Cyim Saúl cyucꞌix ke tcyꞌajal tuj kꞌoj
10
E oc tzokpaj aj Filistey kꞌojlel cyiꞌj aj Israel, ex atzun cye aj Israel e el ok cywitz, ex nimcu e cyim twi witz Gilboa. 2 Atzun cye aj Filistey e oc lpeꞌ kꞌojlel tiꞌj Saúl ex cyiꞌj ke tcyꞌajal. Cub byoꞌn Jonatán cyuꞌn, tucꞌix Abinadab ex Malquisúa. 3 Te tibajxi e oc tzokpaj tiꞌj Saúl, ex chꞌixtok cypon canun tiꞌj oc cycꞌixbisaꞌn tuꞌn cyplech. 4 Cyjaꞌtzun xi tmaꞌn Saúl teju onil te: Kꞌin jatz t-spadiya ex chin t-xayuncuya tuꞌn, tuꞌntzun miꞌn cyul ke xjal mya nimal Dios wiꞌje ex tuꞌn miꞌn cyxmayin wiꞌje.Pero aju onilte mintiꞌ cub tuj twitz tuꞌn tbinchante icju, tuꞌnju tzaj nim t-xobil tiꞌj. Jatztzun tiꞌn Saúl t-spad ex xi tmutzkꞌin tib tibaj twi t-spad. 5 Tejtzun tqueꞌyinte ju onilte ka otok cyim Saúl, ax icx te xi tmutzkꞌin tib tibaj twi t-spad ex cyim. 6 Cyjaꞌtzun, tuj kꞌij lu cyim Saúl cyucꞌix ke oxe tcyꞌajal ex cycyakil keju at cyoclen ttxlaj. 7 Ex tej cylonte cycyakil aj Israel akeju najlke tuj chkꞌajlaj, ka otok che el ok ke cysoldad ex otok cyim Saúl cyucꞌix ke tcyꞌajal, cyajtzun cycolin ke cytanmi, ax icx cye e jeꞌl ok. E pon aj Filistey cyuj ke cytanmi ex axtzun e cyaj ten najal cyuj.
8 Tuj juntl kꞌij, tej cyxiꞌ aj Filistey tuꞌn tel cyiꞌn tcyakil tiꞌxti kꞌiꞌn cyuꞌn ke cyimni, cnet Saúl cyuꞌn, cyucꞌix ke tcyꞌajal, cyimni ke twi witz Gilboa. 9 Eltzun cyiꞌn t-xbalun Saúl ex el cytamtzꞌuꞌn twiꞌ, ex xi cyiꞌn cyucꞌix ke tmacbil in che ajben tuj kꞌoj, ex xi cysamaꞌn ke sanjel cyuj cycyakil cytanmi tuꞌntzun t-xi kꞌot tkanil cye xjal, ax icx cye cydios. 10 Ex oc cyyoban ke tmacbil Saúl in che ajben tuj kꞌoj tuj tja cydios, ex atzunju twiꞌ jaw cyyoban tuj tja juntl cydios Dagón tbi.
11 Ex tej cybinte ke aj Jabes, aju tnam at tuj txꞌotxꞌ Galaad, tiꞌj ju otok cybincha aj Filistey tiꞌj Saúl, 12 bant tiꞌj cyuꞌn cycyakil xinak cyuw cycꞌuꞌj, tuꞌn cyxiꞌ kꞌilte t-ximlal Saúl ex cyximlal ke tcyꞌajal, ex pon cyiꞌn max tuj tnam Jabes. Atzun cuꞌx cymakuꞌn cyximlal t-xeꞌ jun wiꞌ tzeꞌ cꞌol. Te tibajxi cub cyyoꞌn wuk kꞌij weꞌyaj.