JUECES
Ke nmak nejenel cyxol aj Israel
Tzyet Adoni-bezec cyuꞌn ke tiyjil Judá ex cyuꞌn ke tiyjil Simeón
1
Tcyimlenxitzun Josué, xi cykanin aj Israel te Kman alcye jun cꞌloj cyxol cycyakil cꞌloj cyiyjil tuꞌn cyoc tzokpaj tnejel cyiꞌj aj Canaán. 2 Atzunte Kman tzaj ttzakꞌweꞌn cyjaꞌ: Ake aj Judá che oquel tzokpaj tnejel, porque ma txi nkꞌoꞌne txꞌotxꞌ lu te cye. 3 Atzun cye tiyjil Judá xi cymaꞌn cye cyerman akeju tiyjil Simeón cyjaꞌ: Koꞌ kucꞌile tuꞌn koc tzokpaj kꞌojlel tiꞌj cytxꞌotxꞌ aj Canaán, aju ma tzaj kꞌoꞌn keye. Te tibajxi, ax icx keye ko xeꞌle cyucꞌile tuꞌn koc tzokpaj kꞌojlel tiꞌj txꞌotxꞌ ma tzaj kꞌoꞌn cyeye, che chi aj Judá. E jeꞌxtzun ke tiyjil Simeón cyucꞌil. 4 Cyjaꞌtzun tten e oc tzokpaj ke tiyjil Judá cyiꞌj aj Canaán ex cyiꞌj aj Ferezey, ex e tzaj tkꞌoꞌn Kman ke xjal lu tuj cykꞌab. Tuj tnam Bezec e cyim laj mil xinak cyuꞌn. 5 Cnet Adoni-bezec cyuꞌn tuj tnam Bezec. E oc tzokpaj kꞌojlel tiꞌj ex cub cyiꞌj aj Canaán ex aj Ferezey cyuꞌn. 6 Masque el ok Adoni-bezec, pero e jeꞌx lpeꞌ tiꞌj, o tzyet cyuꞌn, ex el cytxꞌemin ke tman tkꞌab cyucꞌix ke tman tkan. 7 Tmatzun Adoni-bezec: Ojtxi akine el txꞌeminte ke tman cykꞌab ex ke tman cykan 70 rey, ex xi nmaꞌne cye tuꞌn tjaw cyscꞌoꞌn ke tbuchil pan in che cub tzꞌak tjakꞌ nmese, atzun jaꞌlo ma tbincha Dios wiꞌje ic tzaꞌnx o nbinchaye cyiꞌj, chi Adoni-bezec. Xitzun cyiꞌn Adoni-bezec tuj Jerusalén, ex atzun o cyim.E tzyet tnam Hebrón ex Jerusalén cyuꞌn aj Judá
8 E oc tzokpaj ke tiyjil Judá tiꞌj tnam Jerusalén ex tzyet cyuꞌn. Tbajlenxi cybyoꞌn tuꞌn spad cycyakil xjal ateꞌ tuj tnam, octzun cykꞌoꞌn tkꞌakꞌal tnam. 9 Te tibajxi e oc tzokpaj cyiꞌj aj Canaán, akeju najlke tuj tiwitz txꞌotxꞌ ex tuj txꞌotxꞌ Néguev ex tuj mlaj txꞌotxꞌ. 10 Ax icx e oc tzokpaj cyiꞌj aj Canaán, akeju ateꞌ tuj tnam Hebrón aju toctok tbi nej Quiriat-arba, ex cub cybyoꞌn Sesai, tucꞌix Ahimán ex tucꞌix Talmai.
Tzyet tnam Debir tuꞌn Otoniel ex tzaj kꞌoꞌn txin Acsa te tuꞌn toc te t-xuꞌjil
11 Ex e oc tzokpajtl tiꞌj tnam Debir aju toctok tbi nej Quiriat-sefer. 12 Atzunte Caleb xi ttziyan jun yol cyjaꞌ: Alcye jun ma tzꞌoc tzokpaj tiꞌj tnam Quiriat-sefer ex ka ma tzyet tuꞌn, jacu txi nkꞌoꞌne nmeꞌjele Acsa te tuꞌn toc te t-xuꞌjil. 13 O tzyet tnam tuꞌn Otoniel aju tcyꞌajal Cenaz aju titzꞌin Caleb; xitzun tkꞌoꞌn Caleb tmeꞌjel Acsa tbi tuꞌn toc te t-xuꞌjil Otoniel. 14 Pero tej otok bant tten Acsa tuꞌn t-xiꞌ tucꞌil Otoniel, xi tmaꞌn Otoniel te tuꞌn t-xi tkanin te tman jun piẍ txꞌotxꞌ te cojbil. Cuꞌtztzun Acsa tibaj bur ex xi tkanin Caleb te:
—¿Ti taja?
15 Xi ttzakꞌweꞌn Acsa:
—Wajbile tuꞌn t-xi nkanine jun xtalbil teya. Yaque ma tzaj tkꞌoꞌna weye aju tzkij txꞌotxꞌ tuj lugar Néguev, ax icx kꞌontza ke twi aꞌ weye.
Xitzun tkꞌoꞌn Caleb te txin ke twi aꞌ te jawni ex ke twi aꞌ te cubni.
Ke tnam e tzyet cyuꞌn ke tiyjil Judá ex ke tiyjil Benjamín
16 Atzun ke tiyjil Hobab aju aj Quenit, aju tjiꞌ Moisés, e jeꞌtz tuj tnam Tkan Xaꞌj tbi tuꞌn cyxiꞌ cyucꞌil ke tiyjil Judá, ex e jeꞌx tuj tzkij txꞌotxꞌ cye aj Judá tuj txꞌotxꞌ Néguev nikayin ttxlaj tnam Arad; atzun e cyaj ten najal junx cyucꞌil ke xjal najlke tuj txꞌotxꞌ lu. 17 Akeju tiyjil Judá e jeꞌx cyucꞌil ke cyerman akeju tiyjil Simeón, ex e oc tzokpaj cyiꞌj aj Canaán akeju najlke tuj tnam Sefat, ex biꞌx cub cyxitun tnam te jumajx. Cyjaꞌtzun oc cykꞌoꞌn tbi tnam Horma. 18 Tzyet tnam Gaza cyuꞌn tucꞌix tnam Ascalón ex tnam Ecrón ex ke txꞌotxꞌ ateꞌ cyiꞌjele. 19 O ten Kman cyucꞌil ke tiyjil Judá ex o tzyet tiwitz txꞌotxꞌ cyuꞌn, pero mintiꞌ e xcyeꞌ tuꞌn tex cylajoꞌn ke xjal najlke tuj mlaj txꞌotxꞌ, porque ke xjal lu puro cꞌuxbil cycarwaj in che ajben tuj kꞌoj. 20 Te Caleb xi kꞌoꞌn tnam Hebrón ic tzaꞌnx otok tma Moisés, ex e jeꞌx tlajoꞌn Caleb keju ox tcyꞌajal Anac ateꞌtok tuj. 21 Atzun cye tiyjil Benjamín mintiꞌ e xcyeꞌ tuꞌn tex cylajoꞌn ke xjal aj Jebusey akeju najl tuj Jerusalén. Cyjaꞌtzun ke xjal aj Jebusey ax najlke jaꞌlo junx cyucꞌil ke tiyjil Benjamín tuj Jerusalén.
Tzyet tnam Betel cyuꞌn ke tiyjil José
22-23 Ke tiyjil José cub cyximan tuꞌn cyoc tzokpaj tiꞌj tnam Betel, aju tnam Luz tbi nej, xi cysamaꞌn junjun xinak queꞌyilte tnam ex ate Kman in onintok cyiꞌj. 24 Akeju xinak otok che pon queꞌyilte tnam o cyil tej tetz jun xinak tuj tnam, ex xi cymaꞌn te: Ka ma tzaj tyecꞌuna keye jatum baꞌn tuꞌn kocxe tuj tnam, miꞌntzun cub kbyoꞌne. 25 Tzajtzun tyecꞌun xinak jatum baꞌn tuꞌn cyocx tuj tnam, ex cubtzun cybyoꞌn tuꞌn spad cycyakil ke xjal najlke tuj, atzunte xinak aju otok tzaj yecꞌunte jatum baꞌn tuꞌn cyocx tuj tnam, o clet cyuꞌn, cyucꞌix cycyakil keju ateꞌ tuj tja. 26 Atzunju xinak lu xiꞌ tuj cytxꞌotxꞌ aj Hetey, jaw tbinchaꞌn jun acꞌaj tnam ex oc tkꞌoꞌn tbi Luz, ex axtzun tbi tocsaꞌn jaꞌlo.
Ke tnam mintiꞌ cub cyiꞌj cyuꞌn ke tiyjil Manasés ex ke tiyjil Efraín
27 Ke tiyjil Manasés mintiꞌ e xcyeꞌ tuꞌn tex cylajoꞌn ke xjal najlke cyuj ke tnam lu: Bet-seán, Taanac, Dor, Ibleam ex Meguido, ex mi ke xjal najlke cyuj ke aldey ateꞌ nikayin cyiꞌj ke tnam lu; cyjaꞌtzun ke xjal aj Canaán ax e najan cyuj ke tnam lu. 28 Tejtzun toc mastl cyipun aj Israel, e octzun cykꞌoꞌn ke aj Canaán akꞌnal lajwers, pero mintiꞌ e xcyeꞌ tuꞌn tex cylajoꞌn.
29 Ax icx ke tiyjil Efraín mintiꞌ e xcyeꞌ tuꞌn tex cylajoꞌn ke aj Canaán, akeju najlke tuj tnam Gezer, cyjaꞌtzun, ax e najan ke aj Canaán cyxol.
Ke tnam mintiꞌ cub cyiꞌj cyuꞌn txkantl cyiyjil aj Israel
30 Ax icx ke tiyjil Zabulón mintiꞌ e xcyeꞌ tuꞌn tex cylajoꞌn ke aj Canaán, akeju najlke tuj tnam Quitrón ex tuj tnam Naalal, cyjaꞌtzun ke xjal aj Canaán ax e najan cyxol, nok oꞌcx e oc cykꞌoꞌn akꞌnal lajwers.
31 Ax icx ke tiyjil Aser mintiꞌ e xcyeꞌ tuꞌn tex cylajoꞌn ke xjal aj Canaán, akeju najlke cyuj ke tnam lu: Aco, Sidón, Ahlab, Aczib, Helba, Afec ex Rehob. 32 Ex tuꞌnju mintiꞌ e xcyeꞌ tuꞌn tex cylajoꞌn ke aj Canaán cyuj ke tnam lu, cyjaꞌtzun ax e cyaj ten najal cyxol.
33 Ax icx ke tiyjil Neftalí mintiꞌ e xcyeꞌ tuꞌn tex cylajoꞌn ke xjal aj Canaán, akeju najlke tuj tnam Bet-semes ex tuj tnam Bet-anat, pero e oc cykꞌoꞌn te cymajen tuꞌn cybinchante akꞌuntl cyuwxix, ex axtzun e cyaj ten najal cyxol.
34 Ke xjal aj Amorrey e jeꞌx cylajoꞌn ke tiyjil Dan max cyuj tiwitz txꞌotxꞌ, ex mintiꞌ xi cykꞌoꞌn ambil cye tuꞌn cyten cyuj chkꞌajlaj. 35 Cyjaꞌtzun, ke xjal aj Amorrey ax e najan t-xe witz Heres ex cyuj ke tnam Ajalón ex Saalbim. Pero tej toc mastl cyipun ke tiyjil José, e oc cykꞌoꞌn ke aj Amorrey te cymajen tuꞌn cybinchante akꞌuntl cyuwxix.
36 Aju tmojonil cytxꞌotxꞌ aj Amorrey, atzun xiꞌyni twitz witz Acrabim, ponin max tuj tnam Sela, ex atzun xiꞌyintl te jawni.