3 Cyjaꞌtzun tten e jeꞌx cycyakil ke cytijil xjal aj Israel yolil tucꞌil David max tuj tnam Hebrón; atzunte David bant tiꞌj jun tyol cyucꞌil, ex oc tkꞌoꞌn Kman te testiw tiꞌj. Atzun cye oc cykꞌoꞌn toclen David tuꞌn toc te rey cyibaj aj Israel, ic tzaꞌn otok tzaj ttziyan Dios te Samuel.

4 E jeꞌx David cyucꞌix cycyakil aj Israel tuj Jerusalén aju toc juntl tbi Jebús. Atzun najl ke aj Jebusey tuj txꞌotxꞌ lu, 5 ex xi cymaꞌn te David: Teya mlayx tzꞌoctza tzalu, che chi. Masque icju, pero cub tiꞌj cwartel tuj Sión tuꞌn David, aju toc tbi jaꞌlo Ttanmi David. 6 Atzunte David otok tma cyjaꞌ: Alcye ma tzꞌoc tzokpaj kꞌojlel tnejel cyiꞌj aj Jebusey, cꞌoquel nkꞌoꞌne toclen te nejenel cye soldad, chi David. Ex aju oc tzokpaj tnejel tuꞌn tkꞌojin, atzun Joab aju tal Sarvia, ex octzun kꞌoꞌn toclen xjal lu te nejenel cye soldad. 7 Atzunte David ax cyaj ten najal tuj cwartel; tuꞌntzunju oc cykꞌoꞌn tbi lugar lu Ttanmi David. 8 Ex jaw tbinchaꞌn David tnam tiꞌjele, xi keꞌ tiꞌj lugar otok baj nojsaꞌn tuj tuꞌn toc te chkꞌajlaj, ex jaw tbinchaꞌn muro tcyakil tiꞌjele. Atzunte Joab xi tbinchaꞌn mijtl tnam. 9 Aju tipumal David cyjaꞌ t-xiꞌ jawni ex attok Kman tucꞌil, aju Tajaw Tcyakil.

10 Atzun ke soldad lu ateꞌ tucꞌil David mas cyuw cycꞌuꞌj tuj kꞌoj, ax icx e onin tiꞌj tuꞌn tcawin, cyucꞌix cycyakil aj Israel, ex oc cykꞌoꞌn David te rey, ic tzaꞌnx otok cyaj tmaꞌn Kman cye. 11 Atzun jun tajlal lu cyiꞌj ke soldad cyuw cycꞌuꞌj tuj kꞌoj ateꞌ tucꞌil David: Ox cybaj soldad cyuwxix cycꞌuꞌj tuj kꞌoj, ex ate Jasobeam aju tcyꞌajal Hacmoni toc te nejenel cye. At jun maj cub tbyoꞌn ox syent xinak tuꞌn tlans. 12 Atzun tcabin Eleazar tbi, aju tcyꞌajal Dodo aju aj Ahohit, atzun jun cyxol keju oxe cyuwxix cycꞌuꞌj tuj kꞌoj. 13 Ate Eleazar o ten tucꞌil David tuj Pas-damim tej toc cychmon cyib aj Filistey tuj lugar lu tuꞌn cykꞌojin cyiꞌj aj Israel. Tuj lugar lu attok jun cojbil awaꞌn tkan sebad tuj, ex tej cyel ok ke soldad aj Israel cywitz aj Filistey, 14 atzunte Eleazar mintiꞌ el ok, ax cyaj weꞌ cywitz aj Filistey tuj tmij cojbil cyucꞌix ke tucꞌil, e oc ten kꞌojlel ex cub cyiꞌj cyuꞌn. Cyjaꞌtzun tten, ate Kman tzaj oninte cye tuꞌn cycamban.

15 At jun maj at ox cyxol ke 30 soldad cyuw cycꞌuꞌj tuj kꞌoj e jeꞌx canul tiꞌj David t-xe pic Adulam. Atzun ke soldad aj Filistey atzun cycubsaꞌn tuj chkꞌajlaj Refaim. 16 Atzun taꞌtok David tuj cwartel tej cypon txkan soldad aj Filistey tuj Belén. 17 Tzajtzun txketleꞌn tiꞌj David ex tma cyjaꞌ: Nokwit at jun saj kꞌinte chꞌin ncꞌaye aꞌ, aju tcuꞌx tuj xoch tcub ttzi tpwertil tnam Belén, chi David.

18 Akeju ox xinak cyuwxix cycꞌuꞌj tuj kꞌoj e ocx tuj campament cye aj Filistey, jatz cyiꞌn aꞌ tuj xoch tcub ttzi tpwertil tnam Belén, ex xi cyiꞌn tucꞌil David. Pero mintiꞌ tcuya David tuꞌn t-xi tcꞌaꞌn, nok oꞌcx cub tkoꞌn twitz txꞌotxꞌ te jun oyaj te Kman, 19 ex tma: Awt Dios onin weye tuꞌn miꞌn t-xi ncꞌaꞌne aꞌ lu, porque ka ma txi ncꞌaꞌne, junx taꞌ jlu mer ic tzaꞌn a cychcꞌel ke xinak cxel ncꞌaꞌne, akeju xi cyoyin cyib tuꞌn cycyim tej ẍeꞌx aj kꞌilte aꞌ, chi David, ex mintiꞌ xi tcꞌan.

Atzun jlu o bant cyuꞌn keju ox soldad cyuwxix cycꞌuꞌj tuj kꞌoj.

20 Ate Abisai aju terman Joab toctok toclen te nejenel cyiꞌj keju 30 soldad cyuw cycꞌuꞌj tuj kꞌoj. At jun maj oc tzokpaj kꞌojlel cyiꞌj ox syent xinak tuꞌn tlans ex e cub tbyoꞌn. Cyjaꞌtzun e yolin xjal tiꞌj ka mas at tnabl tuꞌn tkꞌojin cywitz keju 30 xinak, 21 ex o tcꞌam mas nimbilte cywitz ke mastl tucꞌil, porque oc kꞌoꞌn toclen te nejenel cye. Pero mintiꞌ o pon ic tzaꞌn keju oxe te tnejel.

22 Ax icx ate Benaía aju tcyꞌajal Joiada, aju najl tuj tnam Cabseel. Aju xinak lu cyuwxix tcꞌuꞌj tuj kꞌoj, o tbincha nimcu binchben ex cub tbyoꞌn cabe xjal aj Moab nim cyipun. At jun kꞌij tej tcub nim ttxa cheꞌw, cuꞌx tuj jun toyꞌ jul ex tujx jul lu cub tbyoꞌn jun balun. 23 Ax icx cub tbyoꞌn Benaía jun aj Ejipt maꞌxix twaꞌl, aju twaꞌl balo te ox var, ex kꞌiꞌntok jun tlans maꞌ tcꞌitz ex maꞌ tkan. Oc tzokpaj Benaía tiꞌj xjal lu tucꞌil jun tzeꞌ, el tiꞌn tlans tuj tkꞌab, ex cub tbyoꞌn tuꞌnx tlans. 24 Tuꞌnju tbinchben Benaía lu, aju tcyꞌajal Joiada, e yolin xjal tiꞌj ka mas at tnabl tuꞌn tkꞌojin cywitz keju 30 xinak cyuw cycꞌuꞌj tuj kꞌoj, 25 ex o tcꞌam mas nimbilte cywitz ke mastl tucꞌil, pero mintiꞌ pon ic tzaꞌn keju oxe tnejel. Ex oc tkꞌoꞌn David toclen Benaía te nejenel cye keju xkꞌukil te.

26 Akeju cyuw cycꞌuꞌj tuj kꞌoj, atzun ke jlu: Asael aju terman Joab, Elhanán aju tcyꞌajal Dodo, aju aj Belén, 27 Samot aju aj Harod, Heles aju aj Pelón, 28 Ira aju tcyꞌajal Iques, aju aj Tecoa, Abiezer aju aj Anatot, 29 Sibecai aju aj Husa, Ilai aju aj Ahoh, 30 Maharai aju aj Netofa, Heled aju tcyꞌajal Baana, ex ax aj Netofa, 31 Itai aju tcyꞌajal Ribai, ex aj Gabaa aju taꞌ tuj txꞌotxꞌ cye aj Benjamín, Benaía aju aj Piratón, 32 Hurai aju najl ttzi tkꞌab xak Gaas, Abiel aju aj Arba, 33 Azmavet aju aj Bahurim, Eliaba aju aj Saalbón, 34 ke tcyꞌajal Jasem aju aj Gizón, Jonatán aju tcyꞌajal Sage ex aj Harar, 35 Ahíam aju tcyꞌajal Sacar, aju ax aj Harar, Elifal aju tcyꞌajal Ur, 36 Hefer aju aj Mequera, Ahías aju aj Pelón, 37 Hezro aju aj Carmel, Naarai aju tcyꞌajal Ezbai, 38 Joel aju terman Natán, Mibhar aju tcyꞌajal Hagrai, 39 Selec aju aj Amón, Naharai aju aj Beerot, a jlu ikal ke macbil in che ajben tuj kꞌoj tuꞌn Joab aju tal Sarvia, 40 Ira aju aj Jatir, Gareb aju ax aj Jatir, 41 Urías aju aj Hetey, Zabad aju tcyꞌajal Ahlai, 42 Adina aju tcyꞌajal Siza aju aj Rubén, ex aju xjal lu nejenel cye ke tiyjil Rubén ex ucꞌin 30 xinak tuꞌn, 43 Hanán aju tcyꞌajal Maaca, Josafat aju aj Mitán, 44 Uzías aju aj Astarot, Sama tucꞌix Jehiel, ake jlu tcyꞌajal Hotam ke ex aj Aroer ke, 45 Jediael aju tcyꞌajal Simri, tucꞌix Joha aju ax terman, ake jlu aj Tiza, 46 Eliel aju aj Mahavi, Jerebai tucꞌix Josabía, ake jlu tcyꞌajal Elnaam ke, Itma aju aj Moab, 47 Eliel, Obed ex Jaasiel, ake jlu aj Soba ke.