1 Samuel 3

Tej ttxconjtz Samuel tuꞌn Kman

Aju cuꞌxun Samuel in ajbentok te Kman ttxlaj Elí. Tuj tkꞌijlalil lu mintiꞌxix in yolin Kman cyucꞌil ke tmajen tiꞌj jun tkanil; ex mintiꞌxix in yolin ic tzaꞌn tuj witzicꞌ. 2 At jun konicꞌan coẍltok Elí tuj tja, ex chꞌixtok toc yupj cyiꞌj tbakꞌ twitz ex mintiꞌtok in tilxix. 3 Atzunte Samuel in tantok tuj tja Dios jatum taꞌ ju cax cꞌubl tley Dios. Ex aju candil tuj tja Dios cucxtok tcꞌant. 4 Txquettzun Samuel tuꞌn Kman ex tma:

—Samuel.

Atzunte Samuel xi ttzakꞌweꞌn:

—Lu kine lu.

5 Xitzun kelan Samuel jatum taꞌtok Elí, ex tma:

—Lu kine lu; ¿ti wile teya?

Atzunte Elí tma:

—Mintiꞌ we in chin txocon tiꞌja, taja ex coẍecuya.

Ajtzun meltzꞌaj ex cub coẍeꞌ. 6 Ex txocl juntl maj Samuel tuꞌn Kman:

—Samuel, chi Kman.

Jawtzun weꞌ Samuel, ul tucꞌil Elí, ex xi tmaꞌn:

—Lu kine lu; ¿ti wile teya?

Atzunte Elí tma:

—Ncyꞌajal, mintiꞌ we in chin txocon tiꞌja, taja ex tanxa.

7 Naꞌnxtok tel tnicꞌ Samuel tiꞌj Kman, ex bajxtok yolin Kman tucꞌil. 8 Txquettzun Samuel toxinmajiꞌn tuꞌn Kman, jawtzun weꞌ ex ul tucꞌil Elí, ex tma:

—Lu kine lu; ¿ti wile teya? Eltzun tnicꞌ Elí tiꞌj ka a Kman in txocon tiꞌj cuꞌxun lu. 9 Cyjaꞌtzun xi tmaꞌntl:

—Txiꞌya coẍebil ex ka ma txocliya juntl maj tuꞌn Kman, kꞌmanxa cyjaꞌ: Yolina Nman, lu kine in chin bine, akine tmajena, chicuya.

Xiꞌtzun Samuel ex cub coẍeꞌ jatum in tantok. 10 Ultzun Kman ex cub weꞌ, ex axju yol tma:

—Samuel, Samuel.

Atzunte Samuel xi tmaꞌn:

—Yolina Nman porque lu kine in chin bin, akine tmajena.

11 Xitzun tmaꞌn Kman te Samuel:

—Cbinchetel jun tiꞌxti wuꞌne xobajilxix cyxol aj Israel, cycyakil keju oc cybiꞌ, biꞌx cꞌelel twinkil cyẍcyin tuꞌn. 12 Atzun kꞌij cjapunel wuꞌne tcyakilju o txi nmaꞌne cyiꞌj tiyjil Elí, ex mlay tzicꞌx tiꞌj. 13 O txi nmaꞌne, cbel cycastiw ke tiyjil wuꞌne te jumajx, tuꞌn tlaj cyil aju baꞌntl tuꞌn; porque ke tcyꞌajal ma che yolin mya baꞌn wiꞌje ex mintiꞌ ma cheꞌx tcawin. 14 Cyjaꞌtzun ma txi nmaꞌne jun nyole axix toc cyiꞌj ke tiyjil Elí, aju cyil mlay najset te jumajx, mi tuꞌn chojbil ex mi tuꞌn oyaj, chi Kman te Samuel.

15 Tbajlenxi jlu cub tan Samuel, ex jaw weꞌ te prim tejxi tjawil kꞌij, ex jakettzun tlamel tja Dios tuꞌn. In xobtok Samuel tuꞌn t-xi tmaꞌn te Elí aju otok til mer ic tzaꞌn tuj witzicꞌ, 16 pero tzaj txcoꞌn Samuel tuꞌn Elí ex tma:

—Ncyꞌajal Samuel.

—Lu kine lu, chi Samuel:

17 —¿Alcye yol saj kꞌmaꞌn teya tuꞌn Kman? Binchama xtalbil tuꞌn miꞌn tcub tewana jun yol nwitze. Awt Dios cub kꞌonte tcastiwoya cyuw ka ma cub tewana jun yol tiꞌj tcyakilju ma tzaj kꞌmaꞌn teya, chi Elí.

18 Xitzun ttxꞌolbaꞌn Samuel tcyakil ex mintiꞌ jun yol cub tewan, ex tmatzun Elí cyjaꞌ:

—Ate Kman xkꞌmante jlu. Bant-xwit tuꞌn alcye baꞌn tuj twitz.

19 O chꞌiy Samuel ex a Kman o tzoꞌnin te; tcyakilju yol tma Dios te o japun baj, ex mi jun cyaj naj. 20 Ex cycyakil xjal aj Israel tzajnix keꞌ tuj Dan ex ponin baj max tuj Beerseba, el cynicꞌ tiꞌj ka ate Samuel jun t-sanjel Dios axix toc. 21 Ex cub tyecꞌuntl tib Kman twitz Samuel tuj lugar Silo, como atzun lugar jatum in tzaj tmaꞌn Kman ju tyol te Samuel. Tbajlenxi yolin Kman, in xi tmaꞌn Samuel keju yol lu cye cycyakil aj Israel.