1 SAMUEL
Tzaj tkꞌoꞌn Dios jun tal Ana
1
Tuj tiwitz txꞌotxꞌ cye tiyjil Efraín attok jun lugar Ramá tbi, atzun najltok jun xinak tiyjil Zuf, Elcana tbi. Jeroham tbi tman, ex Eliú tbi tchman, atzun ttxca tchman Tohu tbi, aju tcyꞌajal Zuf, atzun tzajni jlet tiꞌj tiyjil Efraín. 2 Ate Elcana attok cabe t-xuꞌjil; Ana tbi jun, atzun juntl Penina tbi. Ate Penina attok tal otok che tzaj, atzunte Ana mintiꞌtok tal otok tzaj. 3 Tcyakil abkꞌitok nneꞌtz Elcana tuj ttanmi tuꞌn tpon tuj Silo tuꞌn tcꞌulun, ex tuꞌn t-xi tkꞌoꞌn chojbil te Kman Dios aju Tajaw Tcyakil. Ex atzun ateꞌtok cabe tcyꞌajal Elí aju pal, jun Ofni tbi, atzun juntl Finees tbi, ex ax pal ke jlu te Kman.4 Oc t-xi tkꞌoꞌn Elcana jun alumaj te chojbil te Dios, in xi tkꞌoꞌn chꞌin tchiꞌ Penina tucꞌix cye ke tal, 5 atzun te Ana mas tbanil chꞌintl tchiꞌ in xi tkꞌoꞌn Elcana aju tchmil, tuꞌnju cꞌujlaꞌnxix nim tuꞌn masque mibantok alin tuꞌn Kman. 6 Tuꞌntzun jlu icꞌun Ana tuꞌn Penina, nnoꞌc ticꞌleꞌn tuꞌn tjaw kꞌojl, in xmayin tiꞌj, ex cocꞌx nnoꞌc tmaꞌn taꞌw tyol te tuꞌnju mintiꞌ in tzaj tal, porque icx ttzajlen tkꞌoꞌn Kman, miban alin.
7 Iclex in bant tuꞌn Penina tuj junjun abkꞌi oc cyxiꞌ cꞌulul tuj tja Dios; nnoꞌc ticꞌleꞌn tuꞌn tjaw kꞌojl, ex tuꞌntzun jlu nnoꞌc ten Ana okꞌel ex mintiꞌ in waꞌn. 8 Atzunte Elcana aju tchmil in xi tmaꞌn te: Ana, ¿tikuꞌn in okꞌa? ¿Tikuꞌn in bisuna ex mintiꞌ in waꞌna? ¿Myapelo mas baꞌn kine te teya twitzju tuꞌn tten laj tala?
9 At jun maj tej ateꞌtok tuj Silo jaw weꞌ Ana tbajlenxi waꞌn. Atzunte pal Elí kꞌukltok twiꞌ jun siy, nikayin ttzi tja Dios jatum in che ocx ke xjal. 10 Atzunte Ana in okꞌtok tuꞌnju at nim taꞌw tuj tanmi, oc ten naꞌl Dios, 11 ex xi ttziyan jun tyol te Dios ex tma: Nman aya Tajaw Tcyakil: Ka ma tzaj tqueꞌyina aju yajbil weye, akine tmajena, ex ka ma chin pone tiꞌj tcꞌuꞌja, ex ka ma tzaj tkꞌoꞌna jun wale xinak, jacu txi nkꞌoꞌne tuꞌn tajben teya tuj tcyakil tankꞌibl, ex miꞌn tzꞌel ttxaꞌn twiꞌ te jun yecꞌbil ka otok txi nkꞌoꞌne teya, chi Ana.
12 Tuꞌnju nim tuj o naꞌn Ana Dios, oc tkꞌoꞌn Elí tcwent tiꞌj ttziꞌ; 13 atzunte Ana in naꞌn Dios tuj tanmi ex mintiꞌ kꞌajkꞌaj twiꞌ, nok oꞌcx ttziꞌ in yucch. Tuj twitz Elí ka cꞌal kꞌeꞌn te Ana, 14 ex xi tmaꞌn te:
—Colinxa tuꞌn tcꞌana kꞌeꞌn. Kꞌiꞌmel kꞌeꞌn tuj twiꞌya.
15 Atzunte Ana xi tmaꞌn:
—Miꞌn tat, mintiꞌ we ma txi ncꞌan vin ex ka juntl wik kꞌeꞌn, nok oꞌcx atine tuj bis, ex jnicꞌju at tuj wanmiye in xi nkꞌoꞌne tuj tcwent Kman. 16 Miꞌn ximana tiꞌj ka akine jun xuꞌj mya baꞌn, nok oꞌcx in chin naꞌne Dios tuꞌn tlaj nbise ex yajbil weye; tuꞌntzun jlu nim tuj ma chin cub tene naꞌl Dios, chi Ana.
17 —Baꞌn tuꞌn taj meltzꞌaja tucꞌil tzalajbil, ex awt ju Kdios aj Israel koꞌ tzaj kꞌonte teya aju ma txi tkanina te, chi Elí.
18 —Chjontexix teya, chi Ana xi ttzakꞌweꞌn.
Ajtzun meltzꞌaj Ana jatum otok tzaj nej, ex oc ten waꞌl ex mintiꞌtl o bisun. 19 Tuj juntl kꞌij e jaw weꞌ primxix wen, ex cybajlenxi cꞌulun twitz Kman, e aj meltzꞌaj max cyja tuj Ramá. Cubtzun tmojban tib Elcana tucꞌil Ana aju t-xuꞌjil, ex tzaj tkꞌoꞌn Kman aju otok txi tkanin Ana te. 20 Cyjaꞌtzun biꞌx oc ten tal Ana, ex tej tpon tkꞌijlalil ul itzꞌj jun tal xinak, Samuel tbi oc tkꞌoꞌn ex tma: Tuꞌnju o txi nkanine te Kman, chi Ana.
21 Xiꞌtzun Elcana cyucꞌix cycyakil keju ateꞌ tuj tja tuꞌn tpon tuj Silo, tuꞌntzun tjapun tuꞌn aju otok txi ttziyan, ex tuꞌn t-xi tkꞌoꞌn ju chojbil ic tzaꞌnx in bant tuꞌn tuj junjun abkꞌi, 22 atzunte Ana mintiꞌ xiꞌ, nok oꞌcx xi tmaꞌn te tchmil:
—Mlay chinxe, maxi chin xeꞌle ocxi tel tal neꞌ tiꞌj tchꞌuꞌ. Ex biꞌxtzun cxel nkꞌoꞌne te Kman tuꞌn tcyaj ten te jumajx ma chixin.
23 Xi ttzakꞌweꞌn Elcana aju tchmil:
—Binchama alcye baꞌn tuj twitza. Ax tencja max oc tel tal neꞌ tiꞌj tchꞌuꞌ. Ex e tjapun tuꞌn Kman aju o tzaj ttziyan.
Cyjaꞌtzun ax cyaj ten Ana ex o tchꞌisa tal tejxi tel tiꞌj tchꞌuꞌ. 24 Tejtzun tel tiꞌj tchꞌuꞌ, xi tiꞌn ju tal kꞌa tuj tja Dios tuj Silo, matok neꞌx taꞌ. Ax icx xi tiꞌn jun tal tor te ox abkꞌi, ex cab arrob arin, ex jun tal ẍokꞌ tcuꞌx taꞌl twitz uva tuj. 25 Cubtzun cybyoꞌn tal tor te chojbil, ex xitzun cyiꞌn ju tal kꞌa twitz Elí. 26 Xitzun tmaꞌn Ana te Elí:
—Najsama tat, ax toc akine ju xuꞌj aju cub ten naꞌl Dios nikayin ttxlaja tzalu. 27 O txi nkanine te Kman tuꞌn ttzaj tkꞌoꞌn jun wale, ex ma tzaj tkꞌoꞌn aju xi nkanine te. 28 Jaꞌlo cxel nkꞌoꞌne te Kman tuꞌn tajben te tuj tcyakil tankꞌibl, chi Ana.
Atzunte Elí cub mocꞌeꞌ twitz Kman tejxi tpon tacl tibaj twitz max twitz txꞌotxꞌ.