcye mas baꞌn, ka tuꞌn cyajben weye, ex ka tuꞌn cyajben cye ke rey cye mastl nasyon, chi Dios te Semaías.
9 Oc tzokpaj Sisac aju rey tuj Ejipt tiꞌj Jerusalén ex xi tiꞌn ke kꞌinumabl ateꞌ tuj tja Kman ex tuj tja rey. Tcyakil xi tiꞌn, ax icx e jeꞌx tiꞌn tcyakil makbil kꞌan pwak cytxꞌotxꞌil, akeju tuꞌn Salomón e cub tbinchaꞌn. 10 Te cyxel ke makbil lu e cub tbinchaꞌn rey Roboam ke makbil kꞌan cꞌuxbil, ex e cyaj tkꞌoꞌn tuj cycwent ke nejenel cye xkꞌukil ttzi tja rey. 11 Teyle junjun maj oc t-xiꞌ rey tuj tja Dios, ke xkꞌukil in xi cyiꞌn ke makbil, ex nnaꞌjtz cyiꞌn juntl maj tuꞌn cyten tuj ja jatum ateꞌ ke xkꞌukil. 12 Cyjaꞌtzun nok tuꞌnju cub tmansin tib Roboam o chewix tkꞌoj Kman tiꞌj, ex mintiꞌ e naj aj Judá tuꞌn te jumajx. Ax icx baꞌn e ten xjal tuj Judá.
13 Oc tipun tcawbil rey Roboam tuj Jerusalén ex cucx o cawin. Toctok twiꞌ 41 abkꞌi tej ttzyet tcawin, ex o cawin wuklaj abkꞌi tuj Jerusalén aju tnam jaw t-scꞌoꞌn Kman cyxol cycyakil cꞌloj cyiyjil aj Israel tuꞌn ttzaj naꞌn tbi tuj. Aju ttxuꞌ Roboam, Naama tbi ex aj Amón. 14 Ke tbinchben Roboam mya baꞌn e eꞌla tuj twitz Kman, porque mintiꞌ o tzꞌajben te Dios tuꞌn tcyakil tcꞌuꞌj.
15 Aju txꞌolbaben tiꞌj tbinchben Roboam atxix tej tkeꞌ tcawin ex tejxi tpon baj, atzun tzꞌiban cyuj ke uꞌj jatum tzꞌiban cybi ktzan t-xeꞌchel. A jlu tuꞌn Semaías cyaj cytzꞌiban, aju t-sanjel Dios, tucꞌix Iddo aju baꞌn nabin tuꞌn Dios. Cucx o ten kꞌoj cyxol Roboam tucꞌil Jeroboam.
16 Ex tejtzun tcyim Roboam cuꞌx makuꞌn cyxol ktzan t-xeꞌchel tuj tnam toc tbi Ttanmi David. Te tibajxi, aju o cawin te t-xel, atzun Abías aju tcyꞌajal.