2 SAMUEL
Tej tbinte David otok cyim Saúl
1
Tcyimlenxitzun Saúl, pon juntl maj David tuj tnam Siclag tcublenxi cyiꞌj aj Amalec tuꞌn, ex axtzun cyaj ten cabe kꞌij. 2 Tujtzun toxin kꞌij at jun xinak sbitꞌnaj t-xbalun toc ex tjax txꞌotxꞌ tuj twiꞌ te jun techal te bis, atzun tzajni cyxol t-soldad Saúl. Tejtzun tpon twitz David, cub mutzeꞌ twitz txꞌotxꞌ te jun techal te nimbil. 3 Atzunte David xi tkanin te:—¿Jatum sajaya?
—Ma chin etz tzokpaje cyxol ke soldad aj Israel, chi xjal xi ttzakꞌweꞌn.
4 —¿Titzun ma baj? Binchama xtalbil kꞌmantza weye, chi David xi t-xjelin.
—Ma che el ok ke soldad tuj kꞌoj ex nimcu ma che cub, ax icx ma cyim Saúl tucꞌix Jonatán aju tcyꞌajal, chi xjal.
5 —¿Tzaꞌntzun tten ma tbiya ka ma cyim Saúl tucꞌix Jonatán aju tcyꞌajal? Chi David teju cuꞌxun aju otok tzul kꞌmalte tkanil. 6 Atzunte cuꞌxun xi ttzakꞌweꞌn:
—Tcꞌulbacu atintoke twi witz Gilboa tej xwile Saúl pakltok tibaj tkan tlans, ex chꞌixtok tcub tiꞌj cyuꞌn ke aj kꞌoj, akeju ateꞌjx cyuj carwaj ex cyibaj chej. 7 Tejtzun sajtz tqueꞌyin ttzal tiꞌj ex tej ẍin til, ẍinx ttxcoꞌn. Atzun weye jurat naj xi nnimane. 8 Sajtzun tkanin weye alcye kine, atzun weye xi nmaꞌne, aj Amalec kine. 9 Sajtzun tmaꞌn weye: Lakꞌeꞌtza ntxlaje ex chin tbyoncuya te jumajx, tuꞌnju ma tzꞌoc taꞌw wiꞌje ex mintiꞌ tumel tuꞌn ncyime, chi Saúl. 10 Cyjaꞌtzun tten ẍin pon lakꞌeꞌye ttxlaj ex xcub nbyoꞌne, porque sel nnicꞌe tiꞌj ka tcublenxi tzꞌak twitz txꞌotxꞌ mlayx tzꞌankꞌintl, tuꞌnju nimxix otok cꞌixbi. Ex ma tzꞌel wiꞌne aju coron tjax tuj twiꞌ, tucꞌix aju cꞌuxbil tcub tkul tkꞌab, tuꞌn ttzaj wiꞌne tucꞌila tat, chi cuꞌxun.
11 Atzunte David cyucꞌix ke tucꞌil, baj cysbitꞌun cyxbalun te jun techal tiꞌj cybis, 12 ex biꞌx e jaw okꞌ tuꞌn cybis tiꞌj tcyimlen Saúl ex tiꞌj tcyimlen Jonatán aju tcyꞌajal. Ax icx e jaw okꞌ cyiꞌj aj Israel akeju etzan tuꞌn Kman, tuꞌnju otok che cub byoꞌn tuj kꞌoj; cyjaꞌtzun mintiꞌ e waꞌn tejxi toc kax. 13 Te tibajxi xi tkanin David teju cuꞌxun otok pon kꞌinte tkanil:
—¿Yajtzun teya, jatum tzajniya?
—Stranjer xjal kine ex aj Amalec kine, chi cuꞌxun.
14 —¿Tzaꞌntzun tten xtnimari tiba tuꞌn toc tkꞌoꞌn tkꞌaba tiꞌj rey aju scꞌoꞌmaj tuꞌn Kman Dios? Chi David. 15 Tzajtzun ttxcoꞌn David jun soldad ex xi tmaꞌn te:
—Chux byoncuya.
—Tuꞌnxa ma tzaj tiꞌna camic tibaja, porque tuꞌnxa ma tzaj tmaꞌna tila, tej saj tmaꞌna ka otok cub tbyoꞌna aju rey scꞌoꞌmaj tuꞌn Kman.
Jun bitz te bis tiꞌj Saúl ex Jonatán
17 Xitzun tbitzan David jun bitz te bis tiꞌj tcyimlen Saúl, ex tiꞌj tcyimlen Jonatán aju tcyꞌajal, 18 ex xi tmaꞌn tuꞌn t-xi xnakꞌtzet bitz lu cye aj Judá. Aju bitz lu tzꞌibamaj tuj uꞌj cyaj ttzꞌiban Jaser.
19 Akeye aj Israel, ma che cub ke tbanil nejenel cyeye max cywiꞌ ke witz. Ti tten ma che cub ke xjal nim cyipun.
20 Miꞌn txi cymaꞌne tkanil tuj tnam Gat, ex miꞌn txi cytxꞌolbaꞌne cyuj cay tuj tnam Ascalón, tuꞌntzun miꞌn cyjaw tzalaj ke xuꞌj aj Filistey, ex tuꞌn miꞌn cyjaw tꞌicpaj tuꞌn tzalajbil ke xuꞌj mya nimal Dios.
21 Akeye witz Gilboa, miwt tzajtl jbal cyibaje ex mi tkꞌab cheꞌw, ex miwt tzaj chꞌiy awal ma chixin tuꞌn t-xi kꞌot te oyaj, tuꞌnju atzun e baj waban ke makbil cye ke soldad cyuw cycꞌuꞌj tuj kꞌoj. Atzun baj naj tkoptzꞌajel aju makbil in ajben te Saúl, mer ic tzaꞌn mintiꞌ otok tzꞌoc suꞌn aseyt tiꞌj.
22 Mi jun maj cucx ma che ajtz Saúl ex Jonatán tuj kꞌoj, tcyakil maj ma che cub ke xjal at nim cyipun tuj kꞌoj tuꞌn t-spad Saúl, ex tuꞌn tplech Jonatán.
23 Ate Saúl ex Jonatán cꞌujlaꞌnxix ke ex nim cygan xjal cyiꞌj, misicyer el cypaꞌn cyib cyiꞌjx, mi tej itzꞌxtok ke ex mi tej cycyim. Mas cyuw che ojkelan ic tzaꞌn ke tꞌiw, ex mas nim cyipun ic tzaꞌn ke balun.
24 Akeye xuꞌj aj Israel, che okꞌe tiꞌj Saúl aju tzaj kꞌinte cyxbalune tbanilxix ex tzꞌumin twitz; ex aju tzaj kꞌonte adorn kꞌan pwak ttxꞌotxꞌil tuꞌn toc cykꞌoꞌne tiꞌj cyxbalune.
25 Ti tten ma che cub keju at cyipun tuj kꞌoj. Ma cyim Jonatán max cywiꞌ ke witz.
26 Nimxix in chin bisune tiꞌja wermaniye Jonatán. Nimxix o chin tzalaje tiꞌja porque aju tcꞌujlalila te weye puro baꞌn, mas ic tzaꞌn tcꞌujlalil jun xuꞌj.
27 Ti tten ma che cub keju at nim cyipun tuj kꞌoj. Ma che naj ke cymacbil akeju in che ajben tuj kꞌoj, chi David tuj tbitz.