—¿Ti cꞌoquel tiꞌj cax cꞌubl tley Dios kuꞌne? Cykꞌmantze keye alcye tumel tuꞌn taj kkꞌoꞌne aju cax cꞌubl tley Dios tuj tlugar, che chi.

3 Atzun cye xi cytzakꞌweꞌn:

—Ka ma tzꞌaj cykꞌoꞌne cax cꞌubl tley Cydios aj Israel, miꞌn tzꞌaj cykꞌoꞌne junx te, nok oꞌcx cykꞌonxe chꞌin oyaj te Dios te chojbil cyile ex octzun che banixele, ex atzun cꞌelel cynicꞌe tiꞌj tikuꞌn naꞌnx tel kꞌiꞌn cycastiwoye, che chi pal.

4 —¿Titzun baꞌn tuꞌn t-xi kkꞌoꞌne tuꞌn tchjet kile? Che chi aj Filistey xi cykanin.

Atzun cye pal xi cytzakꞌweꞌn:

—Jweꞌ tilbilal cyakcꞌu kꞌan pwak cytxꞌotxꞌil, jun te junjun nejenel cye aj Filistey, tucꞌix jweꞌ tilbilal ichꞌ, ax kꞌan pwak cytxꞌotxꞌil, tuꞌnju aylex yabil in che cꞌixbisanjtze tuꞌn, ax icx ke nejenel cyeye. 5 Cyjaꞌtzun cybinchame ke tilbilal cyakcꞌu ex ke tilbilal ichꞌ, porque cyuꞌntzun ke jlu ma naj cyawale. Ex cynimsan jawe tbi Cydios aj Israel; balo mlay tzaj tkꞌoꞌntl castiw cyibaje ex cyibaj ke cydiose, ex tibaj cytxꞌotxꞌe. 6 ¿Tikuꞌn ma cub cycyuwsaꞌn cyanmiye ic tzaꞌn cybincha aj Ejipt ex Faraón, porque tej cycꞌixbisanjtz cyuwxix wen tuꞌn Cydios aj Israel, maxitzun e etz tzokpiꞌn aj Israel cyuꞌn. 7 Atzun jaꞌlo cybinchan baje jun carret acꞌaj; ex cyiꞌntze cabe vac cucx tchꞌuꞌn cyal, akeju vac naꞌnx tjax ten yuw tiꞌj cykul, ex che cykꞌon oque te jawol carret, pero miꞌn cheꞌx cytzokpiꞌne ke cyal tuꞌn cyxi lpeꞌ cyiꞌj, nok oꞌcx che cylamoꞌn cyaje tuj peꞌn. 8 Ex cyiꞌntze cax cꞌubl tley Cydios aj Israel, cykꞌon jaxe tuj carret, ex atzun keju kꞌan pwak aju cxel cykꞌoꞌne te chojbil cyile, cykꞌon cuꞌxe tuj jun cajón, ex cykꞌon cube ttxlaj cax, ex e cyxi bet ke vac cyjunal cye tucꞌix carret jawoꞌn cyuꞌn. 9 Pero lpex cywitze tiꞌj; ka a ma txiꞌ carret tumlal tnam Bet-semes jatum tzajni cax, atzun cꞌelel knicꞌ tiꞌj ka tuꞌn Dios ma tzaj tkꞌoꞌn mya baꞌn lu kibaj; ex katzun miꞌn, atzun cꞌelel knicꞌ tiꞌj ka mya tuꞌn Dios ma cub tkꞌoꞌn kcastiw, nok oꞌcx minaben ma tzaj jlu kibaj, che chi pal.

10 Banttzun cyuꞌn keju xinak icju. Tzaj cyiꞌn cabe vac cucxtok cychꞌuꞌn cyal, e oc cycꞌaloꞌn te jawolte carret, ex e cyaj cylamoꞌn ke cyal tuj peꞌn; 11 jaxtzun cykꞌoꞌn cax cꞌubl tley Dios tuj carret, tucꞌix ju cajón jatum cycuꞌx ke tilbilal ichꞌ kꞌan pwak cytxꞌotxꞌil ex ke tilbilal cyakcꞌu. 12 Te tibajxitzun jlu e icꞌtzun bet ke vac, ex atzun e jeꞌx tuj be in xiꞌ tuꞌn tpon tuj tnam Bet-semes, in che muyin ex jikun e jeꞌx, mintiꞌ xi cyiꞌn juntl be. E oc lpeꞌ ke nejenel cye aj Filistey cyiꞌj tejxi cypon tuj tmojonil Bet-semes. 13 Atzun cye aj Bet-semes in jawtok triw cyuꞌn tuj chkꞌajlaj, ex tej t-xi cyqueꞌyin, o cyil aju cax cꞌubl tley Dios, ex e jaw tzalaj nimxix. 14 Tejtzun tpon carret tuj tcojbil Josué aju aj Bet-semes, axtzun o weꞌ, ex tuj lugar lu attok jun nintz abj. Atzun cye aj Bet-semes baj cytxꞌemin carret te siꞌ, ex cub cybyoꞌn ke vac, ex e cub cypatun te jun chojbil te Kman. 15 Atzun cye aj Leví cuꞌtz cyiꞌn cax cꞌubl tley Dios, ex aju cajón jatum cycuꞌx ke tiꞌxti kꞌan pwak cytxꞌotxꞌil, ex e jax cykꞌoꞌn twiꞌ ju nintz abj. Atzun cye aj Bet-semes cub cypatun ke alumaj te jun chojbil, ex xi cykꞌoꞌn mastl oyaj te Kman tuj kꞌij lu. 16 Tejtzun cybaj queꞌyin ke jweꞌ nejenel cye aj Filistey tiꞌj jlu, e ajtzun meltzꞌaj tuꞌn cypon tuj tnam Ecrón ax kꞌij lu.

17 Akeju jweꞌ tilbilal cyakcꞌu kꞌan pwak cytxꞌotxꞌil xi cykꞌoꞌn aj Filistey te Cydios aj Israel te chojbil cyil: Jun tiꞌj tnam Asdod, juntl tiꞌj tnam Gaza, juntl tiꞌj tnam Ascalón, juntl tiꞌj tnam Gat, ex juntl tiꞌj tnam Ecrón. 18 Aju cyajlal ke tilbilal ichꞌ kꞌan pwak cytxꞌotxꞌil junx taꞌ ic tzaꞌn cyajlal cytanmi aj Filistey jatum in che cawin ke jweꞌ nejenel, tzaꞌnx ke tnam toc muro cyiꞌj ax icx ke aldey mintiꞌ muro toc cyiꞌj. Aju nintz abj jatum jax kꞌoꞌn cax cꞌubl tley Dios ax taꞌ jaꞌlo tuj tcojbil Josué, aju aj Bet-semes.

19 Pero e cyim junjun aj Bet-semes tuꞌn Kman tuꞌnju tcuꞌxlen cyqueꞌyin tuj cax cꞌubl tley Dios. 70 xinak e cyim, atzun ke mastl xjal e oc ten okꞌel tuꞌn tlaj otok che cyim nim xjal cyxol tuꞌn Kman. 20 Ex cymatzun ke aj Bet-semes: ¿Alcye jun jacu bant tweꞌ twitz Kman aju Dios xjan? Ex ¿jatum baꞌn tpon tuꞌn miꞌn ttentl kxol? 21 Xitzun cysamaꞌn ke sanjel cyucꞌil ke xjal tuj tnam Quiriat-jearim tuꞌn t-xi cymaꞌn cyjaꞌ: Ma tzꞌajtz kꞌoꞌn cax cꞌubl tley Dios cyuꞌn aj Filistey; cyjaꞌtzun cytzaje tuꞌn t-xi cyiꞌne.