1 Samuel 2

Aju tbitz Ana

Octzun ten Ana naꞌl Dios, ex tma:

Nman, in chin tzalaje tiꞌja tuꞌn tcyakil wanmiye, tuꞌnju in tzaj tkꞌoꞌna acꞌaj wipumale. At tumel tuꞌn njaw tzeꞌne cyiꞌj ke aj kꞌoj wiꞌje, porque aya ma tzꞌonin weye. Ex cyjaꞌtzun in chin tzalaje.

2 Aya Dios xjan, mi aꞌl juntl ic tzaꞌn teya. Mintiꞌ juntl Dios, nok oꞌcx aya. Ex mi aꞌl juntl colol ic tzaꞌn teya.

3 Akeye xjal, miꞌn che yoline jun yol te nimbil cyibe, miꞌn jaw cyniman cyibe, porque ate Kman atzun Diosju, baꞌn tcyakil tuꞌn, ex nnoꞌc tkꞌoꞌn cybinchben xjal tuj malbil, ka tzꞌakl.

4 In che cub ttokin ke xobl cyplech ke xjal at cyipun, ex keju mintiꞌ cyipun in cycꞌmoꞌn cyipumal;

5 keju in sobryin cywa nej, in xi cykꞌon cyib te majen nok tuꞌn tlaj chꞌin cywa; atzun keju nneꞌl cycꞌuꞌj nej, mintiꞌtl nneꞌl cycꞌuꞌj jaꞌlo. Aju xuꞌj mibantok alin, ma tzaj wuk tal; atzunju attok nim tal nej, jaꞌlo in bisun wen tuꞌnju o che cyim tal.

6 Ate Kman nneꞌl kꞌinte cychwinklal xjal, ex ax in tzaj kꞌonte cychwinklal, in che cuꞌx tkꞌoꞌn Kman ke xjal tuj cynajbil cyimni, ex in che jaw itzꞌj juntl maj tuꞌn.

7 Tuꞌn Kman in che oc xjal te meba, ex tuꞌn in che oc te kꞌinun; in che cub tzꞌak xjal tuꞌn, ex in che jaw twaban.

8 Aju xjal meba, a Dios in tzaj oninte te, ex aju xjal misicyer chꞌin at te, in tzaj tkꞌoꞌn Dios aju at tajben te. A Dios in tzaj onin cye tuꞌn cycub keꞌ cyxol ke xjal maꞌ cyoclen; che bel keꞌ tuj jun kꞌukbil tbanilxix tuꞌn cyjaw nimsaꞌn; porque a Kman tajwil tkꞌukbil txꞌotxꞌ, ex tibajtzun jlu cub tkꞌoꞌn enter txꞌotxꞌ.

9 Ke ocslal tiꞌj Dios cwentin ke tuꞌn tuj cybe, atzun keju binchal mya baꞌn che cymel tuj klolj, porque mi jun jacu cub tiꞌj aj kꞌoj tiꞌj tuꞌn, tuꞌn tex tipumal.

10 Cbajel tpaẍuꞌn Kman ke aj kꞌoj tiꞌj, ex max twitz cyaꞌj ctzajel t-samaꞌn kꞌancyok cyibaj. Ate Kman ccawil tibaj tcyakil twitz txꞌotxꞌ, ex cxel tkꞌoꞌn tipumal rey aju ma jaw t-scꞌoꞌn, ex cchꞌiyil tipumal tuꞌn, chi Ana tuj tnaꞌj Dios.

11 Ajtztzun Elcana tuꞌn tpon tja tuj Ramá, atzunte tal kꞌa Samuel ax cyaj ten tuꞌn tajben te Kman ttxlaj pal Elí.

Aju il cybincha ke tcyꞌajal Elí

12 Ke tcyꞌajal Elí puro ploj cymod ex mintiꞌ in che nimante Kman. 13 Mintiꞌ in bant cyuꞌn ic tzaꞌnx at tuꞌn tbant cyuꞌn pal cyucꞌil xjal. Oc tpon jun xjal kꞌol chojbil, jurat naj in pon jun tmajen pal kꞌiꞌn jun jacbil twitz chibj tuꞌn, ex matok in tzkꞌaj chibj, 14 in cuꞌx tlamoꞌn naj ju jacbil twitz chibj tuj cꞌil, ex tcyakilju in tzyet tuꞌn jacbil in xi tiꞌn te pal. Atzun in bant cyuꞌn cyiꞌj cycyakil aj Israel oc cypon tuj lugar Silo tbi. 15 Ax icx in bant cyuꞌn tiꞌj t-sebyil alumaj naꞌnxtok tcub patun tibaj altar, jurat naj in pon tmajen pal tucꞌil xjal otok pon kꞌol chojbil, ex in xi tmaꞌn te: Kꞌontza chibj te pal tuꞌn tbaj ntxoꞌne twitz kꞌakꞌ; porque mlay txi tcꞌmoꞌn pal ju chibj tzkꞌajsaꞌn tuj txicbil, nok oꞌcx chaꞌx cxel wiꞌne. 16 Ex katzun ma tma xjal kꞌol chojbil: E tcub patit seb nej, jacutzun txi tiꞌna nok nicꞌpunx taja ka chi, atzunte tmajen pal in xi ttzakꞌweꞌn: Mlay, biꞌx kꞌontza jaꞌlo, ex ka mi ma tzaj tkꞌoꞌna, cꞌelel wiꞌne tuj tkꞌaba lajwers, chi tmajen pal. 17 Aju il cybincha cuꞌxun lu maꞌxix tuj twitz Kman, tuꞌn tlaj mintiꞌ tchiylal oyaj tuj cywitz, aju in xi cykꞌoꞌn xjal te Kman.

18 Atzunju cuꞌxun Samuel in ajbentok tuj tja Dios, ex toctok jun t-ẍjoꞌw sak queꞌyin ic tzaꞌnju in ajben cyuꞌn pal. 19 Tcyakil abkꞌi in baj tbinchaꞌntok ttxu Samuel jun tal t-xbalun, ex in xi tiꞌntok oc cyxiꞌ tucꞌil tchmil kꞌol chojbil tuj tja Dios ic tzaꞌn in bant cyuꞌn junjun abkꞌi. 20 Oc tpon Elcana tucꞌix t-xuꞌjil, in che cub cyꞌiwlaꞌn tuꞌn Elí ex in xi tmaꞌn Elí te Elcana cyjaꞌ: Awt Kman Dios tzaj kꞌonte mastl tcꞌwaꞌla tiꞌj xuꞌj lu, te t-xelju ma txi tkꞌoꞌn tuꞌn tajben te Kman, chi Elí. Ex e ajtzun meltzꞌaj cyja. 21 Cubtzun tcyꞌiwlaꞌn Kman aju xuꞌj Ana, ex oc ten tal. Cyjaꞌtzun tten, ul itzꞌj oxetl tal Ana kꞌa ex cabe txin, atzunte Samuel in chꞌiytok tuj tja Dios.

22 Atzunte Elí otok tijin wen, ex o tbi tcyakilju in cybinchaꞌntok ke tcyꞌajal cyiꞌj cycyakil aj Israel, ax icx in che cub tantok cyucꞌil ke xuꞌj in che ajbentok ttzi ja xbalun jatum in cub tyecꞌun tib Dios. 23 Cyjaꞌtzun xi tmaꞌn Elí cye tcyꞌajal: ¿Tikuꞌn in cybinchaꞌne aju mya baꞌn lu? Porque in nbiꞌne cye cycyakil xjal aju cybinchbene mya baꞌn. 24 Miꞌn, akeye ncyꞌajal, mya baꞌn yolbil cyeye in nbiꞌne cyuꞌn aj Israel, akeju etzan tuꞌn Kman. 25 Ka at jun xjal ma binchan mya baꞌn tiꞌj juntl xjal, ate Dios jacu txi binchante cyiꞌj; pero ka tiꞌjcu Kman ma tbincha jun xjal il, ¿alcye jacu onin tiꞌj? Chi Elí cye tcyꞌajal. Atzun cye mintiꞌ xi cyniman tyol cyman tuꞌnju otok cub t-ximan Dios tuꞌn cycyim.

26 Atzunte cuꞌxun Samuel in chꞌiytok, ex baꞌn eꞌla tmod tuj twitz Dios ex tuj cywitz xjal.

27 Tujx tkꞌijlalil lu pon jun t-sanjel Dios tucꞌil Elí ex tma: Chi Kman ma tma: Tej cyten ke t-xeꞌchela tuj Ejipt te tmajen rey Faraón, axix toc cub nyecꞌun wibe cywitz. 28 Ex cyxol cycyakil cꞌloj cyiyjil aj Israel, akine in jaw scꞌonte cye t-xeꞌchela tuꞌn cyoc te pal, tuꞌntzun cyajben weye ex tuꞌn tcub cypatun ke alumaj tibaj n-altare, ex tuꞌn tcub cypatun storac, ex tuꞌn toc cykꞌoꞌn capiẍay, aju nnoꞌc tkꞌoꞌn pal oc nnoꞌcx tuj Lugar Mas Xjan. Ax icx xi nkꞌoꞌne cyoclen ke t-xeꞌchela tuꞌn cyankꞌin tiꞌj chojbil aju in cub cypatun aj Israel te nimbil weye. 29 ¿Tikuꞌntzun nneꞌl cyicꞌune ke chojbil ex ke oyaj o txi nmaꞌne tuꞌn ttzaj cykꞌoꞌn aj Israel weye tuj njaye? ¿Tikuꞌn mas ma cheꞌx tnimana ke tcꞌwaꞌla nwitze, ex ma che gordiyix tuꞌn tcyakilju tbanil cyoyaj aj Israel, akeju etzan wuꞌne? 30 Tuꞌntzun jlu, akine Cymane aju Cydios aj Israel, masque o nmaye ka aya cyucꞌix ke tcꞌwaꞌla ax che ajbele weye te jumajx, atzun jaꞌlo cxel nmaꞌne teya: Mlayx nbinchaye jlu, nok oꞌcx che jawil nnimsaꞌne keju in che niman weye, atzun keju in che icꞌun weye, ax icx cye che elel wicꞌune. Akine Dios in chin kꞌmante jlu. 31 Ya chꞌix tul lakꞌeꞌ tkꞌijlalil tuꞌn tel wiꞌne toclena, ax icx cyoclen ke tiyjila che ul itzꞌj te tibajxi, ex mi jun cyxol ke tiyjila ctijil. 32 Cꞌoquel tqueꞌyina oc ttzaj mya baꞌn cyibaj keju ateꞌ tuj tjaya, atzun ke aj Israel che bel cyꞌiwlaꞌn tuꞌn Dios ex mi jun cyxol ke tiyjila ctijil. 33 Pero cyxol ke tiyjila che cyjel ankꞌin junjun wuꞌne tuꞌn cyajben twitz n-altare, tuꞌntzun cybaj naj ke tbakꞌ twitza tuꞌn okꞌel, ex ctzajel nim tbisa cyiꞌj tuꞌnju mya baꞌn cymod, atzun ke mastl tiyjila che bel byoꞌn naꞌnxtok cytijin. 34 Tuj junx kꞌij che cymel cabe tcyꞌajala, Ofni ex Finees, ex atzun jlu cꞌajbel te jun techal teya. 35 Te tibajxi cjawil nscꞌoꞌne jun pal tzꞌaklxix, in japun wajbile ex nximbetze tuꞌn, ex che tel ke tiyjil wuꞌne, ex cucx ctel tcyakil kꞌij twitz ju rey aju cjawil nscꞌoꞌne. 36 Ex atzun keju otok che cyaj clet wuꞌne cyxol ke tiyjila, che ul ex che bel ẍmejeꞌ twitz pal kanilte jun sak pwak ex ka jun piẍ pan, ex oc cymaꞌ: Chin cubsale twitza tuꞌn ttzaj tkꞌoꞌna chꞌin wakꞌune ttxlaja tuj tja Dios, tuꞌntzun nwaꞌn chꞌine chilo.