5 Xiꞌtzun Joab tuj tja rey ex xi tmaꞌn te:

—Jaꞌlo ma che el ke ajbel teya tuj cychꞌixwi tuꞌna, Tat Rey, akeju ẍe clonte teya cyucꞌix ke tcyꞌajala, ke tmeꞌjela ex ke t-xuꞌjila. 6 Matzun tyecꞌuya jaꞌlo ka mintiꞌ taja cyiꞌj ke nejenel cye t-soldadiya ex ke xjal maꞌ cyoclen ateꞌ ttxlaja, porque cꞌujlaꞌn tuꞌna keju in che icꞌun teya, ex icꞌun tuꞌna keju in che cꞌujlan teya. Matzun tzꞌel nnicꞌe tiꞌj jaꞌlo Tat Rey, mas baꞌn te teya nokwit itzꞌx Absalón, ex masque kcyakile otok ko cyime. 7 Txi naja jaꞌlo Tat Rey, ex kꞌukbanxa cycꞌuꞌj ke xjal lepchkeꞌc tiꞌja, porque ka miꞌn, cxel nmaꞌne teya jun yol axix toc twitz Kman, tuj konicꞌan jaꞌlo mi jun xjal cyjel ten tucꞌila. A jlu, masxix mya baꞌn cꞌelel te teya twitz tcyakilju mya baꞌn o tzaj tiꞌja tej atxix cuꞌxuna ex asta jaꞌlo, chi Joab.

8 Jawtzun weꞌ rey ex xiꞌ tuꞌn tcub keꞌ ttzi tpwertil tnam. Tej t-xi kꞌmaꞌn cye cycyakil xjal ka kꞌukltok rey ttzi tpwertil tnam, e jeꞌxtzun cycyakil tucꞌil rey.

Atzun cye soldad aj Israel cycyakil otok che aj ok cyja. 9 Ex cycyakil cꞌloj cyiyjil aj Israel in che yolintok tiꞌj ex in cymaꞌntok: Tuꞌn rey David o ko clet tuj cykꞌab aj Filistey ex tuj cykꞌab aj kꞌoj kiꞌj, pero nok tuꞌn tlaj Absalón ma tzꞌex ok tzalu tuj ktanmi. 10 Atzunte Absalón aju otok tzꞌoc kkꞌoꞌn te krey ya ma cyim tuj kꞌoj. ¿Ti in baj ke? ¿Tikuꞌn miꞌn sajtz kxmoxin rey David kucꞌil? Che chi. 11 Pon tkanil max tuj tja rey David tiꞌj tcyakilju yol in che yolin aj Israel tiꞌj. Atzunte rey David xi t-samaꞌn jun xjal kꞌmalte cye pal Sadoc ex Abiatar: Che yoline cyucꞌil ke cytijil xjal tuj Judá ex cykaninxe cye tikuꞌn naꞌnx ttzaj cymaꞌn weye tuꞌn waj meltzꞌaje tuj njaye, porque cycyakil mastl cꞌloj cyiyjil aj Israel ma tzaj cymaꞌn weye tuꞌn waj meltzꞌaje. 12 Cymanxe cye ka mya tuj tumel tuꞌn ake tuꞌn cycyaj ten te mancbil tuꞌn cymante jun yol tuꞌn waj meltzꞌaje, porque ax kerman ke kib cyucꞌil, chi David. 13 Ax icx xi tmaꞌntl tuꞌn t-xi cymaꞌn te Amasa cyjaꞌ: Chi rey in tmaꞌn teya: Ax wermaniya, cyjaꞌtzun aya cꞌoquel te nejenel cye nsoldadiye te t-xel Joab. Katzun miꞌn ma japun wuꞌne icju, cubwit ncastiwoye cyuwxix wen tuꞌn Dios.

14 Cyjaꞌtzun tten cub tiꞌj cynabl cycyakil aj Judá ex cycyakil xjal lu oc junx cyximbetz, xitzun cysamaꞌn tkanil te rey tuꞌn tajtz meltzꞌaj cyucꞌix cycyakil ke t-soldad. 15 Cubtzun be tuꞌn rey ex ajtz meltzꞌaj ex ul ttzi nima Jordán. Atzun cye aj Judá pon cychmon cyib tuj Gilgal tuꞌn cyxiꞌ canul tiꞌj ex te onilte tuꞌn ticꞌtz tuj nima Jordán. 16 Ax icx te Simei aju tcyꞌajal Gera, aju tiyjil Benjamín ex aj Bahurim, tzaj naj ex cubil cyucꞌil aj Judá tuꞌn t-xiꞌ cyucꞌil cꞌmolte rey David, 17 ucꞌin jun mil xjal tiyjil Benjamín tuꞌn. Atzunte Siba aju cymajen ke tiyjil Saúl, tucꞌix olaj tcyꞌajal ex winkin tmajen ucꞌin tuꞌn, otok pon nej tej tpon David. 18 Icꞌxtzun Siba tuj xajbil aꞌ tuꞌn tonin cyiꞌj keju ateꞌ tuj tja rey David, tuꞌn cyicꞌtz tuj nima ex tuꞌn tbant tuꞌn nok alcye ctzajel tmaꞌn rey te. Tej cyjaꞌtok ticꞌtz rey tuj nima Jordán, cub mutzeꞌ Simei twitz, 19 ex xi tmaꞌn te:

—In chin cubsane twitza Tat Rey tuꞌn miꞌn ttzaj tnaꞌna npaltile, ex tuꞌn miꞌn ttzaj tnaꞌna wile, aju o nbinchaye twitza tej tetza tuj Jerusalén. Miꞌn tzaj tloꞌch tcꞌuꞌja wiꞌje, 20 porque ma tzꞌel nnicꞌe tiꞌj, akine at npaltile, ex tuꞌntzun jlu akine ma chin ul neje canul tiꞌja, cywitz cycyakil ke tiyjil José, chi Simei.

21 Atzun te Abisai aju tal Sarvia tma:

—¿Myapetzun il tiꞌj tuꞌn tcyim Simei tuꞌnju tzaj tkanin castiw tibaj rey scꞌoꞌmaj tuꞌn Kman?

22 Atzunte David xi ttzakꞌweꞌn:

—Mintiꞌ cyoclene tiꞌj jlu akeye tal Sarvia. ¿Tikuꞌn in che oc meltzꞌaje wiꞌje? Jaꞌlo baꞌn wuꞌne akine rey cye aj Israel, cyjaꞌtzun mi jun aj Israel cnajel tuj kꞌij lu.

23 Te tibajxitzun o yolin rey tucꞌil Simei, ex xi tmaꞌn jun yol axix toc te ka mintiꞌ tuꞌn tcyim.

24 Ax icx te Mefi-boset aju tal tchman Saúl tzaj canul tiꞌj rey. Atxix tej tetzlen rey ex tejxi tpon meltzꞌaj tcublenxi cyiꞌj ke aj kꞌoj tuꞌn, naꞌnxtok tel ttxꞌjoꞌn Mefi-boset tiꞌj tkan mi tiꞌj t-xbalun, ex naꞌnxtok tel tmatzoꞌn ttxaꞌn t-xmatz tuꞌn tlaj tbis. 25 Tej tul canul tiꞌj rey tuj Jerusalén xi tmaꞌn rey te:

—Mefi-boset ¿tikuꞌn mintiꞌ xiꞌya wucꞌile?

26 Atzunte xi ttzakꞌweꞌn:

—Tat Rey, in cub sbuꞌne tuꞌn nmajene. Tuꞌnju cox kine, xi nmaꞌne te tuꞌn toc tkꞌoꞌn t-siy jun bur tuꞌntzun njaxe chejil tibaj tuꞌntzun nxiꞌye tucꞌila, 27 pero aju nmajene nok ma nicꞌan yol wiꞌje twitza. Masque icju, pero aya Tat Rey ic ttena ic tzaꞌn jun t-anjel Dios, ex binchama nok alcye baꞌn tuj twitza. 28 Masque cycyakil wermaniye iltok tiꞌj tuꞌn kcyime tuꞌna Tat Rey, pero akine tmajena in txconjtze tuꞌna ax tuꞌn nwaꞌne tucꞌila tiꞌj tmesa. Ya mintiꞌtl mas tuꞌn t-xi nkanine teya Tat Rey, chi Mefi-boset.

29 Atzunte rey xi ttzakꞌweꞌn:

—Ti til mastl yol tuꞌn kyolin tiꞌj. Ya ma txi nmaꞌne tuꞌn tcub tmij ttxꞌotxꞌa tucꞌil Siba.

30 Atzunte Mefi-boset xi ttzakꞌweꞌn:

—E tcyaj ten tcyakil txꞌotxꞌ te Siba. Aju weye mas baꞌn tuj nwitze, chjonte baꞌn ma tzul meltzꞌaja tuj tjaya, chi Mefi-boset.

31 Ax icx te Barzilai aju aj Galaad otok tzaj tuj Rogelim onil te rey tuꞌn ticꞌx tuj nima Jordán, ex axtzun tuꞌn tbaj tkꞌolben tib tucꞌil rey. 32 Ex toctok Barzilai twiꞌ 80 abkꞌi. Otok tijin wen ex tuj tkꞌijlalil tej tten rey tuj lugar Mahanaim otok txi tkꞌoꞌn Barzilai tcyakilju at tajben te rey, porque kꞌinuntok. 33 Xitzun tmaꞌn rey te Barzilai:

—Koꞌ wucꞌile tuj Jerusalén ex jacu tzꞌoc ncwentine ma chixin.

34 Atzunte Barzilai xi ttzakꞌweꞌn:

—Tat Rey, ya nok nicꞌxi abkꞌi tuꞌn ntene twitz txꞌotxꞌ, ex tzaꞌn tten tuꞌn nxiꞌye tucꞌila tuj Jerusalén. 35 Ma chin japune twiꞌ 80 abkꞌi, ya mintiꞌ tcꞌocꞌjal nnicꞌbeble ex tcꞌocꞌjal ncꞌaye tuj ntziꞌye, jaꞌlo mlay txi nmaꞌne ka at tcꞌocꞌjal ex ka mintiꞌ tcꞌocꞌjal nnicꞌbeble, ex ya mintiꞌ in nbiꞌntle tkꞌajkꞌajel cywiꞌ ke bitzal. Ex miꞌn waje tuꞌn t-sicta wuꞌne oc woc tcwentina. 36 Nok oꞌcx ẍin ul chꞌine te tucꞌila Tat Rey oc ticꞌxa tuj nima Jordán, ex miꞌn bisuna tiꞌj tuꞌn ttzaj tkꞌoꞌna jun chojbil weye. 37 Nok oꞌcx chin cubsale twitza tuꞌn ttzaj tkꞌoꞌna ambil weye tuꞌn waj meltzꞌaje tuj ntanmiye tuꞌn ncyime ma chixin ex tuꞌn ncuꞌx makuꞌne jatum cuꞌx makuꞌn ktzan nmane ex ktzan ntxuꞌye. Pero lu juntl ajbel teya lu, Tat Rey: Aju ncyꞌajale Quimam. E t-xiꞌ tucꞌila, bix tila ti cꞌoquel tuꞌna ex binchama tiꞌj alcye baꞌn tuj twitza, chi Barzilai.

38 Atzunte rey xi ttzakꞌweꞌn:

—E t-xiꞌ Quimam wucꞌile, ex oc nbinchaye tiꞌj nok alcye baꞌn tuj twitza. Ex tcyakilju ctzajel tkanina weye, jacu txi nkꞌoꞌne, chi rey.

39 Cycyakiltzun xjal e icꞌx tuj nima Jordán. Ex tej ticꞌx rey, el ttzꞌuban twitz Barzilai tuꞌn tbaj tkꞌolben tib tucꞌil. Ajtzun Barzilai tuꞌn tpon tja. 40 Atzunte rey cyjaꞌ xiꞌ tuj Gilgal, ucꞌin Quimam tuꞌn, cyucꞌix cycyakil xjal aj Judá, ex mij aj Israel. 41 Cycyakil aj Israel e jeꞌx queꞌyilte rey ex xi cymaꞌn te:

—¿Tikuꞌn ake kermaniye aj Judá ma cheꞌx kꞌinte teya Tat Rey, ex mintiꞌ ma cyma keye, ex ake ma che onin teya tej sicꞌtza tuj nima Jordán cyucꞌix keju ateꞌ tuj tjaya, cyucꞌix cycyakil t-soldadiya? Che chi.

42 Xitzun cytzakꞌweꞌn cycyakil aj Judá cye aj Israel:

—Tuꞌnju at kxilene tucꞌil rey. ¿Tikuꞌn in che kꞌojine tuꞌn tlaj jlu? Baka at jun tiꞌxti te rey ma txi knicꞌbeꞌne, ex ka ma tzꞌel kiꞌne tuꞌn toc te keye.

43 Atzun cye aj Israel xi cytzakꞌweꞌn:

—Pero laj cꞌloj cyiyjil aj Israel kbaje, cyjaꞌtzun mas nim keye koclen tiꞌj rey cywitze. ¿Tikuꞌntzun in ko el cyicꞌune? ¿Baka mya akoꞌye o cub ximante tnejel tuꞌn tajtz meltzꞌaj krey? Che chi.

Pero mas cyuw e yolin aj Judá tiꞌj jlu cywitz aj Israel.