3 Aya Ndiose ic ttena te weye ic tzaꞌn jun pic in chin clete tuꞌn, ic ttena te weye ic tzaꞌn jun makbil in ajben tuj kꞌoj, ex tuꞌnju nim tipumala in chin clete. Ic ttena ic tzaꞌn jun ewbil wibe, ex ic tzaꞌn jun colbil wibe cyuw tten. Aya colol weye, o chin clete tuꞌna tuj cykꞌab aj kꞌoj wiꞌje.

4 Aya Nman, baꞌn tuꞌn tjaw nimset tbiya; oc in chin txocone tiꞌja in chin clete tuꞌna tuj cykꞌab aj kꞌoj wiꞌje.

5 Tuj nwitze mer ic tzaꞌn otok chinx mulkꞌaje tuj aꞌ tuꞌn camic; tzaj nxobile tej cyjaꞌtok nnaje mer ic tzaꞌn tuꞌn tipumal txkan aꞌ.

6 Mer ic tzaꞌn otok chin cub xwacune tuꞌn sakbak tuꞌn ncyime; ex mer ic tzaꞌn otok chin tzyete tuꞌn cꞌobil te camic.

7 Tej in chin bisuntoke in oc tene txcolte Kman, xi nkanine onbil te Ndiose ex in tzaj biꞌne tuꞌn max tuj tja; pon tkꞌajkꞌajel nwiꞌye tuj t-ẍcyin.

8 Tzajtzun jun nintz cyaknajnab twitz txꞌotxꞌ ex e tzaj yucch ke tkꞌukbil cyaꞌj; biꞌx e baj yucch tuꞌn ttxꞌuꞌjil Kman.

9 Etz sib tuj ttxaꞌn, atzun tuj ttziꞌ etz jun kꞌakꞌ in baj tzꞌeꞌy nimcu tuꞌn; ax icx etz xkꞌaꞌl tuj ttziꞌ in cꞌant wen.

10 Jaket twitz cyaꞌj tuꞌn ex cuꞌtztzun, cub weꞌ tibaj txkan kꞌek muj attok tjakꞌ tkan.

11 Jax ten tibaj jun querubín ex tzaj lipan; tibaj cykꞌikꞌ tzaj lipan.

12 Ocx tewan tib tuj klolj ex tuj kꞌek muj nojni tuꞌn aꞌ.

13 Twitz etz jun spicꞌun in koptzꞌaj wen; tzaj tkan kꞌancyok ic tzaꞌn xkꞌaꞌl in cꞌant.

14 Ate Kman aju maꞌxix toclen in binjtz tkꞌajkꞌajel twiꞌ max tuj cyaꞌj in julin wen:

15 e tzaj t-xoꞌn ke plech tucꞌix tkan kꞌancyok, atzun ke aj kꞌoj wiꞌje biꞌx e jel ok tuꞌn, ex biꞌx baj cysputun cyib.

16 Biꞌx kꞌanchaꞌlin aju t-xeꞌpun mar ex ke tkꞌukbil txꞌotxꞌ tuꞌn tkꞌajkꞌajel twi Kman puro cyuw wen, ex tuꞌnju cyuwxix tzaj t-xupin.

17 Max tuj cyaꞌj tzaj tnukpiꞌn Dios tkꞌab wiꞌje, ex tuꞌn tkꞌab in jatze tuj nintz mar.

18 Ma chin clete tuꞌn tuj cykꞌab aj kꞌoj wiꞌje, akeju in el icꞌune cyuꞌn ex at mas cyipun nwitze.

19 E oc tzokpaj wiꞌje tej atintoke tuj yajbil, pero ate Kman tzaj oninte weye.

20 In tzokpete tuꞌn, tuꞌn ntene tuj jun chkꞌajlaj maꞌ twitz; in clete tuꞌn, tuꞌnju at tcꞌujlalil wiꞌje.

21 Ma tzaj tkꞌoꞌn Kman chojbil weye tuꞌnju tzꞌaklxix kine ex tuꞌnju mintiꞌ npaltile twitz,

22 ex tuꞌnju cucx nbete tuj tbe Kman ex mi jun maj ma tzꞌel npaꞌn wibe tiꞌj.

23 Cucx in chin ximane cyiꞌj ke tmandamyent, ex mi jun maj ma tzꞌel wicꞌune tley.

24 Ma chin tene twitz mintiꞌ npaltile; ma tzꞌel npaꞌn wibe tiꞌj ju mya baꞌn.

25 Ma tzaj tkꞌoꞌn Kman chojbil weye tuꞌnju tzꞌaklxix kine ex tuꞌnju mintiꞌ npaltile twitz.

26 Aya Nman, in japun tyola tucꞌil ju xjal in japun tyola tuꞌn, ex tzꞌaklxixa tucꞌil ju xjal tzꞌaklxix.

27 Puro baꞌna tucꞌil ju xjal sak tuj tanmi, pero ax cyuwa tiꞌj ju xjal elni twitz tuꞌn t-sbun.

28 Tuꞌna in che clet ke xjal mans, atzun keju in jaw cyniman cyib, toc tcwenta cyiꞌj ex in tzaj mya baꞌn cyibaj tuꞌna.

29 Nman, aya in tzaj kꞌonte spicꞌun weye; Nman Dios, tuꞌna in tzaj tkꞌoꞌna spicꞌun tuj klolj jatum atine.

30 Tuꞌnju onbil tuꞌna chin oquel tzokpaje cyiꞌj aj kꞌoj wiꞌje, ex chin oquexe twi muro toc tiꞌjele cytanmi.

31 Aju be te Dios tzꞌaklxix te, ex mintiꞌ tpaltil tyol; ate Dios colol cye cycyakil keju in keꞌ cycꞌuꞌj tiꞌj.

32 Oꞌcx jun Dios at, aju Kman, ex oꞌcx a Dios jacu ko clet tuꞌn.

33 Ate Dios in tzaj kꞌonte wipune, ex a onil weye tuꞌn ntene mintiꞌ npaltile.

34 A in tzaj kꞌonte tipumal nkane tuꞌn tbant nkelane ic tzaꞌn jun masat, ex a in jax kꞌinte weye twiꞌ jun lugar maꞌxix tjaw jatum tuꞌn ntene segurxix;

35 A in tzaj kꞌonte xnakꞌtzbil weye tuꞌn tbant nkꞌojine, ex a in tzaj kꞌonte wipune tuꞌn tliꞌpj tiꞌj xobl plech wuꞌne, aju kꞌan cꞌuxbil ttxꞌotxꞌil.

36 Aya in colin wiꞌje, ex in chin clete tuꞌna; tuꞌn t-xtalbila tcyakil baꞌn ma tzꞌel weye.

37 Baꞌn ma tzꞌel nbeye tuꞌna, ex bajx che ex jilj ke nkane.

38 Inx lpeꞌye cyiꞌj aj kꞌoj wiꞌje ex e naj wuꞌne, ex maxi in ajtz meltzꞌaje tejxi cycub baj wuꞌne.

39 Biꞌx e cub baj, ex paẍuꞌn e oc wuꞌne. Ya mintiꞌ e jaw weꞌtl; e cub tzꞌak tjakꞌ nkane.

40 Aya tzaj kꞌonte wipumale tuj kꞌoj; o tbinchaya tuꞌn cycub ẍmejeꞌ nwitze ke aj kꞌoj wiꞌje.

41 Tuꞌna e jeꞌl ok ke aj kꞌoj nwitze; cyjaꞌtzun e naj wuꞌne akeju e el icꞌunte weye.

42 E kanin onbil, pero mi jun o onin cyiꞌj; e cubsan twitz Kman, pero mintiꞌ e tzaj tzakꞌweꞌn tuꞌn.

43 Biꞌx e cub naj wuꞌne mer ic tzaꞌn tkukil txꞌotxꞌ. E baj nwabane mer ic tzaꞌn txꞌotxꞌ tuj cay.

44 Ma chin clete tuꞌna tej cykꞌojin ke nxjalile wiꞌje, ma chin tene tuꞌna te nejenel cyibaj ke nasyon, ke xjal mintiꞌ ojtzkiꞌn wuꞌne in che ajben weye.

45 Oc in chin binjtze cyuꞌn, in chinx cyniman; ex in chin cub biꞌne cyuꞌn ke stranjer xjal.

46 Ke stranjer xjal in tzaj tchi cyiꞌj ex in che luꞌlun oc cyetz tuj lugar te cycolbil cyib.

47 Itzꞌte Kman. Cxel nkꞌoꞌne chjonte te tuꞌnju a Colol wiꞌje. Jawxwit nimsaꞌn tbi Dios aju clol weye ex colol wiꞌje.

48 Atzunju Dios ma kꞌonte t-xel cyiꞌj aj kꞌoj wiꞌje, ex ma che cyaj tkꞌoꞌn ke tnam tjakꞌ ncawbile.

49 Ate Kman ma clon weye cye aj kꞌoj wiꞌje, akeju jaw cyiꞌn cyib tuꞌn cykꞌojin wiꞌje.

50 Cyjaꞌtzun in jaw nnimsaꞌne tbiya cyxol ke nasyon, ex in chin bitzane te nimbil tbiya.

51 In tzaj tkꞌoꞌna tipumal ju rey scꞌoꞌmaj tuꞌna tuꞌn tcub cyiꞌj aj kꞌoj tuꞌn; cucx in tbinchaꞌna xtalbil te David ex cye ke tiyjil.