RUT
Pon Elimelec najal tuj Moab tuꞌn tlaj weꞌyaj
1
Tuj tkꞌijlalil tej cycawin ke jwes cyibaj aj Israel, at jun maj tzaj nim weꞌyaj cyxol cycyakil aj Israel. Attok jun xinak aj Belén tuj cytxꞌotxꞌ cyiyjil Judá xiꞌ jun tyemp najal tuj cytxꞌotxꞌ aj Moab tuꞌn tlaj weꞌyaj, tucꞌix t-xuꞌjil, ex cyucꞌix cabe tcyꞌajal. 2 Aju xinak lu Elimelec tbi, atzun t-xuꞌjil Noemí tbi, ex atzun ke tcyꞌajal, Mahlón tbi jun, atzun juntl Quelión tbi. Aj Efratey ke jlu, ex ax juntl tbi tnam Belén. E pontzun tuj cytxꞌotxꞌ aj Moab ex ax e cyaj ten najal.3 Cyimtzun Elimelec aju tchmil Noemí, atzunte Noemí cyaj ten meba xuꞌj cyucꞌil cabe tal. 4 E mojeꞌtzun ke cabe tal Noemí cyucꞌil cabe txin aj Moab; Orfa tbi jun, atzun juntl Rut tbi. Pero tej tbant laj abkꞌi cyponlen tuj cytxꞌotxꞌ aj Moab, 5 e cyim Mahlón ex Quelión, atzunte Noemí cyaj ten meba xuꞌj, mintiꞌtl tchmil ex mintiꞌtl tal.
E jeꞌx Noemí tucꞌix Rut tuj Belén
6 At jun kꞌij o tbi Noemí ka otok tzaj kꞌakꞌan tcꞌuꞌj Kman cyiꞌj aj Israel, ex ya mintiꞌtok weꞌyaj tuj txꞌotxꞌ Judá. 7 Etztzun Noemí cyucꞌix cabe tlib tuj lugar jatum najlketok, ex cub be cyuꞌn tuꞌn cypon juntl maj tuj txꞌotxꞌ Judá. 8 Matok in che bet, xi tmaꞌn Noemí cye cabe tlib:
—Cu cyaje cyjaye, ex ax cycyaj tene tucꞌil cytxuꞌye; awt Kman binchante xtalbil cyeye, ic tzaꞌn ma cybinchaye weye ex cye ktzan wale, 9 ex awt Kman onin cyeye tuꞌn tcnet juntl cychmile, ex tuꞌn cytzalaje tuj cyjaye cyucꞌil cychmile, chi Noemí cye.
Bajtzun tkꞌolben tib Noemí cyucꞌil ke tlib ex el ttzꞌuban cywitz, atzun cye elibaj e oc ten okꞌel 10 ex xi cymaꞌn te:
—Miꞌn. Ko xeꞌl keye tucꞌila max tuj ttanmiya.
11 Atzunte Noemí xi tmaꞌn juntl maj cye tlib:
—Cu cyaje, wal. ¿Tikuꞌn cyajbile tuꞌn cyxiꞌye wucꞌile? Ya mintiꞌtl we wal ctzajel tuꞌn cymojeꞌye cyucꞌil. 12 Cu cyaje cyjaye, porque weye mlay chin najantle tuꞌnju ma chin tijine. Ex masque atx tumlal tuꞌn nnajane tuj akꞌbil jaꞌlo, ex tuꞌn cytzaj mastl wale, 13 pero baka jacu cyyoye ocxi cychꞌiy tuꞌn cynajane cyucꞌil. ¿Cucxpetzun che bel tene tuꞌn miꞌn cynajane ex tuꞌn cyayone ocxi cychꞌiy ke wale? Miꞌn, akeye wal, mlaylo bant icju. Ate Kman ma tzaj samante nim yajbil weye, ex mas nim in chin bisune ic tzaꞌn cyeye, chi Noemí.
14 Atzun cye elibaj e oc ten okꞌel juntl maj ex bajtzun tkꞌolben tib Orfa tucꞌil tlib ex el ttzꞌuban twitz; atzunte Rut ax cyaj ten tucꞌil tlib. 15 Atzunte Noemí xi tmaꞌn te Rut:
—Queꞌyinxa, lu Orfa ma tzꞌaj tuj ttanmi ex tuꞌn tcꞌulun twitz tdios, ax icx teya taja tucꞌil.
16 Atzunte Rut xi ttzakꞌweꞌn:
—Miꞌn tzaj tmaꞌna weye tuꞌn tcyaj ncolina ex tuꞌn tel npaꞌn wibe tiꞌja. Chin xeꞌle tucꞌila nok jaxja ma txiꞌya ex junx chin najale tucꞌila. Aju ttanmiya cꞌoquel te ntanmiye ex aju Tdiosa cꞌoquel te Ndiose. 17 Jatum cymela, axtzun chin cymele, jatum cbelex makuꞌna, axtzun chin belex makuꞌne. Awt Kman cub kꞌonte ncastiwoye cyuwxix ka ma tzꞌel npaꞌn wibe tiꞌja, ka mya tuꞌn camic, chi Rut.
18 Tejtzun tel tnicꞌ Noemí tiꞌj ka axix toc otok cub t-ximan Rut tuꞌn toc lpeꞌ tiꞌj, ya mintiꞌ kꞌajt mastl.
19 Cyjaꞌtzun e jeꞌx cycabil tuj cybe tejxi cycanun tuj Belén.
Tejtzun cyocx tuj Belén, biꞌx e labin xjal cyiꞌj ex in cymaꞌntok ke xuꞌj cyjaꞌ:
—¿Maj atzun Noemí jlu?
20 Atzunte Noemí xi ttzakꞌweꞌn:
—Ya miꞌn tzꞌoc cykꞌoꞌntle nbiye Noemí; jaꞌlo cykꞌonque nbiye Mara, porque ate Dios, aju at tipumal tuꞌn tbant tcyakil tuꞌn, ma tzaj tkꞌoꞌn jun yajbil maꞌxix wibaje. 21 Tej wexe tzalu, nimcu xi wiꞌne, pero tej ma chin ul meltzꞌaje, mintiꞌ chꞌin kꞌiꞌn wuꞌne, tuꞌnju iclo tajbil Kman. ¿Tikuꞌntzun cꞌoquel cymaꞌne nbiye Noemí?, porque ma tzaj yajbil ex nim mya baꞌn wiꞌje tuꞌn Kman aju at tipumal tuꞌn tbant tcyakil tuꞌn, chi Noemí.
22 Cyjaꞌtzun tten ajtz Noemí tuj Moab tucꞌix tlib aju Rut tbi, aju aj Moab. Tej cypon tuj Belén matok in xeꞌt tuꞌn tjaw chmet twitz sebad.