Ke mancbil tyol David
23
Atzun ke mancbil tyol David jlu:Ate David aju tcyꞌajal Isaí ex aju xinak jaw nimsaꞌn tuꞌn Dios, aju rey jaw t-scꞌoꞌn Tdios Jacob ex aju mejor bitzan cyxol aj Israel, chi in tmaꞌn cyjaꞌ:
2 Aju T-xew Kman in yolin wucꞌile ex aju tyol at tuj ntziꞌye.
3 Aju Cydios aj Israel ma yolin; aju Colol cyiꞌj aj Israel ma tma weye cyjaꞌ: Aju rey in cawin cyibaj xjal tuj tumelxix ex at tchiylal Dios te tuꞌn tcawin cyibaj xjal,
4 ic cꞌoquel ic tzaꞌn ju spicꞌun in jawil koptzꞌaj te prim, ic tzaꞌn t-spicꞌumal kꞌij te jun prim mintiꞌ muj twitz cyaꞌj, in chꞌiy chaꞌx cꞌul tuꞌn ticꞌlenxi jbal, chi Dios ma tma weye.
5 Cyjaꞌtzun cyuw che tel ke wiyjile tiꞌj Dios; tuꞌnju o cyaj bant tiꞌj jun tyol wucꞌile te jumajx, puro nacꞌuꞌn tten ex mlay naj. Ctzajel tkꞌoꞌn ju colbil weye ex ctzajel tkꞌoꞌn tcyakilju wajbile.
6 Atzun cye cycyakil binchal mya baꞌn che oquel ic tzaꞌn chꞌiꞌx cꞌul mintiꞌ tajben, ex mi jun jacu tzaj tzyunte te tuꞌn tkꞌab.
7 Ka at jun xjal taj tuꞌn tjaw ttzyuꞌn, il tiꞌj tuꞌn tajben jun cꞌuxbil tuꞌn ex ka jun tkan lans; cꞌoquex kꞌoꞌn chꞌiꞌx cꞌul tuj kꞌakꞌ tuꞌntzun tbaj tzꞌeꞌy te jumajx, chi David, baj tmaꞌn.
Ke t-soldad David cyuw cycꞌuꞌj tuj kꞌoj
8 Atzun cybi ke t-soldad David jlu akeju cyuw cycꞌuꞌj tuj kꞌoj: Ate Is-boset aju aj Hacmonita nejenel cye ox xinak mas cyuwxix cycꞌuꞌj tuj kꞌoj, at jun maj cub tbyoꞌn wajxak syent xinak tuꞌn tlans. 9 Te tibajxi Is-boset, atzun Eleazar aju tcyꞌajal Dodo aju aj Ahohita, ex ajun toc te tajlal cyxol ke ox xinak mas cyuwxix cycꞌuꞌj. O ten tucꞌil David tuj lugar Pasdamim tej toc cychmon cyib aj Filistey ma chixin tuꞌn cykꞌojin, ex atzun cye aj Israel otok che el ok, 10 atzunte Eleazar ax cyaj weꞌ, ex oc ten byol cye aj Filistey tejxi cysict ke tkꞌab, ex mintiꞌ el ttzokpiꞌn spad tuj tkꞌab. Tuj kꞌij lu, tuꞌn Kman cub cyiꞌj nimcu aj kꞌoj. E octzun lpeꞌ ke soldad tiꞌj Eleazar oꞌcx tuꞌn tel cyiꞌn tcyakil tiꞌxti cye aj kꞌoj otok che cyim.
11 Te tibajxi Eleazar, atzun Sama aju tcyꞌajal Age aju aj Ararita. Tej toc cychmon cyib aj Filistey tuj lugar Lehi tuj jun cojbil awaꞌn tkan lentejas tuj, ake aj Israel e jeꞌl ok cywitz, 12 atzunte Sama cub weꞌ tuj cojbil ex o colin tiꞌj tuꞌn miꞌn ttzyet txꞌotxꞌ lu cyuꞌn aj kꞌoj, ex e cub ke aj Filistey tuꞌn. Cyjaꞌtzun oc jun kꞌoj maꞌxix cyuꞌn ex cub cyiꞌj aj kꞌoj cyuꞌn nok tuꞌn Kman.
13 At jun maj tuj tkꞌijlalil tej tjaw chmet twitz awal, at ox cyxol keju 30 xinak cyuwxix cycꞌuꞌj tuj kꞌoj e jeꞌx tuꞌn cypon tucꞌil David tuj toyꞌ xak Adulam. Attok txkan soldad aj Filistey otok che cub ten tuj chkꞌajlaj Refaim. 14 Atzunte David attok tuj lugar te tcolbil tib tej cycub ten txkan soldad aj Filistey tuj Belén, 15 ex tma David cyjaꞌ: Nokwit at jun saj kꞌonte aꞌ te ncꞌaye, aju tcuꞌx tuj xoch tcub ttzi tpwertil tnam Belén.
16 Cyjaꞌtzun, akeju ox xinak cyuwxix cycꞌuꞌj tuj kꞌoj e ocx tuj campament cye aj Filistey ex jatz cyiꞌn aꞌ tuj xoch tcub ttzi tpwertil tnam Belén, ex xi cyiꞌn tuꞌn tpon tucꞌil David. Pero mintiꞌ xi tcꞌan David, nok oꞌcx cub tkoꞌn ic tzaꞌn jun oyaj te Kman, 17 ex tma: Nman, mlay txi ncꞌane aꞌ lu, porque mer ic tzaꞌn acu cychcꞌel ke xinak lu xi cyoyin tej ẍeꞌx aj lolte aꞌ, chi David. Ex mintiꞌx xi tcꞌan.
Atzun jlu o bant cyuꞌn keju ox xinak cyuwxix cycꞌuꞌj tuj kꞌoj.
18 Ate Abisai aju terman Joab ex tal Sarvia, nejenel cye 30 xinak cyuwxix cycꞌuꞌj tuj kꞌoj. At jun maj oc tzokpaj cyiꞌj ox syent xinak, ex tuꞌnju tlans kꞌiꞌn e cub tbyoꞌn. Cyjaꞌtzun el tkanil tiꞌj ka mas cyuw tcꞌuꞌj tuj kꞌoj cywitz keju 30 xinak, 19 ex o tcꞌam mas nimbil te cywitz ke txkantl porque oc te nejenel cye. Pero mintiꞌ o pon ic tzaꞌn keju ox te tnejel.
20 Ate Benaía aju tcyꞌajal Joiada atzun najltok tuj tnam Cabseel, ex ate xinak lu cyuwxix tcꞌuꞌj tuj kꞌoj o tbincha nimcu binchben maꞌxix cyxilen. Ate Benaía cub byonte cabe tcyꞌajal Ariel aju aj Moab. At jun kꞌij tej tcub nim ttxa cheꞌw o cuꞌx tuj jun toyꞌ jul, ex tujx toyꞌ jul lu cub tbyoꞌn jun balun. 21 Ax icx cub tbyoꞌn jun aj Ejipt maꞌxix twaꞌl, kꞌiꞌntok jun lans tuꞌn: Oc tzokpaj Benaía tiꞌj tucꞌil jun tzeꞌ, el tiꞌn ju tlans tuj tkꞌab ex cub tbyoꞌn tuꞌnx ju tlans. 22 Tuꞌnju tbinchben Benaía lu aju tcyꞌajal Joiada, el tkanil tiꞌj ka mas cyuw tcꞌuꞌj tuj kꞌoj cywitz keju 30 xinak cyuwxix cycꞌuꞌj tuj kꞌoj; 23 ex o tcꞌam mas nimbil te cywitz ke txkantl, pero mintiꞌ o pon ic tzaꞌn keju ox te tnejel. Ex oc tkꞌoꞌn David te nejenel cyxol keju xkꞌukil te.
24 Cyxol keju 30 xinak cyuwxix cycꞌuꞌj tuj kꞌoj, atzun ke jlu ateꞌtok: Asael aju terman Joab; Elhanán aju tcyꞌajal Dodo aju aj Belén; 25 Sama aju aj Harod; Elica ax aj Harod; 26 Heles aju aj Paltita; Ira aju tcyꞌajal Iques aju aj Tecoa; 27 Abiezer aju aj Anatot; Mebunai aju aj Husah; 28 Salmón aju aj Ahohita; Maharai aju aj Netofa; 29 Heled aju tcyꞌajal Baana ax aj Netofa; Itai aju tcyꞌajal Ribai aju aj Gabaa, aju at tuj cytxꞌotxꞌ tiyjil Benjamín; 30 Benaía aju aj Piratón; Hidai aju at ttzi tkꞌab xak at tuj Gaas; 31 Abi-albón aju aj Arbatita; Azmavet aju aj Bahurim; 32 Eliaba aju aj Saalbonita; Jonatán jun cye keju tcyꞌajal Jasén; 33 Sama aju aj Ararita; Ahíam aju tcyꞌajal Sarar ax aj Ararita; 34 Elifelet aju tcyꞌajal Ahasbai aju aj Maaca; Eliam aju tcyꞌajal Ahitofel aju aj Gilo; 35 Hezrai aju aj Carmel; Paarai aju aj Arbita; 36 Igal aju tcyꞌajal Natán aju aj Soba; Bani aju aj Gad; 37 Selec aju aj Amón; Naharai aju aj Beerot, ex ikalte ju makbil in ajben te Joab aju tal Sarvia; 38 Ira aju aj Jatir; Gareb ax aj Jatir; 39 ex tucꞌix Urías aju aj Hetey. Japun jun tajlal te 37 tuꞌn tcyakilx.