Xi cyiꞌn aj Filistey ju cax cꞌubl tley Dios
4
Tujtzun tkꞌijlalil lu baj cychmon cyib aj Filistey tuꞌn cykꞌojin cyiꞌj aj Israel; tuꞌntzun jlu e jeꞌtz aj Israel kꞌojlel cyiꞌj aj Filistey, ex atzun e cub ten tuj lugar Eben-ezer. Atzun cye aj Filistey, atzun e cub ten tuj lugar Afec, 2 ex baj cytxolban cyib tuꞌn cykꞌojin cyiꞌj aj Israel. Tej cykꞌojin, ake aj Israel cub cyiꞌj cyuꞌn aj Filistey, balo cyaje mil aj Israel e cub tuj kꞌoj. 3 Tejtzun cyul meltzꞌaj ke soldad aj Israel tuj cycampament, cymatzun ke cytijil xjal aj Israel: ¿Tikuꞌn ma takꞌ Kman ambil tuꞌn tcub kiꞌj cyuꞌn aj Filistey? Koꞌ tuj Silo kꞌilte cax cꞌubl tley Dios tuꞌntzun tbet Kman kxol, ex tuꞌn kclet tuꞌn tuj cykꞌab ke aj kꞌoj kiꞌj.4 Xitzun cysamaꞌn aj Israel jun cꞌloj sanjel tuj Silo, ex tzaj cyiꞌn ju cax cꞌubl tley Dios aju Tajaw Tcyakil, aju tcub tkꞌukbil cyibaj ke querubín. Ajun Ofni tucꞌix Finees akeju tcyꞌajal Elí kꞌilte cax cꞌubl tley Dios. 5 Tejtzun tpon cax cꞌubl tley Dios tuj cycampament aj Israel, e jaw schꞌin tucꞌil nim tzalajbil, ex biꞌx tzaj yucch txꞌotxꞌ cyuꞌn.
6 Tejtzun cybinte aj Filistey aju tkꞌajkꞌajel cywiꞌ aj Israel, cyma: ¿Ti t-xilen ju tkꞌajkꞌajel wibaj in jaw cyxol aj Hebrey? Che chi. Tejtzun cybinte ka aju cax cꞌubl tley Dios otok pon tuj cycampament aj Israel, 7 tzaj cyxobil ex cyma: Ma tzul Dios cyxol aj Israel. Ay becꞌbil kwitz, naꞌnx tbant jun maj icju. 8 Ay becꞌbil kwitz. ¿Alcye baꞌn tclonte ke teju Dios lu, aju at nim tipumal? Tuꞌn e baj naj ke aj Ejipt tuj ju lugar tzkij txꞌotxꞌ tej ttzaj tkꞌoꞌn tcyakil txcaj cꞌixbisabl cyiꞌj. 9 Cybincham cytene ex tenx cyipumale, akeye soldad aj Filistey, ko kꞌojin ex ko ocx xinak, tuꞌntzun miꞌn koc te cymajen aj Hebrey, ic tzaꞌn cye ma che oc te kmajen, che chi.
10 Tejtzun cyoc tzokpaj aj Filistey cyiꞌj aj Israel, cub cyiꞌj aj Israel cyuꞌn, ex keju mintiꞌ e cyim e aj ok cyja. Nimxix xjal e cub cyuꞌn aj Filistey, porque cyxol ke soldad cye aj Israel akeju in che bet tuꞌn cykan, e cub 30 mil xinak. 11 Ax icx xi cyiꞌn ju cax cꞌubl tley Dios, ex e cub byoꞌn Ofni tucꞌix Finees, akeju cabe tcyꞌajal Elí.
12 Attok jun soldad tiyjil Benjamín o colpaj tuj kꞌoj, ex xi kelan tuꞌn tpon tuj Silo ax kꞌij lu. Otok baj t-sbitꞌun t-xbalun ex otok jax tkꞌoꞌn txꞌotxꞌ tuj twiꞌ te jun techal tiꞌj tbis. 13 Tejtzun tpon ju xinak lu, lu te Elí kꞌukltok twiꞌ jun siy in xkꞌukin ttzi be, tuꞌnju in bajtok tcꞌuꞌj tiꞌj cax cꞌubl tley Dios. Tejtzun tocx ju xinak tuj tnam ex tej t-xi tmaꞌn tkanil tiꞌj kꞌoj, cycyakil keju ateꞌtok tuj tnam e jaw schꞌin tuꞌn cyxobil. 14 Tejtzun tbinte Elí tkꞌajkꞌajel cywiꞌ xjal, xi tkanin:
—¿Tikuꞌn ma che jaw tilj xjal?
Atzunte xinak oc tilil tuꞌn tuꞌn tpon tkanil tucꞌil Elí.
15 Otok japun Elí twiꞌ 98 abkꞌi ex jumajx otok che moẍix ke tbakꞌ twitz. 16 Xitzun tmaꞌn xinak te Elí:
—Tzajnix kine jatum nnoꞌc kꞌoj ex jaꞌlo ma chin colpaje tuj kꞌoj.
Atzunte Elí tma:
—¿Ti ma baj, ncyꞌajal?
17 —Ke aj Israel ma che el ok cywitz aj Filistey, ax icx nim xjal ma che cub, ex ma che cub ke cabe tcyꞌajala Ofni tucꞌix Finees, ex aju cax cꞌubl tley Dios ma txi cyiꞌn aj Filistey, chi ju sanjel.
18 Tejtzun t-xi tmaꞌn ju sanjel tkanil tiꞌj cax cꞌubl tley Dios, aj pacꞌtxaj Elí twi t-siy ttxlaj ttzi ja, ex tuꞌnju otok tijin ex altok, biꞌx tokj tiꞌj tkul ex biꞌx cyim. 40 abkꞌi otok ten te nejenel cye aj Israel.
19 Aju tlib Elí, t-xuꞌjil Finees yab xjaltok taꞌ, chꞌixtok tpon tkꞌijlalil tuꞌn tul itzꞌj tal; tejtzun tbinte tkanil ka otok txi kꞌiꞌn ju cax cꞌubl tley Dios ex otok cyim ju tlib tucꞌix tchmil, tzajtzun taꞌw tyabil, jaw t-xkuꞌtzꞌin tib ex ul itzꞌj tal. 20 Tejtzun cyqueꞌyinte ke xuꞌj in che ajben te ya chꞌixtok tcyim, cymatzun: Miꞌn xoba porque ma tzul itzꞌj jun tala xinak, che chi. Atzunte mintiꞌ xi ttzakꞌweꞌn ex mintiꞌ xi tkꞌoꞌn twiꞌ tiꞌj. 21-22 Ex Icabod tbi tal neꞌ oc tkꞌoꞌn ex tma: Ma tzꞌel kꞌiꞌn tajwalil Dios cyxol aj Israel tuꞌnju ma txi kꞌiꞌn cax cꞌubl tley Dios, chi xuꞌj. Tma ju yol lu tuꞌnju otok txi kꞌiꞌn cax, ex tuꞌnju otok cyim tlib tucꞌix tchmil.