Ke abkꞌi tej cyten aj Israel tuj tzkij txꞌotxꞌ
2
Te tibajxitzun, cub be kuꞌn tuꞌn kpon max tuj tzkij txꞌotxꞌ tuj tbeyil mar Cyak Queꞌyin, ic tzaꞌnx otok tma Kman weye, ex eltzun nim kꞌij kuꞌn in ko betjeꞌ ttziꞌyile tiwitz txꞌotxꞌ Seir. 2 Tmatzun Kman weye cyjaꞌ: 3 Ma tzꞌel nim kꞌij nok in che betjeꞌye ttziꞌyile tiwitz txꞌotxꞌ lu. Cyxiꞌye jaꞌlo tuj tumlal tbankꞌab kꞌij. 4 Kꞌmanxa cye t-xjalila cyjaꞌ: Cyjaꞌ che elexe tuj cytxꞌotxꞌ tiyjil Esaú, akeju najl tuj Seir ex at cyxilene cyucꞌil. Ke xjal lu in che xob cywitze; pero ten cycwente cyiꞌje, 5 miꞌn che oc tzokpaje cyiꞌj porque mlay txi nkꞌoꞌne jun piẍ cytxꞌotxꞌ te cyeye. Tcyakil tiwitz txꞌotxꞌ Seir, cye tiyjil Esaú. Wuꞌne xi nkꞌoꞌne cye te cyetzbil. 6 Cychjome cywaye cyucꞌil, aju cxel cywaꞌne, ax icx cycꞌaye aꞌ, cychjonxe cye, chi Kman tma. 7 O che cub cyꞌiwlaꞌne tuꞌn Kman Dios tiꞌj tcyakilju o cybinchaye ex ax o ten cyucꞌile. Tuj 40 abkꞌi o che oc cwentine tuꞌn tuj tcyakil cybeye tuj nintz tzkij txꞌotxꞌ, ex mintiꞌ jun mintiꞌwt o canun cyeye.8 Tej kbet tuj tbeyil Arabá, aju in tzaj tuj Elat ex tuj Ezión-geber, a o ko tzaj ttxaꞌnile cytxꞌotxꞌ ke xjal at cyxilen kucꞌil, akeju tiyjil Esaú, akeju najl tuj txꞌotxꞌ Seir, ex a o ko tzaj tuj be nnuꞌl tuj tzkij txꞌotxꞌ cye aj Moab. 9 Tzajtzun tmaꞌn Kman weye cyjaꞌ: Miꞌn cybinchaye jun mya baꞌn cyiꞌj aj Moab ex miꞌn che oc tzokpaje cyiꞌj porque tiyjil Lot ke, ex mlay txi nkꞌoꞌne jun piẍ cytxꞌotxꞌ te cyeye. Wuꞌne o txi nkꞌoꞌne aju txꞌotxꞌ Ar te cyetzbil. 10 (Tuj txꞌotxꞌ lu e najan ke aj Emit ojtxi; nim cyipun, nim cyajlal, ex maꞌ cywaꞌl, ic tzaꞌnx ke tiyjil Anac. 11 Tuj cywitz txkantl xjal ka aj Refait ke tuꞌn tlaj maꞌ cywaꞌl, atzun ke aj Moab in cymaꞌn ka aj Emit ke. 12 Atzun tuj txꞌotxꞌ Seir e najan ke aj Horey ojtxi, pero e cub baj byoꞌn cyuꞌn ke tiyjil Esaú, e oc te tajwil cytxꞌotxꞌ ex ax e cyaj ten najal tuj, ic tzaꞌn bant cyuꞌn ke aj Israel tiꞌj txꞌotxꞌ tzaj tkꞌoꞌn Kman cye.) 13 Tmatzun Kman cyjaꞌ: Che weꞌctze ex cyicꞌxe max jlajxi tkꞌab xak Zered, chi. Atzun ke o icꞌx tuj tkꞌab xak lu.
14 Atxix tej ketz tuj txꞌotxꞌ Cades-barnea tejxi kicꞌx tuj tkꞌab xak Zered, otok bant 38 abkꞌi. Tej cyel 38 abkꞌi lu, cycyakil ke xinak aj Israel, akeju at cynabl tuꞌn cykꞌojin, otok che baj cyim tuj campaament ic tzaꞌnx otok tzaj tcyuwsaꞌn Kman. 15 Tzaj castiw lu cyibaj tuꞌn Kman, tejxi cybaj cyim.
16 Tejtzun cybaj cyim cycyakil ke xinak at cynabl tuꞌn cykꞌojin, 17 tzaj tmaꞌn Kman weye cyjaꞌ: 18 Cyicꞌxe jaꞌlo tuj cytxꞌotxꞌ aj Moab ex cyxiꞌye tumlal tnam Ar. 19 Oc toc cycꞌulban cyibe cyucꞌil aj Amón akeju tiyjil Lot, miꞌn tzꞌoc cybinchaꞌne jun mya baꞌn cyiꞌj ex miꞌn che oc tzokpaje cyiꞌj; mlay txi nkꞌoꞌne jun piẍ cytxꞌotxꞌ te cyeye, tuꞌnju o txi nkꞌoꞌne cye tuꞌn toc te cyetzbil, chi Kman. 20 (Ax icx aju txꞌotxꞌ lu, tuj cywitz xjal ka cytxꞌotxꞌ ke aj Refaittok, porque tuj tkꞌijlalil ojtxi, atzun e najan ke aj Refait tuj, akeju oc kꞌoꞌn cybi aj Zomzomey cyuꞌn aj Amón. 21 Nim cyajlal ke xjal lu, nim cyipun ex maꞌ cywaꞌl ic tzaꞌn ke tiyjil Anac; pero e cub baj byoꞌn cyuꞌn ke aj Amón tuꞌn tipumal Kman, ex atzun cye aj Amón e cyaj ten najal te jumajx tuj txꞌotxꞌ lu. 22 Ic e tenba ke jlu ic tzaꞌn o tbincha Kman cyiꞌj aj Horey tej cycub byoꞌn tuj Seir cyuꞌn ke tiyjil Esaú, ex atzun cye tiyjil Esaú e cyaj ten najal tuj cytxꞌotxꞌ ex ax ateꞌ jaꞌlo. 23 Ax o baj cyiꞌj aj Hevey, akeju najltok cyuj aldey nikayin ttxlaj tnam Gaza, tej cycub byoꞌn cyuꞌn ke aj Filistey, akeju e tzaj tuj Creta ex ax e cyaj ten najal tuj cytxꞌotxꞌ.) 24 Tzajtzun tmaꞌn Kman cyjaꞌ: Chux keye, cykꞌoncuye be ex cyicꞌxe tuj tkꞌab xak Arnón. Cxel nkꞌoꞌne Sehón tuj cykꞌabe, aju aj Amorrey ex rey te tnam Hesbón; ax icx ttxꞌotxꞌ cxel nkꞌoꞌne cyeye. Cyoc tzokpaje tiꞌj ex cyetzan ela ttxꞌotxꞌ. 25 Texju kꞌij jaꞌlo, cycyakil ke tnam ateꞌ twitz txꞌotxꞌ ctzajel cyxobil wuꞌne cywitze. Octzun cybinte tkanil cyiꞌje che oquel ten luꞌlul tuꞌn cychiylale, ex ctzajel baj cycꞌuꞌj cywitze, chi Kman.
Cub tiꞌj rey Sehón cyuꞌn aj Israel
26 Max tuj tzkij txꞌotxꞌ Cademot e tzaj nsamaꞌne junjun sanjel, tuꞌn cyul yolil tucꞌil Sehón aju rey te tnam Hesbón, tuꞌn tbant tiꞌj jun kyol tuj txubtxaj tucꞌil ex tuꞌn t-xi cymaꞌn te cyjaꞌ: 27 Kajbile tuꞌn kicꞌxe tuj ttxꞌotxꞌa, ex oꞌcx ko betele tuj ninbe; miꞌn txi kiꞌne jun tkꞌab be. 28 Jacu txi kchjoꞌne tcyakil kwaye cꞌajbel junjun kꞌij, ax icx aju aꞌ cxel kcꞌaꞌne cxel kchjoꞌne. Nok oꞌcx in ko cubsane teya tuꞌn ttzaj tkꞌoꞌna ambil tuꞌn kicꞌx bete tuj ttxꞌotxꞌa, 29 ic tzaꞌn o tzaj kꞌoꞌn ambil keye cyuꞌn ke tiyjil Esaú akeju najl tuj txꞌotxꞌ Seir, ax icx cyuꞌn aj Moab akeju najl tuj txꞌotxꞌ Ar. Oꞌcx kajbile tuꞌn ttzaj tkꞌoꞌna ambil keye ocxi kicꞌxe jlajxi nima Jordán, tuꞌntzun kpone tuj txꞌotxꞌ ctzajel kꞌoꞌn keye tuꞌn Kmane aju Kdiose.
30 Atzunte rey Sehón mintiꞌ o tajbe tuꞌn kicꞌtz tuj ttxꞌotxꞌ, porque ate Kman Dios cub cyuwsante tanmi tuꞌntzun ttzaj tkꞌoꞌn tuj kkꞌab, ic tzaꞌn in cyile jaꞌlo.
31 Ex tzaj tmaꞌn Kman weye: Biꞌx jaꞌlo cxel nkꞌoꞌne rey Sehón tuj cykꞌabe tucꞌix tcyakil ttxꞌotxꞌ; cyocx naje tuj tuꞌntzun cyoque te tajwil, chi Kman.
32 Etztzun naj Sehón kꞌojlel kiꞌj, cyucꞌix cycyakil ke t-soldad, tuꞌntzun cyoc tzokpaj kiꞌj tuj tnam Jahaza; 33 pero e tzaj tkꞌoꞌn Kman Dios tuj kkꞌab, ex cub kbyoꞌn aju rey cyucꞌix ke tcyꞌajal ex cycyakil ke t-soldad. 34 Cycyakil ke tnam in cawintok cyibaj e baj naj kuꞌn; ax icx e cub kbyoꞌn ke xinak, ke xuꞌj ex ke cꞌwaꞌl; mi jun cyaj ankꞌin kuꞌn. 35 Oꞌcx tzaj kiꞌn te ke, cycyakil ke wacẍ ex ke tiꞌxti wiꞌyilxix e cnet kuꞌn cyuj ke tnam otok cub cyiꞌj kuꞌn. 36 Xiꞌx keꞌ tuj tnam Aroer, aju tcub nikayin ttzi nima Arnón, tucꞌix tnam tcub tuj chkꞌajlaj, ex pon baj max tuj Galaad, mi jun tnam ten tipun tuꞌn tkꞌojin kucꞌil, porque tuꞌn Kman Dios tzaj tkꞌoꞌn tuꞌn cycub tzꞌak cycyakil tuj kkꞌab. 37 Ke txꞌotxꞌ mintiꞌ o oc tzokpaj cyiꞌj, atzun ke jlu: Aju cytxꞌotxꞌ aj Amón tucꞌix tcyakil txꞌotxꞌ ttzi nima Jaboc, ax icx ke tnam ateꞌ tuj tiwitz txꞌotxꞌ, ex mastl lugar otok tzaj tmaꞌn Kman Dios ke tuꞌn miꞌn koc tzokpaj cyiꞌj.