Pon cyiꞌn aj Filistey ju cax cꞌubl tley Dios tuj cytanmi
5
Tejtzun t-xi cyiꞌn ke aj Filistey ju cax cꞌubl tley Dios tuj Eben-ezer, pon cyiꞌn tuj tnam Asdod. 2 Tzajtzun cyiꞌn ex ocx cykꞌoꞌn tuj tja cydios Dagón tbi, ex junx cub cykꞌoꞌn ttxlaj Dagón. 3 Te prim tuj juntl kꞌij tej cypon aj Asdod o cyil lu te Dagón mutzl tcub twitz txꞌotxꞌ twitz cax cꞌubl tley Dios. Jawtzun cyiꞌn ex cub cykꞌoꞌn tuj tlugar. 4 Ax icx tuj juntl kꞌij te prim tej cypon aj Asdod, lu Dagón mutzl tcubtl twitz txꞌotxꞌ twitz cax cꞌubl tley Dios. Aju twiꞌ ex ke tkꞌab otok che el tokj ex cycub tibaj tmarquil ttzi ja twitz txꞌotxꞌ. Nok oꞌcx ju t-ximlal mintiꞌ pax. 5 Cyjaꞌtzun, oc cyocx ke pal ex ka mastl xjal tuj tja Dagón tuj Asdod, mintiꞌ in cub cykꞌoꞌn cykan tibaj ttzi tmarquil ja, ex cucx tbant cyuꞌn jaꞌlo.6 Atzunte Kman cub tkꞌoꞌn jun castiw cyuwxix cyibaj aj Asdod, ex nimxix xobajil tzaj cyiꞌj, ex jaw jlet cyakcꞌu cyiꞌj cycyakil xjal tuj tnam Asdod ex cyiꞌj xjal cyuj cycyakil lugar te tnam lu. 7 Tejtzun cylonte aj Asdod aju in bajtok, cymatzun: Aju cax cꞌubl tley Cydios aj Israel mya baꞌn cucx tuꞌn tten kucꞌil, porque ma tzaj jun kcastiw cyuwxix tuꞌn, ax icx tiꞌj Dagón aju kdios, che chi.
8 Tuꞌntzun jlu xi cymaꞌn cye cycyakil ke nejenel cyxol aj Filistey tuꞌn toc cychmon cyib cyucꞌil, ex xi cykanin cye:
—¿Ti cꞌoquel tiꞌj ju cax cꞌubl tley Cydios aj Israel?
Atzun cye nejenel cye aj Filistey xi cymaꞌn:
—Cyiꞌnxe tuj tnam Gat.
Xitzun cyiꞌn aj Filistey cax cꞌubl tley Dios ma chixin. 9 Tejtzun tpon cykꞌoꞌn tuj tnam Gat, e cꞌixbisettzun ke aj Gat tuꞌn Kman tuꞌn cyakcꞌu e jaw jlet cyiꞌj cycyakil xjal, tzaꞌnx ke tij xjal ax icx cyiꞌj ke cꞌwaꞌl, tzajtzun nim xobajil tuj tnam cyxol ke xjal. 10 Cyjaꞌtzun icꞌ cyiꞌntl aj Filistey cax cꞌubl tley Dios tuꞌn tpon tuj tnam Ecrón, pero tej tcanun cax ma chixin, ke xjal najl tuj tnam Ecrón jaw tkꞌajkꞌajel cywiꞌ ex cyma: Ma tzul kꞌiꞌn cax cꞌubl tley Cydios aj Israel kucꞌil tuꞌn kcyim kcyakil, che chi xjal.
11 Tuj tcyakil tnam e baj secꞌpaj cycyakil xjal tuꞌn tlaj castiw cyuwxix otok tzaj t-samaꞌn Dios cyiꞌj. Ex tuꞌn tlaj nimcu xjal in che cyim, e jeꞌxtzun txocbaj cycyakil ke nejenel cyxol aj Filistey, ex xi cymaꞌn cye: Cyiꞌnxe cax cꞌubl tley Cydios aj Israel ex cykꞌon aje tuj tlugar, tuꞌntzun miꞌn kcyime kcyakile tuꞌn, che chi.
12 Ex aju tkꞌajkꞌajel cywiꞌ ke xjal japun max twitz cyaꞌj, porque akeju mintiꞌ in che cyim, jumajx nojni cyiꞌj tuꞌn cyakcꞌu.