—Atzun jlu in tmaꞌn Kman aju Kdios akoꞌ aj Israel: Atxix ojtxi najltok cyxeꞌchele Taré jlajxi nima Éufrates tucꞌix Abraham ex Nacor akeju tcyꞌajal, ex in che cꞌuluntok cywitz junxitl dios. 3 Atzun etz wiꞌne cyxeꞌchele Abraham jlajxi nima, ex o bet ticꞌ wuꞌne tuj tcyakil txꞌotxꞌ Canaán. Tnejel xi nkꞌoꞌne jun tcyꞌajal Isaac tbi, ex wuꞌne chmet cybaj tiyjil. 4 Atzun te Isaac xi nkꞌoꞌne cabe tcyꞌajal, jun Jacob tbi ex juntl Esaú tbi. Te Esaú xi nkꞌoꞌne lugar twi witz Seir, atzunte Jacob cyucꞌix ke tcyꞌajal e jeꞌx tuj Ejipt. 5 Te tibajxi xi nsamaꞌne Moisés tucꞌix Aarón, ex e cꞌixbiset aj Ejipt wuꞌne tuꞌn nim cꞌixbisabl; cyjaꞌtzun tten e jeꞌtze wuꞌne tuj Ejipt. 6 Tejtzun cyetz cyxeꞌchele tuj Ejipt, e oc lpeꞌ aj Ejipt cyiꞌj tejxi cypon max ttzi mar Cyak Queꞌyin, cyucꞌix cycarwaj in che ajben tuj kꞌoj ex cyucꞌix ke xjal cyjax cyibaj chej, tuꞌn tcub cyiꞌj cyuꞌn. 7 E cubsantzun nwitze, ex cub nkꞌoꞌne nim klolj cyxol cyxeꞌchele cyucꞌil aj Ejipt; atzun cye aj Ejipt tzaj mulkꞌaj mar wuꞌne cyibaj ex e cyaj tjakꞌ. Ax keye e queꞌyinte teju bant wuꞌne tuj Ejipt. Te tibajxi jlu e tene nim tyemp tuj lugar tzkij txꞌotxꞌ, 8 ex e ul wiꞌne tuj cytxꞌotxꞌ aj Amorrey jlajxi nima Jordán tuj tjawitz kꞌij. E kꞌojin aj Amorrey cyiꞌje, pero ax kine in cub kꞌonte cye tuj cykꞌabe, cubtzun cyiꞌj cyuꞌne ex e octzune te tajwil cytxꞌotxꞌ. 9 Atzunte Balac aju tcyꞌajal Zipor ex rey cye aj Moab, tej tul kꞌojlel cyiꞌje, xi txocbaj Balaam aju tcyꞌajal Beor tuꞌn, tuꞌntzun ttzaj tkanin mya baꞌn cyibaje. 10 Pero mintiꞌ wakꞌe ambil te Balaam tuꞌn ttzaj tkanin mya baꞌn cyibaje, nok oꞌcx cucx e cub cyꞌiwlaꞌne tuꞌn ex e clete wuꞌne tuj tkꞌab Balac. 11 E icꞌtztzune tuj nima Jordán ex e ule tuj Jericó. Ke xjal najl tuj Jericó e oc ten kꞌojlel cyiꞌje, ax icx cybincha aj Amorrey, aj Ferezey, aj Canaán, aj Hetey, aj Gergesey, aj Hevey ex aj Jebusey, pero e jeꞌx nkꞌoꞌne cycyakil jlu tuj cykꞌabe tuꞌn tcub cyiꞌj cyuꞌne. 12 Nej e jeꞌx nsamaꞌne txkan ttxu sichel cywitze, ex ke xjal lu e jeꞌl ok cywitze naꞌnxtok cypon canune cyiꞌj, ax icx ke cabe rey cye aj Amorrey. Mintiꞌ cub cyiꞌj cyuꞌne tuꞌn cyspadiye ex miꞌn tuꞌn xobl cypleche. 13 Xi nkꞌoꞌne cytxꞌotxꞌe aju mya cyuꞌne baj cyakꞌnane, ex xi nkꞌoꞌne ke tnam cyeye aju mya cyuꞌne jaw cybinchaꞌne; atzun jaꞌlo najlkeye cyuj, ex in che loꞌne twitz uva ex twitz olivo aju mya cyuꞌne cuꞌx cyawaꞌne, chi Dios, chi Josué.

14 Ax icx xi tmaꞌn Josué cye:

—Atzun jaꞌlo, cucx che nimane Kman ex che ajbene te tuꞌn tcyakil cycꞌuꞌje ex axix toc cyuꞌne. Cypaꞌmil cyibe cyiꞌj ke cydios cyxeꞌchele akeju e cꞌulun cywitz jlajxi nima Éufrates ex tuj Ejipt; atzun cyeye che ajbene te Kman. 15 Katzun cycꞌiꞌye che ajbene te Kman, entons biꞌx cyximancuye jaꞌlo al e che ajbele; ka cye ke dios e ajben cyxeꞌchele cye jlajxi nima Éufrates, ex ka cye ke cydios aj Amorrey akeju najltok tuj txꞌotxꞌ lu jatum najl keye jaꞌlo. Atzun weye cyucꞌix cycyakil keju ateꞌ tuj njaye, a ko ajbele te Kman, chi Josué.

16 Atzun cye tnam xjal cyma:

—Mlayx tzꞌel kpaꞌn kibe tiꞌj Kman, ex mlayx ko ajbene cye junxitl dios. 17 Ate Kman etz kꞌinte ke ex cye kxeꞌchel tuj Ejipt jatum atoꞌtok te majen, ex tuꞌn o binchet nimcu binchben nim tipumal kwitz. Ate o clon ke ex o colon kiꞌj tuj tcyakil kbe tej kicꞌ cyuj nimcu tnam. 18 Ate Kman icꞌ lajonte cye cycyakil tnam xjal tuj kbe, ax icx o tbincha cyiꞌj aj Amorrey akeju najlke tzalu nej. Ax icx keye, te Kman ko ajbele, porque atzun Kdiosju, che chi.

19 Atzunte Josué xi tmaꞌn cye:

—Mlay bant cyuꞌne tuꞌn cyajbene te Kman, porque ate Kman Dios xjante, mintiꞌ in cub tuj twitz tuꞌn kcꞌulun twitz junxitl dios, ex mlayx tzicꞌx tuꞌn aju cyile ex cybinchbene mya baꞌn. 20 Ka ma cyaj cycoline ex ka ma che ajbene cye junxitl dios, ax icxte Kman cꞌoquel meltzꞌaj cyiꞌje tuꞌn ttzaj tkꞌoꞌn mya baꞌn cyibaje, ex che bajel naje tuꞌn, masque otok tbincha nimcu baꞌn cyeye nej.

21 Atzun cye tnam xjal tzaj cytzakꞌweꞌn:

—Ax toc, pero keye miꞌn kbinchaye icju, nok oꞌcx te Kman ko ajbele.

22 Atzunte Josué xi tmaꞌn cye:

—Ax keye testiw cyiꞌje, tuꞌnju ma jaw cyscꞌoꞌne tuꞌn cyajbene te Kman.

—Ax koꞌye, che chi tzaj cytzakꞌweꞌn.

23 Entons cyxon exe ke junxitl dios ateꞌ cyucꞌile, ex che ajbentzune te Kman tuꞌn tcyakil cyanmiye, aju Kdios aj Israel koꞌ, chi Josué cye.

24 Atzun cye tnam xjal tzaj cytzakꞌweꞌn:

—Ko ajbele te Kman Dios ex ko nimale te.

25 Ax kꞌij lu ex tujx Siquem, twitz Josué cyaj bant tiꞌj jun yol cyuꞌn aj Israel tucꞌil Dios. Xi tkꞌoꞌn Josué ke ley ex ke mandamyent cye, 26 ex cyaj ttzꞌiban jlu tuj libro te tley Dios. Te tibajxi tzaj tiꞌn jun abj matij, ex cub tkꞌoꞌn tjakꞌ jun wiꞌ tzeꞌ cꞌol ttxlaj tja Kman, 27 ex xi tmaꞌn cye cycyakil tnam xjal cyjaꞌ:

—Aju abj lu cꞌajbel te jun techal te ke, ex atzunju cꞌajbel te testiw tiꞌj tcyakil yol ma tma Kman ke; cꞌoquel te jun testiw cyiꞌje, tuꞌntzun miꞌn tel cypaꞌn cyibe tiꞌj Cydiose.

28 Te tibajxi jlu xi tmaꞌn Josué cye xjal tuꞌn taj teyle junjun tuj ttxꞌotxꞌ.

29 Te tibajxi jlu, cyimtzun Josué aju tcyꞌajal Nun ex tmajen Kman, tej otok japun jun syent tucꞌ laj abkꞌi tuꞌn. 30 Cuꞌx makuꞌn tujx ttxꞌotxꞌ, tuj lugar Timnat-sera aju taꞌ tuj tiwitz txꞌotxꞌ cye aj Efraín tiꞌjxi witz Gaas. 31 Ke aj Israel e ajben te Kman tej itzꞌxtok Josué, ax icx te tibajxi, tej itzꞌxtok ke cytijil xjal, akeju ax e cyaj ten tcyimlenxi Josué ex o cyil tcyakilju baꞌn o tbincha Kman cye aj Israel.

32 Ke tbakil José, aju tzaj cyiꞌn aj Israel tuj Ejipt, atzun cuꞌx cymakuꞌn tuj Siquem, tuj txꞌotxꞌ aju otok lakꞌet tuꞌn Jacob cye tcyꞌajal Hamor aju tman Siquem tuꞌn jun syent sak pwak. Aju txꞌotxꞌ lu oc te cyetzbil ke tiyjil José.

33 Tej tcyim Eleazar aju tcyꞌajal Aarón, cuꞌx makuꞌn twiꞌ jun tal witz tuj ttxꞌotxꞌ Finees aju tcyꞌajal, aju tzaj kꞌoꞌn te tuj tiwitz txꞌotxꞌ cye aj Efraín.