Xi tmaꞌn Ahías ka tuꞌn tcub t-sentens Jeroboam
—Chꞌexpumel t-xbaluna tuꞌntzun miꞌn tel nicꞌbaj tiꞌja ka aya nxuꞌjile, ex txiꞌya tuj Silo tucꞌil Ahías aju t-sanjel Dios tzaj kꞌmante weye tuꞌn woque te rey te nasyon lu. 3 Kꞌinxa laj pan, tucꞌix wabj txꞌilsaꞌmaj, tucꞌix jun xar taꞌl cab, ex kꞌonxa te tuꞌntzun ttzaj tmaꞌn teya ti cbajel tiꞌj cꞌwaꞌl lu.
4 Tbinchatzun t-xuꞌjil Jeroboam icju. Banttzun tten, xiꞌ tuj Silo ex pon tja Ahías. Atzunte Ahías mibantok queꞌyin tuꞌnju otok tzꞌoc yupj cyiꞌj tbakꞌ twitz tuꞌn tijin, 5 pero otok tzaj tmaꞌn Kman te cyjaꞌ: Tzul t-xuꞌjil Jeroboam kanil jun t-xjel teya tiꞌj ju tal ma yabt. Atzun yol lu cxel tmaꞌna te, porque oc tul xuꞌj lu chꞌexpuꞌn t-xbalun tuꞌn miꞌn tel tnicꞌa tiꞌj, chi Dios.
6 Tejtzun tbinte Ahías tkꞌajkꞌajel tkan ju xuꞌj tej topin bet ttzi ja, xi tmaꞌn te:
—Toctza, aya t-xuꞌjil Jeroboam. ¿Tikuꞌn nnoꞌc tkꞌon tiba te juntl xuꞌj? Ma ncꞌame jun tkanil mya baꞌn te teya, 7 cyjaꞌtzun, taj meltzꞌaja ex kꞌmanxa te Jeroboam: Ate Kman aju Cydios aj Israel ma tma cyjaꞌ: Akine in etz kꞌinte teya cyxol tnam xjal, ex oc nkꞌoꞌne te nejenel cye aj Israel aju tnam etzan wuꞌne. 8 El wiꞌne ju cawbil cye tiyjil David ex xi nkꞌoꞌne teya. Pero mintiꞌ ma tzꞌoca ic tzaꞌn te David aju nmajene, e japun ke nmandamyente tuꞌn ex oc lpeꞌ wiꞌje tuꞌn tcyakil tanmi, ex tzꞌaklxix e ela ke tbinchben tuj nwitze; 9 nimxix mya baꞌn ma tbinchaya cywitz ke cawil e ten ojtxi; ma tbinchaya txkantl tdiosa ex ke tilbilal in che bant tiꞌj cꞌuxbil in cub ulj tuꞌn kꞌakꞌ, ex ma chin el ticꞌuna. Tuꞌn tcyakil jlu ma tzaj nkꞌoje tiꞌja. 10 Cyjaꞌtzun, ctzajel wiꞌne mya baꞌn cyibaj tiyjila: Che najel wuꞌne cycyakil ke tiyjila xinak ateꞌ cyxol aj Israel; mi jun cyjel ankꞌin; te jumajx che najel wuꞌne ic tzaꞌn in baj tzꞌiset tzꞌis. 11 Akeju tiyjil Jeroboam che cymel tuj tnam, che xel chyoꞌn cyuꞌn txꞌyan; ex akeju che cymel tuj cojbil, che xeꞌl chyoꞌn cyuꞌn cꞌutz, porque akine ma chin kꞌmante jlu, chi Kman.
12 Atzun teya xuꞌj, taja tjaya. Nok oꞌcx oc tocxa tuj tnam, cymel aju tala, 13 ex cycyakil aj Israel che okꞌel tiꞌj, ex cbelex cymakuꞌn; oꞌcxcu jun tiyjil Jeroboam lu cbelex makuꞌn, porque cyxol cycyakil tiyjil Jeroboam, oꞌcxcu ju kꞌa lu ma tzalaj Kman tiꞌj, aju Cydios aj Israel. 14 Te tibajxi jlu cꞌoquel tkꞌoꞌn Kman juntl rey cyxol aj Israel ex che cymel tiyjil Jeroboam tuꞌn tuj kꞌij lu, ex biꞌx cbantel tuꞌn jaꞌlo. 15 che cbajel tchitoꞌn Kman ke aj Israel ic tzaꞌn jun nima in baj tyucun ke tkan ajlaj. Che jawitz tbakoꞌn tuj tbanil txꞌotxꞌ aju xi tkꞌoꞌn cye cyxeꞌchel, ex che elex tlajoꞌn max tiꞌjxi nima Éufrates, porque ma tzaj nim tkꞌoj Kman cyiꞌj tuꞌnju ma cub cybinchaꞌn tilbilal xuꞌj dios Asera. 16 Che cyjel colin ke aj Israel tuꞌn Kman tuꞌn cylaj ke il ma tbincha Jeroboam ex ma che binchan aj Israel il tuꞌn, chi Ahías, xi tmaꞌn.
17 Jawtzun weꞌ t-xuꞌjil Jeroboam ex aj tja tuj Tirsa; ex matok nnoꞌcx ttzi tja tej tcyim tal. 18 Cycyakil aj Israel e jeꞌx makulte ex e okꞌ tiꞌj, ic tzaꞌnx otok tma Kman te Ahías aju t-sanjel.
19 Aju chꞌintl txꞌolbaben tiꞌj Jeroboam, tucꞌix cyiꞌj ke kꞌoj e oc tuꞌn ex tiꞌj aju baj tuj tcawbil, atzun tzꞌiban tuj uꞌj jatum taꞌ tcyakil txꞌolbaben tiꞌj cyakꞌunben ke rey cye aj Israel. 20 O cawin Jeroboam 22 abkꞌi, ex tcyimlenxi, atzun Nadab aju tcyꞌajal o cawin te t-xel.
Tej ttzyet tcawin Roboam tuj Judá
21 O cawin Roboam aju tcyꞌajal Salomón tuj Judá. Otok japun twiꞌ 41 abkꞌi tej ttzyet tcawin, ex o cawin wuklaj abkꞌi tuj Jerusalén aju tnam jaw t-scꞌoꞌn Kman cyxol cycyakil cꞌloj cyiyjil aj Israel tuꞌntzun tten tbi tuj. Aju ttxuꞌ Roboam Naama tbi ex aj Amón.
22 Pero ke cybinchben tiyjil Judá mya baꞌn ela tuj twitz Kman, ex mas nim tkꞌoj tzaj cyuꞌn twitzju tkꞌoj otok tzaj nej tuꞌn tcyakilju il otok cybincha cyxeꞌchel; 23 ax icx cye jaw cybinchaꞌn ke ja te cycꞌulbil xjal mya nimal Dios ke, ex jaw cywalbaꞌn ke abj ex ke tronc xjansamaj cyuꞌn, cywiꞌ cycyakil tal witz ex cyjakꞌ cycyakil tzeꞌ pin cyxak. 24 Ax icx tuj ju txꞌotxꞌ lu at ke xinak in che yaẍin ax tucꞌil juntl xinak, ex a jlu in cybinchaꞌn te jun cꞌulbil cywitz tilbilal, ex in cybinchaꞌn tcyakil mya baꞌn aju in cybinchaꞌntok ke nasyon mya nimal Dios ke, akeju otok che ex tlajoꞌn Kman cywitz aj Israel.
25 Tuj tjweꞌyin abkꞌi ttzyetlen tcawin Roboam, oc tzokpaj Sisac aju rey te Ejipt tiꞌj tnam Jerusalén, 26 ex xi tiꞌn ke kꞌinumabl ateꞌ tuj tja Kman ex tuj tja rey. Tcyakil ex tiꞌn, cyucꞌix cycyakil makbil kꞌan pwak cytxꞌotxꞌil, akeju e cub tbinchaꞌn Salomón. 27 Te cyxel ke jlu cub tbinchaꞌn rey Roboam ke makbil kꞌan cꞌuxbil cytxꞌotxꞌil, ex e cyaj tkꞌoꞌn tuj cycwent ke nejenel cye ke xkꞌukil tja jatum in cawin. 28 Ex tcyakil maj oc t-xiꞌ rey tuj tja Kman, akeju xkꞌukil in xi cyiꞌn ke makbil, ex nnaꞌjtz cyiꞌn juntl maj tuꞌn cypon tuj ja jatum cꞌuꞌn ke.
29 Aju chꞌintl txꞌolbaben tiꞌj Roboam, tucꞌix tcyakil aju tbincha, atzun tzꞌiban tuj uꞌj jatum taꞌ tcyakil txꞌolbaben cyiꞌj cyakꞌunben ke rey te Judá.