2 E tzajtzun ttxcoꞌn David ke aj Gabaón ex o yolin cyucꞌil. (Ke aj Gabaón mya aj Israel ke, nok oꞌcx ax jun cꞌloj aj Amorrey otok che cyaj ten, ex otok txi cytziyan aj Israel jun yol axix toc cye ka tuꞌn miꞌn cycyim, atzunte Saúl oc tilil tuꞌn tuꞌn cycub tbyoꞌn nok tuꞌn cylaj aj Israel ex aj Judá.) 3 Xitzun tkanin David cye:

—¿Ti cbantel wuꞌne cyiꞌje? ¿Ti cbantel wuꞌne tuꞌn tbant tiꞌj ju mya baꞌn o binchanjtz cyiꞌje, tuꞌntzun tcub cycyꞌiwlaꞌne ke xjal etzan tuꞌn Kman?

4 Atzun cye aj Gabaón tzaj cytzakꞌweꞌn:

—Mya pwak ke kaj te Saúl ex cye keju at cyxilen tucꞌil, ex mintiꞌ koclene tiꞌj tuꞌn tcyim jun aj Israel, che chi.

Xitzun tmaꞌn David cye:

—Cykꞌmantze weye alcye cyajbile tuꞌn nbinchanteye cyiꞌje.

5 Ex tzajtzun cytzakꞌweꞌn:

—Aju xinak o ko naje tuꞌn ex o tajbe tuꞌn biꞌx kcub naje te jumajx tuꞌntzun miꞌn ktentle tuj cytxꞌotxꞌ aj Israel, 6 kajbile tuꞌn cytzaj kꞌoꞌn wuk tiyjil ateꞌx, ex che cjawiltzun kyobine twitz Kman tuj tnam Gabaa, jatum najltok Saúl aju scꞌoꞌmaj tuꞌn Kman.

Atzunte rey cub tuj twitz tuꞌn t-xi tkꞌoꞌn, 7 pero tzaj tzꞌeꞌy tcꞌuꞌj tiꞌj Mefi-boset aju tcyꞌajal Jonatán ex tal tchman Saúl, tuꞌnju yol axix toc otok bant tiꞌj tuꞌn tucꞌil Jonatán twitz Kman. 8 E ocx tpresin rey cabe tcyꞌajal Saúl e tzaj tiꞌj ju xuꞌj Rizpa tbi, aju tmeꞌjel Aja; Armoni tbi jun ex Mefi-boset tbi juntl, ex cyucꞌix jweꞌ tal Merab aju tmeꞌjel Saúl, ex tcyꞌajal Adriel ke, ate Adriel tcyꞌajal Barzilai aju aj Mehola, 9 ex e jeꞌxtzun tkꞌoꞌn cye aj Gabaón, ex jaw jatzꞌoꞌn cykul max twi witz twitz Kman. Cyjaꞌtzun tten junx e cyim ke wuk xjal lu tuj kꞌij tej matok in jaw chmet sebad.

10 Atzunte Rizpa aju tmeꞌjel Aja xi tiꞌn jun xbalun chꞌiꞌx twitz, cub tkꞌoꞌn twiꞌ jun pic ex cub paleꞌ tibaj. Axtzun cyaj ten atxix tej ttzyet tuꞌn tjaw chmet sebad ex tejxi tcꞌuꞌl jbal; te kꞌijl mintiꞌ xi tkꞌoꞌn ambil tuꞌn cypon lakꞌeꞌ ke cꞌutz cyiꞌj ke cyimni, ex te konicꞌan mintiꞌ xi tkꞌoꞌn ambil tuꞌn cypon lakꞌeꞌ ke txcup te tjakꞌ cꞌul.

11 Tejtzun t-xi kꞌmaꞌn te David aju otok tbincha Rizpa aju juntl t-xuꞌjil Saúl, 12 xiꞌtzun ex e tzaj tiꞌn ke tbakil Saúl ex cyucꞌix keju te Jonatán aju tcyꞌajal, atzun ateꞌ tuj cytxꞌotxꞌ ke xjal najlke tuj Jabes tuj txꞌotxꞌ Galaad. Atzun ke jlu otok che ex elkꞌante tuj plas tuj tnam Bet-sán, jatum otok jaw cyyoban aj Filistey tuj kꞌij tej tcub Saúl cyuꞌn tuj Gilboa. 13 Xitzun tmaꞌn David tuꞌn ticꞌ lakꞌbaꞌn ke tbakil Saúl ex cyucꞌix ke te Jonatán, ex tuꞌn cyjaw kꞌiꞌn cybakil keju e jaw yoban; 14 ex cuꞌxtzun cymakuꞌn ke tbakil Saúl ex cyucꞌix keju te Jonatán tuj tpantyón Cis aju tman Saúl, max tuj Zela tuj cytxꞌotxꞌ tiyjil Benjamín. Tcyakil o bant ic tzaꞌnx otok tma rey. Ex tbajlenxi jlu tzaj tbiꞌn Dios aju tnaꞌj Dios David tiꞌj cytxꞌotxꞌ aj Israel.

15 E ul juntl maj aj Filistey kꞌojlel cyiꞌj aj Israel. Etztzun David cyucꞌix ke xjal at cyoclen ttxlaj tuꞌn cykꞌojin cyiꞌj. Atzunte David nim o sict. 16 Ex attok jun nintz xjal Isbi-benob tbi oc tilil tuꞌn tuꞌn tcub David. Aju tlans te wuk libr tucꞌil mey talil, ex toctok jun acꞌaj spad tcꞌuꞌj. 17 Pero ate Abisai aju tal Sarvia xiꞌ onil tiꞌj David, oc tzokpaj tiꞌj aj Filistey ex cub tbyoꞌn. Entons ke xinak in che ajbentok te David xi cymaꞌn tuꞌn miꞌn tetztl David cyucꞌil tuj kꞌoj, tuꞌntzun miꞌn tyupj ju spicꞌun cye aj Israel.

18 Te tibajxi oc juntl kꞌoj cyiꞌj aj Filistey tuj lugar Gob. Ate Sibecai aju aj Husatit, cub byonte Saf aju cyiyjil ke xjal maꞌ cywaꞌl. 19 Ex tuj juntl kꞌoj oc cyiꞌj aj Filistey ax tuj lugar Gob, ate Elhanán aju tcyꞌajal Jair aju aj Belén cub byonte Goliat aju aj Gat, ex aju tlans kꞌiꞌn, maꞌ twaꞌl ex maꞌ tcꞌitz.

20 Tuj tnam Gat oc juntl kꞌoj. Attok jun xinak ma chixin maꞌxix twaꞌl ex kakchak tal tkꞌab tiꞌj junjun tkꞌab, ex kakchak tal tkan tiꞌj junjun tkan, 24 tuꞌn tcyakilx. Ax cyiyjil ke xjal maꞌ cywaꞌl jlu, 21 ex e oc tyoꞌn xjal lu ke aj Israel tuꞌn cykꞌojin tucꞌil, ex cub byoꞌn tuꞌn Jonatán aju tcyꞌajal Simea aju terman David. 22 Akeju cyaje xjal maꞌ cywaꞌl lu, tiyjil Refa ke, aju aj Gat, pero e cub byoꞌn ke tuꞌn David ex cyuꞌn ke xjal at cyoclen ttxlaj.