2 Cycyakiltzun ke xinak aj Israel cyaj colin David cyuꞌn, tuꞌn cyxi lpeꞌ tiꞌj Seba aju tcyꞌajal Bicri. Atzun cye aj Judá, xiꞌynix ttzi nima Jordán ponin baj max tuj Jerusalén, cucx e oc lpeꞌ tiꞌj cyrey.

3 Tejtzun taj meltzꞌaj David tuj tja ma tuj Jerusalén, e tzaj tiꞌn keju laj t-xuꞌjil akeju otok che cyaj tkꞌoꞌn xkꞌukil tja, ex e ocx tkꞌoꞌn tuj juntl ja ex e oc tkꞌoꞌn xjal te cwentil cye. Cucx e oc tcwentin rey ke xuꞌj lu, pero mintiꞌ cub tmojban tib cyucꞌil. Cyjaꞌtzun e cyaj tlamoꞌn ke ex e ten ic tzaꞌn meba xuꞌj ke tejxi cycyim.

4 Te tibajxi xi tmaꞌn rey te Amasa cyjaꞌ:

—Txcontza ke xinak aj Judá, ex tuj ox kꞌij jaꞌlo bix tzula tzalu cyucꞌix ke xjal tucꞌila.

5 Xiꞌtzun Amasa chmolte cye aj Judá, pero mas nim tyemp ten ic tzaꞌnju otok bant tiꞌj. 6 Xitzun tmaꞌn David te Abisai:

—Ate Seba cbantel mas mya baꞌn kiꞌj tuꞌn ic tzaꞌn te Absalón. Cyjaꞌtzun kꞌinxa ke nsoldadiye ex lpexa tiꞌj tuꞌntzun miꞌn tocx tclon tib cyuj ke tnam toc muro cyiꞌj, ex tuꞌn jlu jacu txi tzokpaj kuꞌn.

7 Ke xinak ateꞌ tucꞌil Joab, cyucꞌix ke aj Seretey ex ke aj Peletey akeju xkꞌukil tja rey, ex cyucꞌix ke soldad cyuw cycꞌuꞌj tuj kꞌoj, e etz tuj Jerusalén tucꞌil Abisai tuꞌn cyoc lpeꞌ tiꞌj Seba. 8 Tej chꞌixtok cypon nikayin jatum taꞌ nintz pic at tuj Gabaón, etz Amasa canul cyiꞌj. Ate Joab toctok t-xbalun in ajben tuj kꞌoj; te tiꞌjxi tocsaꞌn jun cꞌalbil tcꞌuꞌj, ex toctok jun spad tcꞌuꞌj xiꞌyni tuj tjayil. Tej t-xi lakꞌeꞌ Joab tucꞌil Amasa, jatz tzꞌak t-spad tuj tjayil, 9 ex tzaj tzyuꞌn Amasa tiꞌj t-xmatz tuꞌn Joab tuꞌn tbankꞌab tuꞌn tel ttzꞌuban twitz, ex xi tkanin te:

—¿Baꞌnpe taꞌya erman?

10 Atzunte Amasa mintiꞌ oc tkꞌoꞌn tcwent tiꞌj spad kꞌiꞌntok tuꞌn Joab tuj tkꞌab. Jurattzun xi t-xayuꞌn Joab ju spad tuj tcꞌuꞌj, ex biꞌx e cub tzꞌak cycyakil ke tuj tcꞌuꞌj twitz txꞌotxꞌ. Mintiꞌtl xiꞌ Joab bantzalte, porque tuꞌn jlu biꞌx o cyim. Atzunte Joab tucꞌix Abisai aju terman, e icꞌ tuꞌn cyxi lpeꞌ tiꞌj Seba aju tcyꞌajal Bicri, tuꞌn tcub tiꞌj cyuꞌn. 11 At jun cyxol ke t-soldad Joab cub weꞌ ttxlaj t-ximlal Amasa ex xi tmaꞌn cyjaꞌ:

—Alcye tkꞌon tib tucꞌil Joab ex tucꞌil David, lpextzun tiꞌj Joab.

12 Pero ate Amasa tcubsaꞌntok t-ximlal tuj be ex nojni tiꞌj tuꞌn chicꞌ; ex tej ttil soldad ka cycyakil xjal in che cub weꞌ tiꞌj, icꞌx tiꞌn t-ximlal Amasa ttxlaj be ex icꞌx tmaksiꞌn tibaj tuꞌn jun xbalun, porque o til cycyakil xjal in che pon ax e cub weꞌ queꞌyilte. 13 Te tibajxi, tej ticꞌlen kꞌiꞌn tuj be, e icꞌtzun cycyakil keju in che bettok tucꞌil Joab tuꞌn cyxi lpeꞌ tiꞌj Seba, tuꞌn tcub tiꞌj cyuꞌn.

14 Ate Seba icꞌ tuj cytxꞌotxꞌ cycyakil cyiyjil aj Israel tejxi tpon max tuj tnam Abel-bet-maaca, ex cycyakil keju tiyjil Bicri baj cychmon cyib ex e ocx lpeꞌ tiꞌj tuj tnam. 15 Tejtzun cypon ke xinak ucꞌin tuꞌn Joab tuj tnam Abel-bet-maaca, oc cyjocun txꞌotxꞌ tiꞌj muro te tiꞌjxi tuꞌntzun cyocx tuꞌn cyoc tzokpaj tiꞌj tnam, ex tuꞌn cycyakil o cyajbe tuꞌn tcub cyxitun muro. 16 Attok jun xuꞌj at tnabl etz schꞌin tujxi muro ex tma cyjaꞌ:

—Cybinchame xtalbil, chin cybintze. Chin cybintze. Cykꞌmanxe te Joab tuꞌn ttzaj lakꞌeꞌ porque waje tuꞌn nyoline tucꞌil.

17 Tejtzun tpon lakꞌeꞌ Joab, xi tkanin xuꞌj te:

—¿Apeya Joab?

—Akine, chi Joab xi ttzakꞌweꞌn.

Xitzun tmaꞌn xuꞌj te:

—Bintza ke nyole, akine ajbel teya.

—Jacu txi nbiꞌne, chi Joab xi ttzakꞌweꞌn.

18 Tzyettzun tyolin xuꞌj ex tma:

—Ojtxi attok jun yol in kꞌmanjtz cyjaꞌ: Ka at jun taj tuꞌn tbinte jun tiꞌxti, baꞌn tuꞌn txi tkanin tuj tnam Abel. Ex cyjaꞌtzun in bant tiꞌj jun tiꞌxti. 19 Aju ktanmiye, atzun jun tnam miban kꞌojin ex tzꞌaklxix cyxol aj Israel, ex maꞌ toclen. Masque icju, atzun teya taja tuꞌn tcub t-xituna. ¿Tikuꞌntzun tajbila tuꞌn tnaj aju tnam etzan tuꞌn Kman?

20 Xitzun ttzakꞌweꞌn Joab:

—Mintiꞌ in chin ximane tiꞌj jlu. Mya we nximbetz tuꞌn tcub nxitune ex mi tuꞌn tnaj. 21 Mya icju, nok tuꞌnju at jun xinak najl tuj tiwitz txꞌotxꞌ cye aj Efraín, Seba tbi, aju tcyꞌajal Bicri, ma jaw tiꞌn tib tiꞌj rey David. Kꞌontza oꞌcx ju xinak lu weye, ex jacutzun chin el lakꞌeꞌye tiꞌj tnam, chi Joab.

—Jacu tzꞌex kxoꞌne twiꞌ teya max twi muro, chi xuꞌj xi ttzakꞌweꞌn te Joab.

22 Xiꞌtzun xuꞌj yolil tucꞌil nabl cyucꞌil cycyakil xjal tuj tnam, ex el cytxꞌemin twi Seba ex ex cyxoꞌn te Joab. Xitzun tmaꞌn Joab tuꞌn toc kꞌajtzaꞌn chun tuꞌn cyel lakꞌeꞌ xjal, ex e jeꞌltzun lakꞌeꞌ tiꞌj tnam, ex teyle junjun aj tja, atzunte Joab aj meltzꞌaj tuj Jerusalén tuꞌn tyolin tucꞌil rey.

23 Ate Joab nejenel cye cycyakil soldad aj Israel, atzunte Benaía aju tcyꞌajal Joiada, atzun nejenel cye aj Seretey ex aj Peletey akeju xkꞌukil te rey. 24 Atzunte Adoram nejenel tuj akꞌuntl in che oc lajwersin xjal tiꞌj tuꞌn tbant, ex atzunju aj tzꞌibal te rey, atzun Josafat aju tcyꞌajal Ahilud. 25 Atzunte Seva juntl aj tzꞌibal, ex ate Sadoc tucꞌix Abiatar pal ke. 26 Atzunte Ira aju aj Jair ax icx in ajben te pal te David.