6 —T-xe witz Horeb o tzaj tmaꞌn Kman Dios ke cyjaꞌ: Ma bet-xi kꞌij ma che tene t-xe witz lu. 7 Cybincham cytene ex cyxiꞌye tuj tiwitz txꞌotxꞌ cye aj Amorrey ex cyuj ke txꞌotxꞌ nikayin ateꞌ ttxlaj: tuj txꞌotxꞌ Arabá cyxol witz ex t-xe witz, ex tuj txꞌotxꞌ Néguev, ax icx tuj txꞌotxꞌ ttzi Nintz mar aju cytanmi aj Canaán, ax icx tuj Líbano, ocxi cypon baje max ttzi nima Éufrates. 8 O txi nkꞌoꞌne txꞌotxꞌ lu te cyeye; cyxiꞌye ex cyoque tajwil, porque tziyimaj wuꞌne cye cyxeꞌchele: te Abraham, te Isaac, te Jacob, ex cye cyiyjil che ul itzꞌj te tibajxi, chi Kman, chi Moisés.

9 Ax tuj tkꞌijlalil lu o txi nmaꞌne cyeye cyjaꞌ: Mlayx bant tuꞌn cycyaj tene tuj ncwente njunalxe. 10 Nimcu cycꞌwaꞌle o tzaj tkꞌoꞌn Kman Dios, jaꞌlo ma chmet cybaje, ic tten cyajlale ic tzaꞌn ke cheꞌw twitz cyaꞌj. 11 Chmet-xwit nimxix cyajlale tuꞌn Kman aju Cydios cyxeꞌchele, ex che cubxwit cyꞌiwlaꞌne tuꞌn ic tzaꞌnx o tzaj ttziyan. 12 Ka oꞌcx kine, ¿tzaꞌn tten tuꞌn tcꞌisj tcyakil iktz wuꞌne, tuꞌn t-xi nbinchaꞌne cyiꞌje tiꞌj tcyakil mya baꞌn in tzaj cyxole, cyucꞌix ke kꞌoj? 13 Cyjaꞌtzun xi nmaꞌne cyeye: Cyscꞌoꞌn jawe cyxol cycyakil cꞌloj cyiyjile, junjun xinak at cynabl, at cysecꞌal ex at cyojtzkibl, tuꞌntzun cyoc nkꞌoꞌne te nejenel cyxole.

14 Atzun cyeye tzaj cytzakꞌweꞌne weye: Baꞌn ma tzꞌela tuj kwitze tuꞌn tbant aju ma tzaj tmaꞌna.

15 Tzajtzun wiꞌne junjun xinak cyxole, akeju at nimxix cynabl ex at cyojtzkibl, ex xi nkꞌoꞌne cyoclen tuꞌn cycawin cyibaje. At junjun xi nkꞌoꞌne mil xjal tuj tcwent, junjuntl 100; junjuntl 50; ex at junjuntl xi nkꞌoꞌne laj xjal tuj tcwent; ax icx at junjuntl e joꞌc nkꞌoꞌne te cawil cyibaj junjun cꞌloj cyeye. 16 Tujx tkꞌijlalil lu xi nmaꞌne cye jwes cyjaꞌ: Cybinxe cyyol cycyakil ex cybinchanxe cyiꞌj tuj tumelxix, tzaꞌnx cyiꞌj ke cyxjalile ax icx cyiꞌj ke stranjer xjal ateꞌ cyxole. 17 Oc cyoc xjal tuj xtis cyuꞌne, miꞌn tzꞌoc cykꞌoꞌne cywitze tiꞌj ju cyxilen; nok oꞌcx cybinchanxe cyiꞌj cycyakil, ka chꞌin cyoclen ex ka maꞌ. Mi jun tuꞌn cyxobe cywitz, porque te te Dios aju cawbil. Katzun at jun ma pon cyucꞌile ex mlay bant tiꞌj cyuꞌne, cysamantze wucꞌile, jacutzun txi nbinchaꞌne tiꞌj tzalu, nchiye cye.

18 Tujx tkꞌijlalil lu xi nmaꞌne cyeye tcyakil alcye tuꞌn cybinchanteye.

19 Tejtzun ketz tuj Horeb, atzun o ko tzaj tuj be in xiꞌ cyuj tiwitz txꞌotxꞌ cye aj Amorrey ic tzaꞌn tzaj tmaꞌn Kman Dios ke. Baj kbetin tcyakil tzkij txꞌotxꞌ maꞌxix ex xobajilxix ic tzaꞌn o cyile, max tejxi kul tuj lugar Cades-barnea. 20 Xitzun nmaꞌne cyeye cyjaꞌ: Ma ko ul ttxaꞌn tiwitz txꞌotxꞌ cye aj Amorrey, aju ctzajel tkꞌoꞌn Kman Dios ke. 21 Ctzajel tkꞌoꞌn Kman Dios aju txꞌotxꞌ lu te ke. Chux keye, cytzyume ic tzaꞌnx o tma Kman aju Cydios cyxeꞌchele. Miꞌn che xobe ex miꞌn baj cycꞌuꞌje. 22 Atzun cyeye tzaj cymaꞌne weye cyjaꞌ: Maslo baꞌn atwit junjun ke ẍeꞌx nej queꞌyilte txꞌotxꞌ, ex tuꞌn cyul kꞌmalte ke alcye be tuꞌn t-xi kiꞌn, ex alcye ke tnam tuꞌn kocx cyuj.

23 Baꞌn ela tuj nwitze aju tzaj cymaꞌne weye, ex jaw nscꞌoꞌne cablaj xinak cyxole, jun cyxol junjun cꞌloj cyiyjile. 24 Cubtzun be cyuꞌn, e jax tuj tiwitz txꞌotxꞌ tejxi cypon tuj chkꞌajlaj Escol, ex baj cybetin tcyakil txꞌotxꞌ. 25 Tzaj cyiꞌn junjun twitz awal at tuj txꞌotxꞌ lu, ex tej cyul meltzꞌaj tzaj cymaꞌn cyjaꞌ: Tbanilxix aju txꞌotxꞌ ctzajel kꞌoꞌn ke tuꞌn Kman Dios, che chi. 26 Atzun cyeye, mintiꞌ cub tuj cywitze tuꞌn cyxiꞌye cꞌmolte te, mintiꞌ xi cynimane aju otok tzaj tmaꞌn Kman Dios, 27 e jaw wululune tuj cyjaye ex o cymaye cyjaꞌ: Mintiꞌtl taj Kman kiꞌj jaꞌlo; o ko etz tiꞌn tuj Ejipt nok tuꞌn kxi tkꞌoꞌn tuj cykꞌab aj Amorrey ex tuꞌn kcub baj cyuꞌn. 28 ¿Jatum ko xeꞌl clol kib jaꞌlo? Porque ke xjal ateꞌ ma chixin mas nim cyipun ex mas matij cywaꞌl kwitz, ex maꞌ cywaꞌl ke muro cyoc cyiꞌj cytanmi. Ax icx ma kile ke tiyjil Anac maꞌ cywaꞌl, che chi. Tuꞌn tlaj tcyakil jlu, biꞌx ma tzaj baj kcꞌuꞌje, che chiye.

29 Atzun weye xi nmaꞌne cyeye: Miꞌn tzaj baj cycꞌuꞌje ex miꞌn che xobe cywitz. 30 Ate Kman Dios cbel nej cywitze, ex a cꞌoquel ten kꞌojlel te cyxele ic tzaꞌn o cyile aju o tbincha tuj Ejipt 31 ex tuj tzkij txꞌotxꞌ. A Kman Dios tzaj ẍaklunte cyeye tuj tcyakil be jatum o che bete tejxi cyule tuj lugar lu, ic tzaꞌn jun mambaj ẍakluꞌn tcꞌwaꞌl tuꞌn. 32 Masque icju, pero mintiꞌ oc keꞌ cycꞌuꞌje tiꞌj Cymane aju Cydiose; 33 aju cub nej cywitze tuj be tuꞌn tjaw t-scꞌoꞌn aju lugar jatum tuꞌn cycub tene. Te konicꞌan tzaj tyecꞌun cybeye tuꞌn tkan kꞌakꞌ, atzun kꞌijl tzaj tyecꞌun cybeye tuꞌn muj.

34 Tej tbinte Kman aju cyyole tej cyjaw wululune, tzaj nim tkꞌoj cyiꞌje ex tma jun tyol axix toc cyjaꞌ: 35 Cyxol ke xjal mya baꞌn lu, mi jun oc tilaꞌ aju tbanil txꞌotxꞌ xi ntziyane cye cyxeꞌchel; 36 oꞌcx Caleb aju tcyꞌajal Jefone oc tilaꞌ; ex cxel nkꞌoꞌne te ex cye tiyjil aju txꞌotxꞌ o baj tbetin tuj, tuꞌnju o bet tzꞌaklxix nwitze, chi Kman.

37 Nok tuꞌn cyeye cylaj jaw kꞌojl Kman wiꞌje, ex tzaj tmaꞌn weye cyjaꞌ: Ax icx teya mlay tzꞌocxa tuj txꞌotxꞌ lu; 38 aju cꞌoquex, atzun Josué aju tcyꞌajal Nun ex onil teya. Cyuwsanxa tcꞌuꞌj, porque atzun cxel sipante cytxꞌotxꞌ aj Israel. 39 Atzun ke cycꞌwaꞌle, akeju naꞌnx tel cynicꞌ tiꞌj alcye baꞌn ex alcye mya baꞌn, akeju o cymaye cyiꞌj ka tuꞌn cyxi kꞌiꞌn cyuꞌn ke aj kꞌoj cyiꞌje, alpe ke che oquex tuj txꞌotxꞌ lu; wuꞌne cxel nkꞌoꞌne cye tuꞌn cyoc te tajwil. 40 Atzun cyeye, cyaj meltzꞌaje juntl maj tuj tzkij txꞌotxꞌ, ex cyxiꞌye juntl maj jatum taꞌ mar Cyak Queꞌyin, chi Dios.

41 Tzajtzun cytzakꞌweꞌne: Ma ko binchane il twitz Kman, atzun jaꞌlo ko xeꞌle kꞌojlel ic tzaꞌnx o tma Kman Dios keye, che chiye. Xitzun cyiꞌne ke cymacbile in che ajben tuj kꞌoj; tuj cywitze mya cwest tuꞌn cyjaxe cyuj ke tiwitz txꞌotxꞌ. 42 Atzunte Kman tzaj tmaꞌn weye cyjaꞌ: Kꞌmanxa cye tuꞌn miꞌn cyxiꞌ kꞌojlel, tuꞌntzun miꞌn tcub cyiꞌj cyuꞌn ke aj kꞌoj cyiꞌj, porque mi aꞌl kine cyucꞌil.

43 Xitzun nmaꞌne cyeye tuꞌn miꞌn cyxiꞌye, pero mintiꞌ xi cybiꞌne ex mintiꞌ xi cynimane aju tzaj tmaꞌn Kman; e jaxe cyuj ke tiwitz txꞌotxꞌ tucꞌil cynimbil cyibe. 44 E jeꞌtztzun ke aj Amorrey kꞌojlel cyiꞌje, akeju najl cyuj tiwitz txꞌotxꞌ; e joꞌc lpeꞌ cyiꞌje ic tzaꞌn in cybinchaꞌn ttxu ak, ex e cube cyuꞌn, xiꞌx keꞌ tuj Seir ex pon baj tuj txꞌotxꞌ Horma. 45 Tejtzun cyul meltzꞌaje, e jaw okꞌe twitz Kman pero mintiꞌ tzaj tbiꞌn tkꞌajkꞌajel cywiꞌye, ex mintiꞌ tzaj tkꞌoꞌn twiꞌ cyiꞌje. 46 Cyjaꞌtzun, ax e cyaj tene najal nimcu kꞌij tuj txꞌotxꞌ Cades.