—Kꞌiꞌn jatz t-spadiya ex chin t-xayuncuya tuꞌn, tuꞌntzun miꞌn cytzaj keju mya nimal Dios kꞌojlel wiꞌje, ex tuꞌn miꞌn ncub byoꞌne cyuꞌn, ex tuꞌn miꞌn cyxmayin wiꞌje, chi Saúl.

Atzun teju onil te mintiꞌ cub tuj twitz porque tzaj nim t-xobil. Jatztzun tiꞌn Saúl t-spad ex xi t-xoꞌn tib tibaj twi t-spad. 5 Tejtzun tqueꞌyinte ju onilte ya otok cyim Saúl, ax icx te xi t-xoꞌn tib tibaj twi t-spad ex cyim junx tucꞌil. 6 Cyjaꞌtzun tten, ax kꞌij cyim Saúl cyucꞌix ox tcyꞌajal, tucꞌix ju onilte ex cyucꞌix cycyakil t-soldad. 7 Atzun ke mastl aj Israel najl ma jlajxi chkꞌajlaj ex jlajxi nima Jordán tuj tjawitz kꞌij, tej tcyil otok che el ok ke cysoldad ex otok cyim Saúl cyucꞌix ke tcyꞌajal, cyaj cycolin ke cytanmi ex e jeꞌl ok. E pontzun ke aj Filistey cyuj ke cytanmi ex ax e cyaj ten najal cyuj.

8 Tuj juntl kꞌij, tej cyxiꞌ aj Filistey tuꞌn tel cyiꞌn tcyakilju kꞌiꞌn cyuꞌn ke cyimni, cnet Saúl cyuꞌn cyucꞌix keju ox tcyꞌajal palch ke twitz txꞌotxꞌ twi witz Gilboa. 9 Eltzun cytamtzꞌuꞌn twiꞌ Saúl ex el cyiꞌn ke tmacbil in che ajben te tkꞌojbil ex xi cysamaꞌn sanjel tuj tcyakil cytxꞌotxꞌ aj Filistey tuꞌn t-xi cykꞌoꞌn tkanil tuj cyja cydios ex cye xjal. 10 Ocx cykꞌoꞌn ke tmacbil Saúl in che ajben te tkꞌojbil tuj tja cydios Astarot tbi, ex jax cyyoban t-ximlal twi muro toc tiꞌj tnam Bet-san.

11 Tejtzun cybinte ke xjal najl tuj tnam Jabes tuj txꞌotxꞌ Galaad aju otok cybincha aj Filistey tiꞌj Saúl, 12 cycyakil xinak cyuw cycꞌuꞌj tuj kꞌoj e bet tuj enter konicꞌan tuꞌn tcuꞌtz cyiꞌn t-ximlal Saúl twi muro toc tiꞌj tnam Bet-san, tucꞌix cyximlal keju ox tcyꞌajal, ex e ajtz cyiꞌn tuꞌn cyul cyuꞌn tuj tnam Jabes, ex atzun cub cypatun ke cyximlal. 13 Cuꞌxtzun cymakuꞌn ke cybakil tuj tnam Jabes tjakꞌ jun wiꞌ tzeꞌ, ex te tibajxi jlu cub cyyoꞌn weꞌyaj wuk kꞌij.